ന്യൂഡൽഹി: നിയമസഭകൾ പാസാക്കുന്ന ബില്ലുകളിൽ തീരുമാനമെടുക്കാൻ രാഷ്ട്രപതിക്കും ഗവർണർമാർക്കും സമയപരിധി നിശ്ചയിച്ച സുപ്രിംകോടതി വിധിയുടെ പശ്ചാത്തലത്തിൽ രാഷ്ട്രപതി ഭവൻ നൽകിയ റഫറൻസിൽ കേന്ദ്രത്തിനും സംസ്ഥാനങ്ങൾക്കും നോട്ടിസ്. 

രാഷ്ട്രപതിക്ക് സമയപരിധി ഏർപ്പെടുത്താനും ഗവർണർമാരുടെ പെരുമാറ്റത്തിന് മാർഗനിർദേശങ്ങൾ നൽകാനും കഴിയുമോ എന്നതിൽ വ്യക്തത തേടിയാണ് നോട്ടിസ്്. ജസ്റ്റിസ് ബി.ആർ ഗവായ് അധ്യക്ഷനായ അഞ്ചംഗ ബെഞ്ചാണ് റഫറൻസ് പരിഗണിക്കുന്നത്. ജസ്റ്റിസുമാരായ സൂര്യകാന്ത്, വിക്രംനാഥ്, പി.എസ് നരസിംഹ, എ.എസ് ചന്ദുർകർ എന്നിവരാണ് ബെഞ്ചിലെ മറ്റംഗങ്ങൾ.

റഫറൻസിനു നിലനിൽപ്പില്ലെന്ന് ഇന്നലെ കേസ് പരിഗണിച്ചയുടൻ കേരളത്തിനു വേണ്ടി ഹാജരായ മുതിർന്ന അഭിഭാഷകൻ കെ.കെ വേണുഗോപാലും തമിഴ്നാടിനു വേണ്ടി ഹാജരായ മുതിർന്ന അഭിഭാഷകൻ പി. വിൽസണും വാദിച്ചു. റഫറൻസിന്റെ നിലനിൽപ്പു സംബന്ധിച്ച് സംസ്ഥാനം നിലപാട് വ്യക്തമാക്കുമെന്ന് കേരളം അറിയിച്ചു. റഫറൻസിലെ പ്രശ്നങ്ങൾ ഇതിനകം തന്നെ തമിഴ്നാട് ഗവർണറുടെ കേസിലെ വിധിയിൽ ഉൾപ്പെട്ടിട്ടുണ്ടെന്ന് തമിഴ്നാട് ചൂണ്ടിക്കാട്ടി.

കേസിൽ അറ്റോർണി ജനറൽ ആർ. വെങ്കിട്ടരമണിയോട് കോടതിയെ സഹായിക്കാനും ബെഞ്ച് അഭ്യർഥിച്ചു. സോളിസിറ്റർ ജനറൽ തുഷാർ മേത്തയാണ് കേസിൽ കേന്ദ്രത്തിനു വേണ്ടി ഹാജരാകുക. 29ന് വീണ്ടും കേസ് പരിഗണിക്കും.

കേന്ദ്രസർക്കാരും ഡി.എം.കെ ഭരിക്കുന്ന തമിഴ്നാടും തമ്മിലുള്ള ഏറ്റുമുട്ടലുമായി ബന്ധപ്പെട്ട കേസ് പരിഗണിക്കവെയാണ്, രാഷ്ട്രപതിക്കും ഗവർണർക്കും സുപ്രിംകോടതി മൂന്ന് മാസത്തെ സമയപരിധി നിശ്ചയിച്ച് ഉത്തരവിറക്കിയത്. സമയപരിധി ലംഘിച്ചാൽ സംസ്ഥാന സർക്കാരിനു കോടതിയെ സമീപിക്കാമെന്നും കോടതി വിധിച്ചിരുന്നു. ഈ വിധിക്കെതിരെ ഭരണഘടനയുടെ 143 (1) വകുപ്പനുസരിച്ചാണ് രാഷ്ട്രപതി റഫറൻസ് നൽകിയത്. ഭരണഘടനയുടെ 200, 201 വകുപ്പുകൾ പ്രകാരം നിയമസഭകൾ പാസാക്കുന്ന ബില്ലുകളിൽ തീരുമാനം എടുക്കാൻ സമയപരിധിയില്ലെന്നു സുപ്രിംകോടതിക്കു കൈമാറിയ റഫറൻസിൽ രാഷ്ട്രപതി ചൂണ്ടിക്കാട്ടിയിട്ടുണ്ട്. ഇതുൾപ്പെടെ 14 കാര്യങ്ങളിലാണ് രാഷ്ട്രപതി വ്യക്തത തേടിയത്.

In the context of the Supreme Court ruling that set a time limit for the President and Governors to decide on Bills passed by State Legislatures, the apex court has issued notices to the Central Government and State Governments on a reference made by the Rashtrapati Bhavan (President’s Office).