ലോർഡ്‌സ്: ഇന്ത്യക്കെതിരായ മൂന്നാം ടെസ്റ്റിൽ ഇംഗ്ലണ്ടിനായി സെഞ്ച്വറി നേടി ജോ റൂട്ട്. 199 പന്തിൽ 104 റൺസ് നേടിയാണ് റൂട്ട് തിളങ്ങിയായത്. 10 ഫോറുകൾ അടങ്ങുന്നതാണ് താരത്തിന്റെ ഇന്നിംഗ്സ്. തന്റെ ടെസ്റ്റ് കരിയറിലെ മുപ്പത്തി ഏഴാം സെഞ്ച്വറിയാണ് റൂട്ട് ലോർഡ്‌സിൽ നേടിയത്. ലോർഡ്‌സിൽ റൂട്ട് നേടുന്ന എട്ടാം സെഞ്ച്വറി ആണിത്. ഇതോടെ ടെസ്റ്റിൽ ഒരേ വേദോയിൽ ഏറ്റവും കൂടുതൽ സെഞ്ച്വറി നേടുന്ന താരങ്ങളുടെ പട്ടികയിൽ ഇടം നേടാനും റൂട്ടിന് സാധിച്ചു.

ഈ പട്ടികയിൽ നിലവിൽ മൂന്നാം സ്ഥാനത്താണ് റൂട്ട്. കൊളാബോയിൽ എട്ട് സെഞ്ച്വറികൾ നേടിയ മുൻ ശ്രീലങ്കൻ താരം കുമാർ സംഗക്കാരയുടെ നേട്ടത്തിനൊപ്പമാണ് റൂട്ട് ഉള്ളത്. ഡോൺ ബ്രാഡ്മാൻ, ജാക് കാലിസ് എന്നിവരാണ് രണ്ടാം സ്ഥാനത്തുള്ളത്. ഇരുവരും ഒമ്പത് തവണയാണ് ഒരേ വേദിയിൽ സെഞ്ച്വറികൾ നേടിയിട്ടുമുള്ളത്. ബ്രാഡ്മാൻ മെൽബണിലും കാലിസ് കേപ് ടൗണിലുമാണ് സെഞ്ച്വറികൾ നേടിയത്. മുൻ ലങ്കൻ താരം മഹേള ജയവർധനെയാണ്‌ പട്ടികയിലെ ഒന്നാമൻ. കൊളോമ്പോയിൽ 11 സെഞ്ച്വറികളാണ് ജയവർധനെ നേടിയത്. 

അതേസമയം ടെസ്റ്റിന്റെ ആദ്യ ദിനം അവസാനിച്ചപ്പോൾ ഇംഗ്ലണ്ട് ശക്തമായ നിലയിലാണ് ഉണ്ടായിരുന്നത്. ടോസ് നേടി ബാറ്റിംഗ് തിരഞ്ഞെടുത്ത ഇംഗ്ലണ്ട്, ഒന്നാം ദിനം അവസാനിക്കുമ്പോൾ 4 വിക്കറ്റ് നഷ്ടത്തിൽ 251 റൺസാണ് നേടിയിരുന്നത്. 

ഇംഗ്ലണ്ട് പ്ലെയിങ് ഇലവൻ

സാക്ക് ക്രാളി, ബെൻ ഡക്കറ്റ്, ഒല്ലി പോപ്പ്, ജോ റൂട്ട്, ഹാരി ബ്രൂക്ക്, ബെൻ സ്റ്റോക്സ്(ക്യാപ്റ്റൻ), ജാമി സ്മിത്ത്(വിക്കറ്റ് കീപ്പർ), ക്രിസ് വോക്സ്, ബ്രൈഡൺ കാർസ്, ജോഫ്ര ആർച്ചർ, ഷോയിബ് ബഷീർ

ഇന്ത്യ പ്ലെയിങ് ഇലവൻ 

യശസ്വി ജയ്സ്വാൾ, കെഎൽ രാഹുൽ, കരുണ് നായർ, ശുഭ്മാൻ ഗിൽ(ക്യാപ്റ്റൻ), ഋഷഭ് പന്ത്(വിക്കറ്റ് കീപ്പർ), നിതീഷ് കുമാർ റെഡ്ഡി, രവീന്ദ്ര ജഡേജ, വാഷിംഗ്ടൺ സുന്ദർ, ആകാശ് ദീപ്, ജസ്പ്രീത് ബുംറ, മുഹമ്മദ് സിറാജ്.

Joe Root Scored a Century Against India in Third Test