അരീക്കോട്: കിനാവിലെന്നും മക്കയായിരുന്നു, അടങ്ങാത്ത ആഗ്രഹമായിരുന്നു കഅ്ബ കാണാൻ. ഓരോ ദിവസവും വിയർപ്പൊഴുക്കി ഒരുവിഹിതം മാറ്റിവച്ചു, കിനാക്കുടുക്ക തുറക്കുന്ന ദിവസത്തിലേക്കുള്ള ദൂരം കുറയ്ക്കാൻ. ഒടുവിൽ പരിശുദ്ധ ഉംറ നിർവഹിക്കാൻ  ഭാര്യക്കും മക്കൾക്കുമൊപ്പം യാത്ര തിരിച്ച മുസ്തഫയെ കാത്തിരുന്നത് കറുത്ത ദിനങ്ങളായിരുന്നു. സഊദിയിൽ ജയിലിലായി. ഒരു തെറ്റും ചെയ്യാത്ത അയാൾ ചതിക്കപ്പെടുകയായിരുന്നു, ഉംറ ലക്ഷ്യം വച്ചുള്ള യാത്രയും ജയിൽ വാസവും വിവരിക്കുമ്പോൾ മുസ്തഫയുടെ കണ്ണുനിറഞ്ഞു. കണ്ഠമിടറി. 

ഉംറ കർമം പൂർത്തിയാക്കി 15 ദിവസത്തിനകം മടങ്ങിയെത്താൻ തീരുമാനിച്ചാണ് അരീക്കോട് വെള്ളേരി സ്വദേശി പാമ്പോടൻ മുസ്തഫ 2024 ജൂലൈ 24ന് കോഴിക്കോട് വിമാനത്താവളത്തിൽനിന്ന് യാത്ര തിരിച്ചത്. അഞ്ചുമാസത്തെ ജയിൽ വാസവും നിയമക്കുരുക്കും അഴിഞ്ഞ് ഒരു വർഷത്തിനു 10 ദിവസം ബാക്കി നിൽക്കെ ഞായറാഴ്ചയാണ് മുസ്തഫ വീടണഞ്ഞത്. സ്വകാര്യ ഗ്രൂപ്പിലായിരുന്നു യാത്ര. 

ബന്ധുവിൻ്റെ അയൽവാസി സുഹൃത്തിന് നൽകാനായി ഏൽപ്പിച്ച മരുന്ന് കൈവശം വച്ചതാണ് മുസ്തഫയ്ക്ക് വിനയായത്. യാത്രതിരിക്കുന്നതിൻ്റെ ഒരു ദിവസം മുമ്പാണ് അരിയും പത്തിരിപ്പൊടിയും ശർക്കരയും അടങ്ങിയ പായ്ക്കറ്റ് മുസ്തഫയ്ക്ക് ലഭിക്കുന്നത്. ഇതിൻ്റെ അകത്തായിരുന്നു വേദനസംഹാരി. 210 ഗുളികകളാണ് ഉണ്ടായിരുന്നത്. 

വിമാനം ഇറങ്ങിയപ്പോൾ സംശയം തോന്നിയ കസ്റ്റംസ് ഉദ്യോഗസ്ഥർ മുസ്തഫയെയും ഭാര്യയെയും മക്കളെയും പിടികൂടുകയായിരുന്നു. അളവിൽ കൂടുതൽ മരുന്നുകൾ ഇവരുടെ കൈവശം കണ്ടെത്തിയ കസ്റ്റംസ് അധികൃതർ ഡ്രഗ് കൺട്രോൾ വിഭാഗത്തിന് കൈമാറി. ഭാഷാ പ്രശ്നമുണ്ടായതിനാൽ കുറ്റം എന്തെന്ന് മുസ്തഫയ്ക്ക് മനസിലായില്ല. മക്കയിലെ ഷറായ ജയിലിലേക്ക് മാറ്റിയ ഇവരെ പിന്നീട് മലയാളി പരിഭാഷകന്റെ സഹായത്തോടെ അധികൃതർ നടത്തിയ ചോദ്യംചെയ്യലിലാണ് മരുന്ന് സുഹൃത്തിനുള്ളതാണെന്ന് വ്യക്തമാകുന്നത്. 

ഇതിനിടെ മരുന്ന് സ്വീകരിക്കേണ്ട സുഹൃത്തിനെയും പൊലിസ് പിടികൂടിയിരുന്നു. കുറ്റം കണ്ടെത്തിയതോടെ 15 ദിവസത്തിനു ശേഷം മുസ്തഫയെയും മരുന്ന് സ്വീകരിക്കേണ്ട സുഹൃത്തിനെയും ശുമൈസിയിലെ പ്രധാന ജയിലിലെ മയക്കുമരുന്ന് വിഭാഗം സെല്ലിലേക്ക് മാറ്റി. നാട്ടുകാരനും മക്കയിലെ ബിസിനസുകാരനുമായ സുബൈറിന്റെ ഇടപെടലിൽ ഭാര്യയെയും മക്കളെയും മക്ക ഷറായ ജയിലിലെ രണ്ട് ദിവസത്തെ വാസത്തിനു ശേഷം അധികൃതർ വിട്ടയച്ചു. ഇവർ പിന്നീട് ഉംറ കർമം പൂർത്തിയാക്കി നാട്ടിലേക്ക് മടങ്ങി. 

മുസ്തഫയ്ക്ക് ജയിലിൽ തുടരേണ്ടി വന്നു. നാലരമാസത്തെ ജയിൽ വാസത്തോടൊപ്പം നിയമനടപടികൾക്കു ശേഷമാണ് മുസ്തഫക്ക് തന്റെ നിരപരാധിത്വം തെളിയിക്കാനായത്. സുബൈറും സുഹൃത്തുക്കളുടെ സഹായമേകി. കൊണ്ടുപോയ മരുന്ന് സഊദിയിൽ നിരോധനമുള്ളതല്ലെങ്കിലും ലഹരി ഉപയോക്താക്കളും മറ്റും ഇത് ഉപയോഗിക്കാറുണ്ട്. അതിനാൽ സഊദിയിൽ നിന്നുള്ള ഡോക്ടർമാരുടെ അംഗീകൃത പ്രിസ്‌ക്രിപ്‌ഷൻ ഉണ്ടെങ്കിൽ മാത്രം നിയന്ത്രണ അളവിലേ ഇതു കൊണ്ടുവരാൻ അനുവാദമുള്ളൂ.  നിയമനടപടികൾക്കു ശേഷം ഉംറ കർമം പൂർത്തിയാക്കിയാണ് മുസ്തഫ നാട്ടിലേക്ക് മടങ്ങിയത്.