കൊച്ചി: കൊല്ലം തേവലക്കര ബോയ്സ് ഹൈസ്കൂളിൽ വൈദ്യുതാഘാതമേറ്റ് മരിച്ച എട്ടാം ക്ലാസ് വിദ്യാർത്ഥി മിഥുൻ്റെ അമ്മ സുജ കൊച്ചി വിമാനത്താവളത്തിൽ എത്തി. അടുത്ത ബന്ധുക്കൾ അവരെ സ്വീകരിക്കാൻ വിമാനത്താവളത്തിൽ കാത്തുനിന്നു. അവിടെ നടന്നത് ഹൃദയഭേദകമായ രംഗങ്ങളായിരുന്നു. ഇളയ മകനെ കെട്ടിപ്പിടിച്ച് സുജ കണ്ണീർ പൊഴിച്ചു. തകർന്ന മനസോടെ എത്തിയ സുജയെ വഹിച്ച വാഹനം പൊലീസ് അകമ്പടിയോടെ കൊല്ലത്തെ വീട്ടിലേക്ക് യാത്ര തിരിച്ചു.

മിഥുൻ ഫുട്ബോൾ കളിക്കാരനാകണമെന്നും സൈന്യത്തിൽ ചേരണമെന്നും സ്വപ്നം കണ്ട മിടുക്കനായ വിദ്യാർത്ഥിയായിരുന്നു. എന്നാൽ, കഴിഞ്ഞ ദിവസം തേവലക്കര സ്കൂളിലെ അധികൃതരുടെ അനാസ്ഥ മൂലം ദാരുണമായി ജീവൻ നഷ്ടപ്പെട്ടു. അതിദരിദ്രമായ കുടുംബത്തിൽ നിന്ന് മോചനം തേടി സുജ വിദേശത്ത് വീട്ടുജോലിക്ക് പോയിരുന്നു. തുർക്കിയിൽ വിനോദയാത്രയ്ക്ക് പോയ സമയത്താണ് മകന്റെ അപ്രതീക്ഷിത മരണവാർത്ത അവരെ തേടിയെത്തിയത്.

സ്കൂളിലെ സൈക്കിൾ ഷെഡിന് മുകളിൽ വീണ സഹപാഠിയുടെ ചെരിപ്പെടുക്കാൻ മിഥുൻ കയറിയപ്പോൾ, തെന്നിവീഴാൻ പോയ സമയത്ത് അബദ്ധത്തിൽ താഴ്ന്നുകിടന്ന വൈദ്യുതി കമ്പിയിൽ പിടിച്ച് ഷോക്കേറ്റാണ് മരിച്ചത്. ഇന്ന് രാവിലെ 10 മണി മുതൽ സ്കൂളിൽ മിഥുൻ്റെ മൃതദേഹം പൊതുദർശനത്തിന് വെക്കും. വൈകിട്ട് 5 മണിയോടെ സംസ്കാരം നടക്കും.

Suja, mother of 13-year-old Mithun, who died from electrocution at Thevalakkara Boys High School in Kollam, returned from Turkey to Kochi airport. Overwhelmed with grief, she was met by relatives and escorted home by police for her son’s funeral. Mithun, a Class 8 student, died after touching a live wire while retrieving a slipper from a school shed. His body will be available for public viewing at the school from 10 am, with the funeral at 5 pm. The incident has sparked outrage, leading to the headmistress’s suspension.