നെടുമങ്ങാട്: മാധ്യമപ്രവർത്തകനെ സർക്കാർ ഓഫിസിൽ തൂങ്ങി മരിച്ചനിലയിൽ കണ്ടെത്തി. മലയാള മനോരമ നെടുമങ്ങാട് ലേഖകൻ മുക്കോലയ്ക്കൽ ശിവകാമിയിൽ ആനാട് ശശി (കെ.ശശിധരൻ നായർ-77) ആണ് മരിച്ചത്. വെള്ളയമ്പലത്തിനു സമീപം കനക നഗറിലെ വീട്ടിൽനിന്ന് കഴിഞ്ഞ ദിവസം രാത്രിയോടെ ശശിയെ കാണാതായിരുന്നു. തുടർന്നു നടത്തിയ അന്വേഷണത്തിലാണ് കനക നഗറിലെ റീസർവേ ഓഫിസിന്റെ ഷെഡിൽ തൂങ്ങിമരിച്ച നിലയിൽ കണ്ടെത്തിയത്.

നെടുമങ്ങാട് മുനിസിപ്പൽ റസിഡൻസ് വെൽഫെയർ സഹകരണ സംഘം പ്രസിഡന്റ് ആണ്. ആനാട് പഞ്ചായത്ത് മുൻ വൈസ് പ്രസിഡന്റും ക്ഷീരോൽപാദക സംഘം മുൻ പ്രസിഡന്റും ആയിരുന്നു. കോൺഗ്രസ് നിയന്ത്രണത്തിലുള്ള മുണ്ടേല രാജീവ്ഗാന്ധി സഹകരണ സംഘത്തിൽ നിക്ഷേപിച്ച ഒന്നരക്കോടിയിലേറെ രൂപ തിരിച്ചു കിട്ടാത്തതിലെ മനോവിഷമമാണ് മരണകാരണമെന്നാണ് സൂചന.

നേരത്തേ തട്ടിപ്പിൽ ആരോപണ വിധേയനായ സംഘം മുൻ പ്രസിഡന്റ് മുണ്ടേല മോഹനൻ ജീവനൊടുക്കിയിരുന്നു. ഭാര്യ: ഡോ.പി ലത (ആനാട് ഗവ.ആയുർവേദ ആശുപത്രി റിട്ട. ചീഫ് മെഡിക്കൽ ഓഫിസർ). മകൾ. എൽ.ശിവകാമി (കവടിയാർ നിർമല ഭവൻ ഹയർ സെക്കൻഡറി സ്‌കൂൾ പ്ലസ് വൺ വിദ്യാർഥിനി).