മഞ്ചേരി: അന്ത്യയാത്രയ്ക്കൊരുങ്ങി മോർച്ചറിയിൽ തണുപ്പേറ്റ് ജോയ് കിടന്നത് 12 ദിവസം. ഒടുവിൽ 'അജ്ഞാത' മൃതദേഹം സംസ്കരിക്കാൻ കോഴിക്കോട് വെസ്റ്റ്ഹിൽ ശ്‌മശാനത്തിൽ കുഴിമാടവും തയാറാക്കി. ആറടി മണ്ണിലേക്ക് മടങ്ങാനിരിക്കെ ജോയിയെ തേടി നീലഗിരിയിൽനിന്ന് ബന്ധുക്കൾ മഞ്ചേരി മെഡിക്കൽ കോളജിലെത്തി. മൂന്നര പതിറ്റാണ്ട് മുമ്പ് 'അനാഥനായ' ജോയി അങ്ങനെ സനാഥനായി അന്ത്യയാത്ര തിരിച്ചു. 
37 വർഷങ്ങൾക്ക് മുമ്പ് വീടുവിട്ടിറങ്ങിയതാണ് നീലഗിരി പന്തല്ലൂർ താലൂക്ക് കയ്യൂന്നി കടക്കോട്ടിൽ ജോയ് (72). സഹോദരൻ വർഗീസിന് 15 വയസ് പ്രായമുള്ളപ്പോഴാണ് ജോയ് വീടുവിട്ടിറങ്ങിയത്. 

തിരയാനൊരു ഇടവും ബാക്കിവയ്ക്കാതെ കുടുംബം അന്വേഷിച്ചു. ജോയിയുടെ പിതാവും മാതാവും മരിച്ചപ്പോൾ അന്വേഷണം ഊർജിതമാക്കി. ഒടുവിൽ കഴിഞ്ഞ ഫെബ്രുവരിയിൽ മകനും വിടപറഞ്ഞപ്പോൾ ജോയിയെ കണ്ടുകിട്ടാൻ കുടുംബം തേടാത്ത മാർഗമില്ല. ഒരുനാൾ ചേട്ടൻ വരുമെന്ന പ്രതീക്ഷയിലായിരുന്നു വർഗീസും കുടുംബവും. അത് ആറടി മണ്ണിലേക്ക് മടങ്ങുന്നതിന്റെ മണിക്കൂറുകൾക്ക് മുമ്പാകുമെന്ന് കരുതിയില്ലെന്ന് വർഗീസ് പറഞ്ഞു.

കഴിഞ്ഞ 12ന് ആയിരുന്നു ജോയിയെ മഞ്ചേരി മെഡിക്കൽ കോളജ് ആശുപത്രിയിൽ പ്രവേശിപ്പിച്ചത്. വണ്ടൂരിൽ അവശനിലയിൽ കണ്ട ഇയാളെ പൊലിസ് നിലമ്പൂർ ജില്ലാ ആശുപത്രിയിലാണ് ആദ്യം എത്തിച്ചത്. അവിടെനിന്ന് മഞ്ചേരി മെഡിക്കൽ കോളജിലേക്ക് മാറ്റി. പിറ്റേ ദിവസം മരിച്ചു. ബന്ധുക്കൾ അന്വേഷിച്ചെത്തുമെന്ന് കരുതി മൃതദേഹം മോർച്ചറിയിൽ സൂക്ഷിച്ചു. വണ്ടൂർ ഇൻസ്പെക്‌ടർ എം.ആർ സജിയുടെ നേതൃത്വത്തിലായിരുന്നു അന്വേഷണം.

12 ദിവസമായിട്ടും ആരും എത്താത്തതിനാൽ പൊലിസിനെ അറിയിച്ചു. വണ്ടൂർ പഞ്ചായത്ത് ഹെൽത്ത് ഇൻസ്പെക്ടറുടെ നേതൃത്വത്തിൽ 22ന് മൃതദേഹം ഏറ്റുവാങ്ങി സംസ്‌കരിക്കാനെത്തി. കോഴിക്കോട് വെസ്റ്റ്ഹിൽ ശ്‌മശാനത്തിലേക്ക് അയയ്ക്കാൻ നടപടി തുടങ്ങി. പൊലിസ് ആശുപത്രിയിൽ പ്രവേശിപ്പിച്ച മൃതദേഹം വിട്ടുനൽകാൻ പൊലിസിൻ്റെ കത്ത് വേണമെന്ന് ആശുപത്രി അധികൃതർ പറഞ്ഞു. 

കത്ത് ഇല്ലാത്തതിനാൽ സംഘം തിരിച്ചുപോയി. പിറ്റേദിവസം സംസ്കരിക്കാൻ പൊലിസിൻ്റെ കത്തുമായി വന്നു. ഇതിനിടെ വണ്ടൂർ സ്റ്റേഷൻ ഇൻസ്പെക്ടർ, ജോയ് ആദ്യം താമസിച്ച കെട്ടിട ഉടമയെ ബന്ധപ്പെട്ട് ഇയാൾ ചേരമ്പാടി സ്വദേശിയാണെന്നു കണ്ടെത്തി. 

ചേരമ്പാടിയിലെ വാട്‌സ്ആപ് ഗ്രൂപ്പിൽ വന്ന ജോയിയുടെ ചിത്രം സഹോദരൻ വർഗീസ് തിരിച്ചറിഞ്ഞു. മറ്റു സഹോദരങ്ങളായ മാണി, മോളി, മാണിയുടെ മകൻ കണ്ണൻ എന്നിവർക്കൊപ്പം വർഗീസ് മഞ്ചേരി മെഡിക്കൽ കോളജ് ആശുപത്രിയിലെത്തി. വണ്ടൂർ പൊലിസും സാമൂഹിക പ്രവർത്തകൻ ഹമീദ് കൊടവണ്ടിയും മൃതദേഹം നാട്ടിലെത്തിക്കാൻ സഹായം നൽകി. എല്ലാവരുടെയും സാന്നിധ്യത്തിൽ ജോയിയെ കയ്യൂന്നി ഫാത്തിമ മാത ദേവാലയത്തിൽ സംസ്കരിച്ചു.