ന്യൂഡൽഹി: ബിഹാർ വോട്ടർ പട്ടിക പരിഷ്കരണവുമായി ബന്ധപ്പെട്ട് ഇന്ത്യ സഖ്യ പാർട്ടികളുടെ ആശങ്കകളും നിർദേശങ്ങളും തെരഞ്ഞെടുപ്പ് കമ്മീഷൻ തള്ളിയതിനെതിരെ ജോൺ ബ്രിട്ടാസ് എംപി രൂക്ഷ വിമർശനം ഉന്നയിച്ചു. ബിഹാറിൽ 'വോട്ട് നിരോധന'ത്തിനുള്ള ശ്രമമാണ് തെരഞ്ഞെടുപ്പ് കമ്മീഷൻ നടത്തുന്നതെന്നും, പിൻവാതിലിലൂടെ ദേശീയ പൗരത്വ രജിസ്റ്റർ (എൻആർസി) നടപ്പാക്കാനുള്ള നീക്കമാണിതെന്നും അദ്ദേഹം ഡൽഹിയിൽ നടത്തിയ വാർത്താസമ്മേളനത്തിൽ ആരോപിച്ചു.

പ്രതിപക്ഷ പാർട്ടികൾ മുന്നോട്ടുവച്ച 21 നിർദേശങ്ങൾ തെരഞ്ഞെടുപ്പ് കമ്മീഷൻ പൂർണമായും തള്ളിയതായി ബ്രിട്ടാസ് വ്യക്തമാക്കി. ഈ ആവശ്യങ്ങൾ ചർച്ച ചെയ്യാൻ പോലും കമ്മീഷൻ തയ്യാറായില്ലെന്ന് അദ്ദേഹം കുറ്റപ്പെടുത്തി. "സ്പെഷ്യൽ ഇൻ്റൻസീവ് റിവിഷൻ ഏത് നിർദേശപ്രകാരമാണ് നടപ്പാക്കുന്നത്? മഹാരാഷ്ട്രയിലേതിന് സമാനമായ വോട്ട് കച്ചവടം നടപ്പാക്കാനുള്ള ശ്രമമാണ് ഇത്," ബ്രിട്ടാസ് ആരോപിച്ചു. രാഷ്ട്രീയ പാർട്ടികളുമായുള്ള ഒന്നിലധികം കൂടിക്കാഴ്ചകളിൽ പോലും ഈ വിഷയം ചർച്ച ചെയ്യാതെ, തിരക്കിട്ട് പരിഷ്കരണം നടപ്പാക്കുകയാണെന്നും അദ്ദേഹം പറഞ്ഞു.

നിയമപരമായി മുന്നോട്ടുപോകാനുള്ള നടപടികൾ ആലോചിച്ച് തീരുമാനിക്കുമെന്നും ബ്രിട്ടാസ് വ്യക്തമാക്കി. ഇന്ത്യ മുന്നണി നേതാക്കളും തെരഞ്ഞെടുപ്പ് കമ്മീഷനും തമ്മിലുള്ള യോഗത്തിന് ശേഷമാണ് അദ്ദേഹത്തിന്റെ ഈ പ്രതികരണം.

John Brittas MP accused the Election Commission of attempting to implement NRC through the backdoor by revising Bihar’s voter list, dismissing concerns and 21 proposals from INDIA alliance parties. He criticized the Commission for not discussing the issue despite multiple meetings and likened it to a "vote ban" akin to demonetization, alleging a Maharashtra-style "vote trade." Brittas vowed to explore legal action after the INDIA bloc’s meeting with the Commission.