ബാസിത് ഹസൻ 

തൊടുപുഴ: അനധികൃത വൈദ്യുതി വേലികളിൽ നിന്നും ഷോക്കേറ്റ് സംസ്ഥാനത്ത് കഴിഞ്ഞ അഞ്ചര വർഷത്തിനിടെ മരണപ്പെട്ടത് 91 പേർ. ഇതിൽ 83 പുരുഷന്മാരും 6 സ്ത്രീകളും 2 കുട്ടികളും ഉൾപ്പെടും. ഇക്കാലയളവിൽ 17 മൃഗങ്ങളും അനധികൃത വൈദ്യുതി വേലിയിൽ നിന്നും ഷോക്കേറ്റ് ചത്തു. 

വിവരാവകാശ നിയമപ്രകാരം ചീഫ് ഇലക്ട്രിക്കൽ ഇൻസ്പ്‌ക്ട്രേറ്റിൽ നിന്നും ലഭിച്ച മറുപടിയിലാണ് അനധികൃത വൈദ്യുതി വേലികൾ ജീവനെടുക്കുന്ന കണക്ക് ലഭിച്ചത്. പാലക്കാട് ജില്ലയിലാണ് കൂടുതൽ മരണം റിപ്പോർട്ട് ചെയ്തിരിക്കുന്നത്, 32. ഇതിൽ നാല് സ്ത്രീകളാണ്. കോട്ടയം, എറണാകുളം, കോഴിക്കോട്, കാസർകോട് ജില്ലകളിൽ ഇത്തരം മരണങ്ങൾ റിപ്പോർട്ട് ചെയ്തിട്ടില്ല. മറ്റ് ജില്ലകളിൽ അനധികൃത വൈദ്യുതി വേലികളിൽ നിന്നും ഷോക്കേറ്റ് മരണപ്പെട്ടവരുടെ കണക്ക് ഇങ്ങനെയാണ്. തിരുവനന്തപുരം 10, കൊല്ലം 3, ആലപ്പുഴ 2, ഇടുക്കി 6, പത്തനംതിട്ട 4, തൃശൂർ 9, മലപ്പുറം 16, വയനാട് 7, കണ്ണൂർ 2.

വന്യജീവി ആക്രമണങ്ങളിൽ നിന്ന് കൃഷിയിടത്തെ രക്ഷിക്കാനെന്ന പേരിലാണ് കർഷകർ അനധികൃത വൈദ്യുതി വേലികൾ സ്ഥാപിക്കുന്നത്. പലപ്പോഴും കെ.എസ്.ഇ.ബിയുടെ വൈദ്യുതി ലൈനിൽ നിന്ന് അനധികൃതമായി വൈദ്യുതി മോഷ്ടിച്ചോ വീട്ടിലെ കണക്ഷനിൽ നിന്നോ വേലികളിലേക്ക് വൈദ്യുതി കടത്തിവിടുന്നതാണ് അപകടത്തിൽ കലാശിക്കുന്നത്. വൈദ്യുത വേലികൾ സ്ഥാപിക്കുന്നതിന് ഇലക്ട്രിക്കൽ ഇൻസ്‌പെക്ടറേറ്റിൽ നിന്നുള്ള പ്രത്യേക അനുമതി ആവശ്യമാണ്. ഒരു കാരണവശാലും കെ.എസ്.ഇ ബി ലൈനിൽ നിന്നുള്ള വൈദ്യുതി നേരിട്ടോ അല്ലാതെയോ ഇത്തരം വേലികളിലേക്ക് പ്രവഹിപ്പിക്കാൻ പാടില്ല. ഇംപൾസ് ജനറേറ്റർ ഉള്ള, ബാറ്ററി ഉപയോഗിച്ച് പ്രവർത്തിക്കുന്ന ഇലക്ട്രിക് ഫെൻസ് എനർജൈസേഴ്‌സ് മാത്രമേ ഉപയോഗിക്കാവൂ. വൈദ്യുത വേലികൾക്കുവേണ്ടി അനധികൃതമായി വൈദ്യുതി ഉപയോഗിക്കുന്നത് 2003ലെ ഇലക്ട്രിസിറ്റി നിയമം, ഭാഗം 14 വകുപ്പ് 135 (1) പ്രകാരം നിയമവിരുദ്ധവും 3 വർഷം വരെ തടവും പിഴയുമോ, രണ്ടും കൂടിയോ ചുമത്താവുന്ന ക്രിമിനൽ കുറ്റവുമാണ്. 

ALSO READ: പ്രതിഷേധത്തെത്തുടര്‍ന്ന് ദിവസവും 10 മണിക്കൂര്‍ ആക്രമണം നിര്‍ത്താന്‍ തീരുമാനിച്ച് ഇസ്‌റാഈല്‍; പിന്നാലെ ഗസ്സയിലേക്ക് സഹായമെത്തിച്ച് യുഎഇയും ജോര്‍ദാനും | Israel War on Gaza Live 

ലൈസൻസ് ഉള്ളവരും പ്രവൃത്തി പരിചയമുള്ളതുമായ വ്യക്തികൾ നിർമിക്കുന്ന വൈദ്യുതി വേലി മാത്രമേ ഉപയോഗിക്കാവൂ. ബാറ്ററിയിൽ നിന്നുള്ള വൈദ്യുതിയിൽ മാത്രം പ്രവർത്തിക്കുന്നതും അംഗീകൃത നിലവാരമുള്ളതുമായ ഇലക്ട്രിക് ഫെൻസ് എനർജൈസർ എന്ന ഉപകരണം സ്ഥാപിച്ച് ജില്ലാ ഇലക്ട്രിക്കൽ ഇൻസ്‌പെക്ടറുടെ അംഗീകാരം നേടിയ ശേഷം മാത്രമേ പ്രവർത്തിപ്പിക്കാൻ അനുവാദമുള്ളൂ. കെ.എസ്.ഇ.ബി കണക്ഷനുകളിൽ നിന്നാണ് ബാറ്ററി  ചാർജർ പ്രവർത്തിക്കുന്നതെങ്കിൽ ബന്ധപ്പെട്ട സെക്ഷൻ ഓഫിസിൽ നിന്നും അനുമതി വാങ്ങണം. മൃഗങ്ങൾ കുടുങ്ങിക്കിടക്കാത്ത വിധം ശാസ്ത്രീയമായി നിർമിച്ച വേലിയിൽ പല ഭാഗങ്ങളിലായി മുന്നറിയിപ്പ് ബോർഡുകൾ സ്ഥാപിക്കണമെന്നും നിർദേശമുണ്ട്.