കൊച്ചി: വിടവാങ്ങിയ സമരനായകൻ മുൻ മുഖ്യമന്ത്രി വി.എസ് അച്യൂതാനന്ദന് അന്ത്യവിശ്രമം ഒരുക്കുന്നത് സമര സഖാകൾക്കൊപ്പം തന്റെ പ്രിയ രാഷ്ട്രീയഗുരു പി.കൃഷ്ണപിള്ളയെ അടക്കം ചെയ്ത വിപ്ലവ മണ്ണിൽ. കേരള സംസ്ഥാനം രൂപീകൃതമാവുകയും ചെയ്യും മുൻപേ കമ്മ്യൂണിസ്റ്റ് പാർട്ടിയുടെ നേതൃതലങ്ങളിലെത്തിയ വി.എസിനെ രാഷ്ട്രീയത്തിലേക്ക് കൈപിടിച്ചുയർത്തിയത് ജനകീയ നേതാവായിരുന്ന പി.കൃഷ്ണപിള്ളയായിരുന്നു. പി. കൃഷ്ണ പിള്ളയുടെ പാത പിൻതുടർന്ന് പോരാട്ടത്തിന്റെ പുതുവഴികളിൽ നടന്ന അച്യുതാനന്ദനും ജനകീയനായി.  

അവഗണനയും കഷ്ടപ്പാടും നേരിട്ട വിദ്യാലയ ജീവിതകാലഘട്ടത്തിൽ തുടങ്ങിയതാണ് വി.എസിന്റെ പോരാട്ടം. സ്വാതന്ത്ര സമരത്തിലും ആലപ്പുഴയിലെ കർഷകതൊഴിലാളികളുടെ അവകാശ സമരങ്ങളിലും പങ്കെടുത്ത അച്യുതാനന്ദൻ സർ സി.പി. രാമസ്വാമി അയ്യരുടെ പൊലിസിനെതിരെ പുന്നപ്രയിൽ സംഘടിപ്പിച്ച തൊഴിലാളി ക്യാംപിന്റെ മുഖ്യ ചുമതലക്കാരനായിരുന്നു. 1122  തുലാം ഏഴിലെ സമരം കേരളത്തിലെ കമ്മ്യൂണിസ്റ്റ് പാർട്ടിയുടെ വളർച്ചയിലെ പ്രധാനഘടകമായിരുന്നു. 

 

 

പുന്നപ്ര വയലാർ സമരത്തിന്റെ നായകത്വം വഹിച്ച വി.എസിനെ  സംസ്‌കരിക്കുന്നത് രാജവാഴ്ചയ്‌ക്കെതിരേ പോരാടിയ രണഭൂമിയിൽ. പുന്നപ്ര - വയലാർ രക്തസാക്ഷികളെയും പ്രമുഖ കമ്മ്യൂണിസ്റ്റ് നേതാക്കളെയും സംസ്‌കരിച്ച ആലപ്പുഴയിലെ വലിയ ചുടുകാടിലാണ്. പി.കൃഷ്ണപിള്ള കൂടാതെ ആർ സുഗതൻ, പി.ടി പൂന്നൂസ്,  ജോർജ് ചടയംമുറി, ടി.വി തോമസ്, പി.കെ പത്മനാഭൻ, ടി.വി രമേശ് ചന്ദ്രൻ, സി.ജി സദാശിവൻ, എം.എൻ ഗോവിന്ദൻ നായർ, എസ് കുമാരൻ,വി.കെ വിശ്വനാഥൻ,  കെ.സി ജോർജ്, കെ.ആർ ശ്രീധരൻ, എം.കെ സുകുമാരൻ, സി.കെ വേലായുധൻ, കെ.കെ കുഞ്ഞൻ, വി.എ സൈമൺ ആശാൻ, എ.കെ ശ്രീധരൻ, പി.എ ജോർജ്, സി.കെ കേശവൻ, പി.കെ മാധവൻ, വി.കെ കരുണാകരൻ, ഇ വാസുദേവൻ, എം.ടി ചന്ദ്രസേനൻ,  വി.കെ കുഞ്ഞുപണിക്കർ, സി.കെ ചന്ദ്രപ്പൻ,  കെ.സി മാത്യു, എൻ.കെ ഗോപാലൻ, പി.കെ ചന്ദ്രാനന്ദൻ തുടങ്ങിയ കമ്മ്യൂണിസ്റ്റ് പാർട്ടിയുടെ മഹാരഥന്മാരാണ്  ഇവിടെ അന്ത്യവിശ്രമം കൊള്ളുന്നത്. 

ഏറ്റവും അവസാനം ഇവിടെ സംസ്‌കരിക്കപ്പെട്ടത് കമ്മ്യൂണിസ്റ്റ് പാർട്ടിയിൽ നിന്ന് ഔദ്യോഗികമായി പുറത്തുപോയെങ്കിലും അന്ത്യനാളിൽ ഇടതുമുന്നണിക്കൊപ്പം ചേർന്ന കെ.ആർ ഗൗരിയമ്മയെയാണ്. പുന്നപ്ര സമരത്തിൽ രക്തസാക്ഷികളായവരെ അടക്കം ചെയ്ത വലിയ ചുടുകാടിലെ രക്തസാക്ഷി മണ്ഡലം 1133 തുലാം ഏഴിന് ആർ സുഗതൻ ശിലാസ്ഥാപനം നടത്തുകയും 1148 തുലാം ആറിന് ടി.വി തോമസ് ഉദ്ഘാടനം ചെയ്യുകയുമായിരുന്നു. പിന്നീട് കമ്മ്യൂണിസ്റ്റ് പാർട്ടി രണ്ടായി പിന്നീട് പിളർന്നെങ്കിലും രക്തസാക്ഷി മണ്ഡപത്തിന്റെ പരിപാലനം ഇരുപാർട്ടികളും സംയുക്തമായിട്ടാണ് നടത്തുന്നത്. കമ്മ്യൂണിസ്റ്റ് നേതാക്കളെ സംബന്ധിച്ചട്ത്തോളം ഏറ്റവും പ്രധാനഭൂമിയായ ഇവിടെ അന്ത്യവിശ്രമം ഒരുങ്ങുകയെന്നത് വലിയ ആഗ്രഹമാണ്. ഇരു കമ്മ്യൂണിസ്റ്റ് പാർട്ടികളുടെയും മന്ത്രിമാരുടെ സത്യപ്രതിജ്ഞ ഉൾപ്പെടെ പ്രധാന പരിപാടികൾക്ക് തുടക്കം കുറിക്കുന്നതും ഇവിടെ നിന്നാണ്.