ഇന്ത്യൻ വാഹന വിപണിയിൽ ഒറ്റ മോഡലിന്റെ കരുത്തിൽ വിജയക്കൊടി നാട്ടിയ ജാപ്പനീസ് വാഹന നിർമാതാക്കളായ നിസാൻ, പുതിയ 7-സീറ്റർ കോംപാക്‌ട് എംപിവിയുമായി വിപണിയെ കീഴടക്കാൻ ഒരുങ്ങുന്നു. 2020-ൽ അവതരിപ്പിച്ച മാഗ്നൈറ്റ് കോംപാക്‌ട് എസ്‌യുവിയുടെ അടിപൊളി ഡിസൈനും 4.99 ലക്ഷം രൂപ എക്സ്ഷോറൂം വിലയും വൻ ജനപ്രീതി നേടിയിരുന്നു. എന്നാൽ, X-ട്രെയിൽ എസ്‌യുവി വിപണിയിൽ കാര്യമായ ചലനങ്ങൾ സൃഷ്ടിക്കാതെ പോയെങ്കിലും, നിസാൻ തളരാതെ മുന്നോട്ട് കുതിക്കുകയാണ്.

ഇപ്പോൾ, 7 ലക്ഷം രൂപയിൽ താഴെ വിലയിൽ പുതിയ 7-സീറ്റർ എംപിവി അവതരിപ്പിച്ച് മാരുതി സുസുക്കി എർട്ടിഗ, റെനോ ട്രൈബർ തുടങ്ങിയ വമ്പന്മാർക്ക് വെല്ലുവിളി ഉയർത്താനാണ് നിസാൻ്റെ പദ്ധതി. കമ്പനി ഔദ്യോഗിക സോഷ്യൽ മീഡിയ പ്ലാറ്റ്‌ഫോമിലൂടെ പുതിയ എംപിവിയുടെ ആദ്യ ടീസർ പുറത്തുവിട്ടു. റെനോ ട്രൈബറിന്റെ CMF-A+ പ്ലാറ്റ്‌ഫോമിനെ അടിസ്ഥാനമാക്കി നിർമിക്കുന്ന ഈ വാഹനം, 2025 അവസാനത്തോടെ വിപണിയിലെത്തുമെന്നാണ് പ്രതീക്ഷ. 2026-ന്റെ തുടക്കത്തിൽ വില പ്രഖ്യാപനവും ഔദ്യോഗിക ലോഞ്ചും നടക്കുമെന്നാണ് സൂചന.

ടീസർ വിശദാംശങ്ങൾ വെളിപ്പെടുത്താതെ ആകാംക്ഷ ഉണർത്തുന്നതാണ്. എന്നാൽ, റെനോ ട്രൈബറിന്റെ റീബാഡ്‌ജ് മോഡലിനപ്പുറം, നിസാൻ്റെ സ്വന്തം ഡിസൈൻ ഐഡന്റിറ്റി പ്രകടമാക്കുന്ന വാഹനമായിരിക്കും ഇതെന്നാണ് പ്രതീക്ഷ. വ്യത്യസ്ത ഗ്രിൽ, ഹെഡ്‌ലാമ്പ് ഡിസൈൻ, സി-ആകൃതിയിലുള്ള ഘടകങ്ങളോടു കൂടിയ വലിയ ഫ്രണ്ട് ബമ്പർ, എൽഇഡി ടെയിൽലൈറ്റുകൾ, പുതിയ അലോയ് വീലുകൾ, റൂഫ് റെയിലുകൾ എന്നിവ വാഹനത്തിന്റെ ഡിസൈനിനെ മികവുറ്റതാക്കും.

ALSO READ: ടൊയോട്ടയുടെ ജൈത്രയാത്ര തുടരുന്നു; ജൂലൈയിൽ 32,575 വാഹനങ്ങൾ നിരത്തിലെത്തിച്ച് വിജയക്കുതിപ്പ്

ഇന്റീരിയറിൽ മാഗ്നൈറ്റിന് സമാനമായ ഡിജിറ്റൽ കൺസോൾ, ഇൻഫോടെയ്ൻമെന്റ് സിസ്റ്റം, പ്രായോഗിക 7-സീറ്റർ ലേഔട്ട് എന്നിവ പ്രതീക്ഷിക്കാം. എഞ്ചിനായി റെനോ ട്രൈബറിൽ ഉപയോഗിക്കുന്ന 1.0 ലിറ്റർ 3-സിലിണ്ടർ പെട്രോൾ എഞ്ചിൻ തന്നെയായിരിക്കും, 71 bhp കരുത്തും 96 Nm ടോർക്കും ഉത്പാദിപ്പിക്കുന്നത്. 5-സ്പീഡ് മാനുവൽ അല്ലെങ്കിൽ എഎംടി ഗിയർബോക്‌സ് ഓപ്ഷനുകളും ലഭ്യമാകും. മാരുതി എർട്ടിഗയ്ക്ക് ബദലായി വിപണിയിൽ ഇടംനേടാൻ ഈ എംപിവിക്ക് കഴിയുമോ? 2026-ലെ ലോഞ്ചിനായി വാഹന പ്രേമികൾ കാത്തിരിക്കുകയാണ്.

Nissan is set to launch a new 7-seater compact MPV in India, priced under ₹7 lakh, challenging the Maruti Suzuki Ertiga. Based on the Renault Triber’s CMF-A+ platform, it will feature a unique design, modern interior, and a 1.0L petrol engine. Expected to hit the market by late 2025, with pricing and launch in early 2026