കൊല്ലം: തേവലക്കര ബോയ്‌സ് ഹൈസ്‌കൂളില്‍ ഷോക്കേറ്റ് മരിച്ച മിഥുന്റെ മൃതദേഹം ശാസ്താംകോട്ടയിലെ വീട്ടിലെത്തിച്ചു. മകന്റെ മരണമറിഞ്ഞ് വിദേശത്തു നിന്ന് നാട്ടിലെത്തിയ സുജ പൊന്നോമനയുടെ മൃതദേഹം കണ്ട് പൊട്ടിക്കരഞ്ഞു. മകന്റെ ശവമഞ്ചത്തില്‍ പിടിച്ച് നിയന്ത്രണം വിട്ട് പൊട്ടിക്കരഞ്ഞ സുജയെ ആശ്വസിപ്പിക്കാന്‍ പ്രിയപ്പെട്ടവര്‍ ഏറെ പണിപ്പെട്ടു.

ALSO READ: നാടിന്റെ കണ്ണീർക്കടലിൽ മിഥുൻ; മൃതദേഹം സ്കൂളിൽ; അവസാനമായി ഒരുനോക്ക് കാണാൻ ആയിരങ്ങൾ, ഉള്ളുലഞ്ഞ് കുടുംബം

സ്‌കൂളില്‍ നടന്ന പൊതുദര്‍ശനത്തിന് ശേഷം, സഹപാഠികള്‍, അധ്യാപകര്‍, നാട്ടുകാര്‍ എന്നിവര്‍ ഉള്‍പ്പെടെ നൂറുകണക്കിന് ആളുകള്‍ വിലാപയാത്രയില്‍ പങ്കെടുത്ത് മിഥുന് അന്ത്യാഞ്ജലി അര്‍പ്പിച്ചു. വൈകിട്ട് 5 മണിക്ക് വീട്ടുവളപ്പില്‍ മിഥുന്റെ സംസ്‌കാര ചടങ്ങുകള്‍ നടക്കും.

ദേഹാസ്വാസ്ഥ്യം അനുഭവപ്പെട്ടതിനെ തുടര്‍ന്ന് ആശുപത്രിയില്‍ പ്രവേശിപ്പിച്ച മിഥുന്റെ പിതാവിന്റെ അമ്മ മണിയമ്മയെ വീട്ടിലേക്ക് മാറ്റിയിട്ടുണ്ട്. ശാസ്താംകോട്ട ആശുപത്രിയിലെ മോര്‍ച്ചറിയില്‍ സൂക്ഷിച്ചിരുന്ന മൃതദേഹം ഉച്ചയ്ക്ക് 12 മണിയോടെ സ്‌കൂളിലേക്ക് കൊണ്ടുവന്നിരുന്നു.

ALSO READ: ഉളളുലഞ്ഞ് അമ്മ സുജ നാട്ടിലെത്തി; മിഥുനെ അവസാനമായി കാണാൻ നാട്ടിലേക്ക്

മിഥുന്റെ അമ്മ സുജ, കുവൈത്തില്‍ നിന്ന് ഇന്‍ഡിഗോ വിമാനത്തില്‍ രാവിലെയാണ് കൊച്ചി വിമാനത്താവളത്തില്‍ എത്തിയത്. ബന്ധുക്കളും ഇളയ മകനും സുജയെ സ്വീകരിക്കാന്‍ വിമാനത്താവളത്തില്‍ ഉണ്ടായിരുന്നു.