ഇംഗ്ലണ്ടിനെതിരായ അണ്ടർ 19 ഏകദിനത്തിന് പിന്നാലെ ടെസ്റ്റ് ക്രിക്കറ്റിലും ചരിത്രംക്കുറിച്ച് യുവതാരം വൈഭവ് സൂര്യവംശി. ഇത്തവണ ഓൾ റൗണ്ട് മികവ് കൊണ്ടാണ് താരം റെക്കോർഡിട്ടത്. ബാറ്റിങ്ങിൽ അർദ്ധ സെഞ്ച്വറിയും ബൗളിങ്ങിൽ രണ്ട് വിക്കറ്റുകളും നേടിയാണ് വൈഭവ് തിളങ്ങിയത്. ഇംഗ്ലണ്ട് ക്യാപ്റ്റൻ ഹംസ ഷെയ്ഖ്, തോമസ് റ്യു എന്നിവരെയാണ് വൈഭവ് പുറത്താക്കിയത്. ബാറ്റിങ്ങിൽ വൈഭവ് മത്സരത്തിന്റെ രണ്ടാം ഇന്നിങ്സിലാണ് അർദ്ധ സെഞ്ച്വറി നേടിയത്. 44 പന്തിൽ ഒമ്പത് ഫോറുകളും ഒരു സിക്‌സും ഉൾപ്പടെ 56 റൺസായിരുന്നു സൂര്യവംശി നേടിയത്. 

ഇതോടെ 15 വയസ്സ് പൂർത്തിയാകുന്നതിന് മുമ്പ് യൂത്ത് ടെസ്റ്റീൽ ഒരു മത്സരത്തിൽ അർദ്ധ സെഞ്ച്വറി നേടുകയും വിക്കറ്റ് നേടുകയും ചെയ്യുന്ന ചരിത്രത്തിലെ ആദ്യ താരമായാണ് സൂര്യവംശി മാറിയത്. ഇതിന് ഈ നേട്ടം കൈവരിക്കുന്ന ഏറ്റവും പ്രായം കുറഞ്ഞ താരം ബംഗ്ലാദേശ് താരം  മെഹിദി ഹസൻ മിറാസ് ആയിരുന്നു. 15 വയസ്സ്, 167 ദിവസം പ്രായമായിരുന്നു മിറാസ് ഈ റെക്കോർഡ് സ്വന്തമാക്കുമ്പോൾ ഉണ്ടായിരുന്നത്. 

ഇംഗ്ലണ്ടിനെതിരായ അണ്ടർ 19 ഏകദിന പരമ്പരയിലും മിന്നും പ്രകടനമാണ് വൈഭവ് സൂര്യവംശി നടത്തിയത്. അഞ്ചു മത്സരങ്ങളുടെ പരമ്പരയിൽ 355 റൺസാണ് വൈഭവ് നേടിയത്. ഒരു സെഞ്ച്വറിയും അർദ്ധ സെഞ്ച്വറിയും ആണ് താരം പരമ്പരയിൽ നേടിയത്. 71 എന്ന മികച്ച ആവറേജിലും 174.01 സ്ട്രൈക്ക് റേറ്റിലും ആണ് വൈഭവ് സൂര്യവംശി ബാറ്റ് വീശിയത്.

2025 ഐപിഎല്ലിൽ  രാജസ്ഥാൻ റോയൽസിനായി നടത്തിയ മിന്നും പ്രകടനങ്ങൾക്ക് പിന്നാലെയാണ് വൈഭവ് എന്ന പേര് ക്രിക്കറ്റ് ലോകത്തിൽ ചർച്ചയായത്. 2025 ഐപിഎല്ലിലെ സൂപ്പർ സ്ട്രൈക്കർ അവാർഡ് സ്വന്തമാക്കിയത് വൈഭവ് സൂര്യവംശിയായിരുന്നു. രാജസ്ഥനായി ഏഴ് മത്സരങ്ങളിൽ നിന്നും ഒരു സെഞ്ച്വറിയും ഒരു അർദ്ധ സെഞ്ച്വറിയും ഉൾപ്പെടെ 252 റൺസാണ് നേടിയത്.

അതേസമയം ഇംഗ്ലണ്ടിനെതിരായ ഈ ടെസ്റ്റ് മത്സരം സമനിലയിൽ പിരിഞ്ഞു. ആദ്യ ഇന്നിങ്സിൽ ബാറ്റ് ചെയ്ത ഇന്ത്യ 540 റൺസ് ആണ് നേടിയത്. രണ്ടാം ഇന്നിങ്സിൽ ഇംഗ്ലണ്ട് 439 റൺസിന് പുറത്താവുകയായിരുന്നു. രണ്ടാം ഇന്നിങ്സിൽ ഇന്ത്യ 228 റൺസിനും പുറത്തായി. രണ്ടാം ഇന്നിങ്സിൽ ഇംഗ്ലണ്ട് 270 റൺസിന്‌ ഏഴ് വിക്കറ്റുകൾ എന്ന നിലയിൽ നിൽക്കെ മത്സരം സമനിലയിൽ അവസാനിക്കുകയായിരുന്നു. നേരത്തെ ഇന്ത്യയ്ക്കുവേണ്ടി ആദ്യ ഇന്നിങ്സിൽ ക്യാപ്റ്റൻ ആയുഷ് മാത്രേ സെഞ്ച്വറി നേടി തിളങ്ങിയിരുന്നു 115 പന്തിൽ 102 റൺസ് ആണ് ആയുഷ് സ്വന്തമാക്കിയത്. 14 ഫോറുകളും രണ്ട് സിക്സുകളും അടങ്ങുന്നതാണ് താരത്തിന്റെ പ്രകടനം.

Youngster Vaibhav Suryavanshi also created history in Under-19 Test cricket against England. Vaibhav shone by taking two wickets and score Fifty against England. Vaibhav holds the record for being the youngest Indian to take a wicket and score fifty in a Youth Test.