തിരുവനന്തപുരം: കേരള സർവകലാശാല രജിസ്റ്റാറെ വൈസ് ചാൻസിലർ സസ്‌പെൻഡ് ചെയ്ത നടപടിയിൽ പ്രതിഷേധിച്ച് എസ്എഫ്ഐ രാജ്‌ഭവനിലേക്ക് നടത്തിയ മാർച്ചിൽ സംഘർഷം. ഗവർണർ തിരികെ മടങ്ങണം എന്ന മുദ്രാവാക്യം വിളിച്ചാണ് പ്രതിഷേധം. 

വെള്ളയമ്പലത്തിൽ വെച്ച് എസ്എഫ്ഐ പ്രവർത്തകരെ പൊലിസ് ബാരിക്കേഡ് ഉപയോഗിച്ചുകൊണ്ട് തടഞ്ഞെങ്കിലും ബാരിക്കേഡ് മറികടന്ന് പ്രവർത്തകർ മുന്നോട്ട് പോയി. പൊലിസ് പ്രവർത്തകർക്കെതിരെ രണ്ട് ജലപീരങ്കി പ്രയോഗിച്ചു. എന്നാൽ എസ്എഫ്ഐ ഇതിൽ നിന്നും പിന്നോട്ട് പോവാൻ തയ്യാറായില്ല. പൊലിസും എസ്എഫ്ഐ പ്രവർത്തകരും തമ്മിൽ വാക്കേറ്റമുണ്ടായി. 

കേരള സർവകലാശാല രജിസ്ട്രാർ കെ.എസ്. അനിൽകുമാറിനെ വൈസ് ചാൻസലർ ഡോ. മോഹൻ കുന്നുമ്മൽ സസ്പെൻഡ് ചെയ്തത്. കാവിക്കൊടിയേന്തിയ ഭാരതാംബയുടെ ചിത്രം വെച്ച് സെനറ്റ് ഹാളിൽ നടത്താൻ നിശ്ചയിച്ചിരുന്ന പരിപാടി റദ്ദാക്കിയതുമായി ബന്ധപ്പെട്ടാണ് നടപടി. ഗവർണർ രാജേന്ദ്ര വിശ്വനാഥ് ആർലേക്കർ പങ്കെടുക്കേണ്ടിയിരുന്ന പുസ്തക പ്രകാശന ചടങ്ങിന് അനുമതി നിഷേധിച്ച രജിസ്ട്രാറുടെ നടപടിയാണ് സസ്പെൻഷന് കാരണമായത്. 

അന്വേഷണത്തിന് ശേഷമാണ് നടപടിയെന്ന് വിസി വ്യക്തമാക്കി. ഗവർണറോട് അനാദരവ് കാണിച്ചുവെന്നാണ് അന്വേഷണ റിപ്പോർട്ടിൽ പരാമർശിക്കുന്നത്. പത്മനാഭ സേവാസമിതി സംഘടിപ്പിച്ച പുസ്തക പ്രകാശന ചടങ്ങിൽ കാവിക്കൊടിയേന്തിയ ഭാരതാംബയുടെ ചിത്രം പ്രദർശിപ്പിച്ചത് വലിയ വിവാദമായിരുന്നു. സർവകലാശാല അനുമതി റദ്ദാക്കിയിട്ടും പരിപാടി സെനറ്റ് ഹാളിൽ നടത്താൻ ശ്രമിച്ചത് നിയമവിരുദ്ധമാണെന്ന് ചൂണ്ടിക്കാട്ടി രജിസ്ട്രാർ ഡിജിപിക്ക് പരാതി നൽകിയിരുന്നു. ഇതിന് പിന്നാലെയാണ് രജിസ്ട്രാറിനെതിരെ വിസി നടപടിയെടുത്തത്.