ന്യൂഡൽഹി: ഇന്ത്യയിൽ മാധ്യമ സെൻസർഷിപ്പുണ്ടെന്നും ഇക്കാര്യത്തിൽ ആശങ്കയുണ്ടെന്നും സാമൂഹികമാധ്യമമായ 'എക്സ്'. അന്താരാഷ്ട്ര വാർത്താ ഏജൻസിയായ റോയിട്ടേഴ്സിന്റെ ഔദ്യോഗിക എക്സ് അക്കൗണ്ട് ഉൾപ്പെടെ 2355 അക്കൗണ്ടുകൾ തടയാൻ കേന്ദ്രസർക്കാർ നിർദേശിച്ചുവെന്നും ശതകോടീശ്വരൻ ഇലോൺ മസ്‌കിന്റെ ഉടമസ്ഥതയിലുള്ള എക്സ് വെളിപ്പെടുത്തി.

ALSO READ: ബിഹാർ വോട്ടർപട്ടിക: പ്രതിപക്ഷ പാർട്ടികൾ സുപ്രിംകോടതിയിൽ

ജൂലൈ മൂന്നിലെ കേന്ദ്ര സർക്കാർ ഉത്തരവ് പ്രകാരമാണ് റോയിട്ടേഴ്സ്, റോയിട്ടേഴ്സ് വേൾഡ് ഉൾപ്പെടെയുള്ള 2355 അക്കൗണ്ടുകൾ ഇന്ത്യയിൽ ബ്ലോക്ക് ചെയ്തത്. ഐ.ടി നിയമത്തിലെ സെക്ഷൻ 69 എ പ്രകാരം ഒരുമണിക്കൂറിനുള്ളിൽ നടപടി സ്വീകരിക്കണമെന്നായിരുന്നു നിർദേശം. യാതൊരു കാരണവും പറയാതെ അക്കൗണ്ടുകൾ റദ്ദാക്കാൻ നിർദേശിച്ച ഐ.ടി മന്ത്രാലയം, ഇനിയൊരു അറിയിപ്പ് ലഭിക്കുന്നതുവരെ ഈ അക്കൗണ്ടുകളെല്ലാം ബ്ലോക്ക്ചെയ്ത നിലയിൽ തുടരണമെന്നും ആവശ്യപ്പെട്ടു.

എന്നാൽ, പൊതുജനങ്ങളുടെ പ്രതിഷേധത്തെത്തുടർന്ന് റോയിട്ടേഴ്സിന്റെയും റോയിട്ടേഴ്സ് വേൾഡിന്റെയും അക്കൗണ്ടുകൾ അൺബ്ലോക്ക് ചെയ്യാൻ സർക്കാർ അഭ്യർഥിച്ചെന്നും എക്സ് അതിന്റെ ഗ്ലോബൽ ഗവേണൻസ് അഫയേഴ്സ് അക്കൗണ്ട് വഴി പങ്കുവച്ച കുറിപ്പിലുണ്ട്. നേരത്തെ റോയിട്ടേഴ്സിന്റെ എക്സ് അക്കൗണ്ട് തടയാൻ നിർദേശം നൽകിയിട്ടില്ലെന്നാണ് കേന്ദ്രസർക്കാർ വ്യക്തമാക്കിയിരുന്നത്.

ALSO READ: ദേശീയ പണിമുടക്ക് തുടരുന്നു: കേരളത്തിലും ഡയസ്‌നോണ്‍; വിവിധ സര്‍വകലാശാലകളിലെ പരീക്ഷകള്‍ മാറ്റിവെച്ചു

ഈ അവകാശവാദത്തെ തള്ളുന്നതാണ് എക്‌സിന്റെ വെളിപ്പെടുത്തൽ. ഇന്ത്യയിൽ നടക്കുന്ന മാധ്യമ സെൻസർഷിപ്പിൽ തങ്ങൾക്ക് ആശങ്കയുണ്ട്. ഇക്കാര്യത്തിൽ ലഭ്യമായ എല്ലാ നിയമവഴികളും പരിശോധിച്ചുവരികയാണ്. ഇത്തരം നടപടികൾ ബാധിച്ച ഉപയോക്താക്കളോട് കോടതികൾവഴി നിയമപരമായ പരിഹാരമാർഗങ്ങൾ തേടാൻ ആവശ്യപ്പെടുകയാണെന്നും എക്സ് കുറിച്ചു.

ജൂലൈ 3 ന് അർധരാത്രിയോടെ റോയിട്ടേഴ്സിന്റെ എക്സ് അക്കൗണ്ടിൽ കയറിയ ഉപയോക്താക്കൾക്ക് 'നിയമപരമായ ആവശ്യത്തിന് റോയിട്ടേഴ്‌സ് ഇന്ത്യയിൽ തടഞ്ഞുവച്ചിട്ടുണ്ട്' എന്ന സന്ദേശമാണ് ലഭിച്ചിരുന്നത്. പ്രതിഷേധം ഉയർന്നതോടെ അക്കൗണ്ട് തടഞ്ഞുവയ്ക്കാൻ ആവശ്യപ്പെട്ടിട്ടില്ലെന്നും പ്രശ്നം പരിഹരിക്കാൻ എക്സുമായി സഹകരിച്ച് പ്രവർത്തിക്കുന്നുണ്ടെന്നുമാണ് കേന്ദ്രം പ്രഖ്യാപിച്ചിരുന്നത്.

X, formerly known as Twitter, has alleged media censorship in India after the Centre ordered the blocking of 2,355 social media accounts, reportedly including those linked to Reuters and other outlets.