ന്യൂഡല്‍ഹി: കന്യാസ്ത്രീകള്‍ അറസ്റ്റ് ചെയ്യപ്പെട്ട  ഇന്‍ഡ്യാ സഖ്യ എം.പിമാര്‍ ഛത്തീസ്ഗഡില്‍. ബെന്നി ബഹനാന്‍, എന്‍ കെ പ്രേമചന്ദ്രന്‍, ഫ്രാന്‍സിസ് ജോര്‍ജ്, സപ്ത ഗിരി തുടങ്ങിയ പ്രതിപക്ഷ എം.പിമാരാണ് ഛത്തിസ്ഗഡിലെത്തിയത്.  ബൃന്ദാ കാരാട്ടിന്റെ നേതൃത്വത്തിലുള്ള സംഘവും ഛത്തീസ്ഗഡിലേക്ക് യാത്ര തിരിക്കുന്നുണ്ട്. ജയിലിലുള്ള കന്യാസ്ത്രീകളെ സംഘം സന്ദര്‍ശിക്കും.

അതേസമയം, ഛത്തീസ്ഗഡില്‍ പെണ്‍കുട്ടികളെ കന്യാസ്ത്രീകള്‍ക്കൊപ്പമയക്കാന്‍ രക്ഷിതാക്കള്‍ നല്‍കിയ സമ്മതപത്രം ലഭിച്ചതായി മീഡിയ വണ്‍ റിപ്പോര്‍ട്ട് ചെയ്യുന്നു. ഗാര്‍ഹിക ജോലികള്‍ക്കായി മക്കളെ പറഞ്ഞയക്കുന്നതില്‍ സമ്മതം അറിയിച്ചുള്ള രേഖയില്‍ രക്ഷിതാക്കള്‍ ഒപ്പുവെക്കുകയും ചെയ്തിട്ടുണ്ട്.

ALSO READ: അറസ്റ്റിലായ മലയാളി കന്യാസ്ത്രീകള്‍ക്കെതിരെ ചുമത്തിയത് പത്തു വര്‍ഷം വരെ തടവ് ശിക്ഷ ലഭിക്കാവുന്ന വകുപ്പുകള്‍

വെള്ളിയാഴ്ചയാണ് സിറോ മലബാര്‍ സഭയുടെ കീഴില്‍ ആലപ്പുഴ ചേര്‍ത്തല ആസ്ഥാനമായ അസീസി സിസ്റ്റേഴ്‌സ് ഓഫ് മേരി ഇമ്മാക്യുലേറ്റ് (ഗ്രീന്‍ ഗാര്‍ഡന്‍സ്) സന്ന്യാസസഭയിലെ സിസ്റ്റര്‍മാരായ വന്ദന മേരി, പ്രീതി ഫ്രാന്‍സിസ് എന്നിവരെ അറസ്റ്റ് ചെയ്തത്. മനുഷ്യക്കടത്ത് ആരോപിച്ചായിരുന്നു അറസ്റ്റ്. പിന്നീട് ഇവരെ റിമാന്‍ഡ് ചെയ്തു. ബജ്രംഗ്ദള്‍ പ്രവര്‍ത്തകര്‍ നല്‍കിയ പരാതിയുടെ അടിസ്ഥാനത്തിലായിരുന്നു നടപടി.

രക്ഷിതാക്കള്‍ ഒപ്പുവെച്ച രേഖ കയ്യില്‍ ഉണ്ടായിട്ടും കന്യാസ്ത്രീകളെയും കുട്ടികളെയും യാത്ര ചെയ്യാന്‍ അനുവദിക്കാതിരിക്കുകയും ബജരംഗദള്‍ പ്രവര്‍ത്തകര്‍ തടഞ്ഞു വെക്കുകയുമായിരുന്നു. സിസ്റ്റര്‍ പ്രീതി മേരിയെ ഒന്നാം പ്രതിയായും സിസ്റ്റര്‍ വന്ദന ഫ്രാന്‍സിസിനെ രണ്ടാം പ്രതിയായും ചേര്‍ത്താണ് കേസെടുത്തിരിക്കുന്നത്.

നാരായന്‍പുര്‍ ജില്ലയില്‍ നിന്നുള്ള മൂന്ന് പെണ്‍കുട്ടികളോടൊപ്പമായിരുന്നു കന്യാസ്ത്രീകള്‍ സഞ്ചരിച്ചിരുന്നത്. 19 മുതല്‍ 22 പ്രായമുള്ളവരായിരുന്നു ഇവര്‍.എന്നാല്‍ റെയില്‍വേ സ്റ്റേഷനിലെത്തിയ ബജ്‌റംഗ്ദള്‍ പ്രവര്‍ത്തകര്‍നിര്‍ബന്ധിത മതപരിവര്‍ത്തനവും മനുഷ്യക്കടത്തും നടത്തുകയാണെന്ന് ആരോപിക്കുകയായിരുന്നു. കന്യാസ്ത്രീകളെ തടഞ്ഞുവക്കുകയും ചെയ്തു.

കന്യാസ്ത്രീകള്‍ നടത്തുന്ന ആശുപത്രിയില്‍ ജോലിക്ക് പോവുകയാണെന്ന് പെണ്‍കുട്ടികള്‍ പറഞ്ഞു. മൂവരുടെയും രക്ഷിതാക്കള്‍ ജോലിക്ക് പോവാന്‍ നല്‍കിയ അനുമതി പത്രവും തിരിച്ചറിയല്‍ കാര്‍ഡുകളും പെണ്‍കുട്ടികള്‍ ഹാജരാക്കി. തങ്ങള്‍ നേരത്തെ തന്നെ ക്രൈസ്തവരാണെന്നും പെണ്‍കുട്ടികള്‍ വ്യക്തമാക്കിയിരുന്നു. എന്നാല്‍ ഇക്കാര്യം അംഗീകരിക്കാതിരുന്ന പൊലിസ് ഇരുവരെയും കസ്റ്റഡിയില്‍ എടുക്കുകയായിരുന്നു.

കന്യാസ്ത്രീകള്‍ക്കെതിരെ ഗുരുതര വകുപ്പുകളാണ് ചുമത്തിയതെന്നാണ് റിപ്പോര്‍ട്ട്. 10 വര്‍ഷം വരെ തടവുശിക്ഷ ലഭിക്കാവുന്ന മനുഷ്യക്കടത്ത്, മതപരിവര്‍ത്തന കുറ്റം എന്നിവയാണ് ഇവര്‍ക്കെതിരെ എഫ്.ഐ.ആറിലുള്ളതെന്നാണ് റിപ്പോര്‍ട്ടുകള്‍ പറയുന്നത്. 

Indian Opposition MPs, including Benny Behanan and NK Premachandran, visit Chhattisgarh following the arrest of two Kerala-based nuns accused of human trafficking and religious conversion. Despite parental consent documents, the nuns were remanded based on a Bajrang Dal complaint.