ഇന്ത്യൻ വാഹന വിപണിയിൽ തിളക്കമാർന്ന പ്രകടനവുമായി ജാപ്പനീസ് വാഹന നിർമാതാക്കളായ ടൊയോട്ട. 2025 ജൂലൈയിൽ 32,575 വാഹനങ്ങൾ വിറ്റഴിച്ച് കമ്പനി ശക്തമായ വളർച്ച രേഖപ്പെടുത്തി. ആഭ്യന്തര വിപണിയിൽ 29,159 യൂണിറ്റുകളും വിദേശ വിപണിയിലേക്ക് 3,416 യൂണിറ്റുകളും കയറ്റുമതി ചെയ്താണ് ഈ നേട്ടം കൈവരിച്ചത്. കഴിഞ്ഞ വർഷം ജൂലൈയിലെ 31,656 യൂണിറ്റുകളുമായി താരതമ്യം ചെയ്യുമ്പോൾ 3 ശതമാനം വാർഷിക വളർച്ചയും ടൊയോട്ട നേടി.

ക്വാളിസ് മുതൽ ഹൈലക്സ് വരെ, ടൊയോട്ടയുടെ എല്ലാ മോഡലുകൾക്കും ഇന്ത്യയിൽ വലിയ ആരാധക വൃന്ദമുണ്ട്. മികച്ച സർവീസ് ഗുണനിലവാരവും ഉപഭോക്തൃ സംതൃപ്തിയും ബ്രാൻഡിന്റെ പ്രതിച്ഛായ ഉയർത്തുന്നു. മാരുതി സുസുക്കിയുമായുള്ള സഹകരണം ചിലർക്ക് നിരാശയുണ്ടാക്കിയെങ്കിലും, ടൊയോട്ടയുടെ വിശ്വാസ്യതയും ഗുണനിലവാരവും വിപണിയിൽ അവരെ മുന്നിൽ നിർത്തുന്നു.

ALSO READ: 7 ലക്ഷം രൂപയിൽ താഴെ വില; നിസാൻ്റെ പുതിയ 7-സീറ്റർ എംപിവി വരുന്നു

2025-ലെ വളർച്ച

2025-ന്റെ ആദ്യ ഏഴ് മാസങ്ങളിൽ (ജനുവരി-ജൂലൈ) ടൊയോട്ട 2,07,460 വാഹനങ്ങൾ വിറ്റഴിച്ചു. 2024-ലെ ഇതേ കാലയളവിൽ 1,81,906 യൂണിറ്റുകളായിരുന്നു വിൽപ്പന. ഇത് 14 ശതമാനം വളർച്ച കാണിക്കുന്നു. ഏപ്രിൽ മുതൽ ജൂലൈ വരെ 1,19,632 യൂണിറ്റുകൾ വിറ്റഴിച്ച്, കഴിഞ്ഞ വർഷത്തെ 1,04,861 യൂണിറ്റുകളെ മറികടന്നു.

പുതിയ ഓഫറുകളും വില വർധനവും

ഉത്സവ സീസണിനോടനുബന്ധിച്ച് ടൊയോട്ട അർബൻ ക്രൂയിസർ ഹൈറൈഡറിനും ഗ്ലാൻസയ്ക്കും പ്രത്യേക പ്രസ്റ്റീജ് പായ്ക്ക് ആക്‌സസറികൾ അവതരിപ്പിച്ചു. ഡോർ വൈസർ, ഹുഡ് എംബ്ലം, ഫെൻഡർ ഗാർണിഷ്, ബോഡി ക്ലാഡിംഗ് തുടങ്ങി 10 ആക്‌സസറികൾ ഉൾപ്പെടുന്ന ഈ പായ്ക്ക് പുതിയതും നിലവിലുള്ളതുമായ ഉപഭോക്താക്കൾക്ക് ലഭ്യമാണ്.

അതേസമയം, ടൈസർ, റൂമിയോൺ, ഇന്നോവ ക്രിസ്റ്റ എന്നിവയ്ക്ക് 26,000 രൂപ വരെ വില വർധനവ് ഏർപ്പെടുത്തി. ഇന്നോവ ക്രിസ്റ്റയുടെ പുതുക്കിയ വില 19.99 ലക്ഷം മുതൽ 27.08 ലക്ഷം വരെയാണ്. റൂമിയോൺ 10.66 ലക്ഷം മുതൽ 13.95 ലക്ഷം വരെയും, ടൈസർ 7.76 ലക്ഷം മുതൽ 12.90 ലക്ഷം വരെയുമാണ് പുതിയ വില. ഫോർച്യൂണറിന്റെ വില 68,000 രൂപ വരെ ഉയർത്തിയിട്ടുണ്ട്.

മികച്ച ഉൽപ്പന്നങ്ങളും ഉപഭോക്തൃ സൗഹൃദ സേവനങ്ങളും കൊണ്ട് ടൊയോട്ട ഇന്ത്യൻ വിപണിയിൽ തന്റെ ആധിപത്യം തുടരുകയാണ്. വരും മാസങ്ങളിൽ കൂടുതൽ വാഹനങ്ങൾ നിരത്തിലെത്തിക്കാനും വിപണി വിഹിതം വർധിപ്പിക്കാനുമാണ് കമ്പനിയുടെ ലക്ഷ്യം.

Toyota continues its strong performance in India, selling 32,575 vehicles in July 2025, a 3% increase from last year. With 29,159 units sold domestically and 3,416 exported, the brand’s reliability and premium offerings like the Urban Cruiser Hyryder and Glanza drive its success