യുവാക്കൾക്കിടയിൽ സൂപ്പർ മോട്ടോർ സൈക്കിളുകൾ എന്നും ഹരമാണ്. അത് ട്രയംഫ് മോട്ടോർസൈക്കിൾസിന്റെ മോഡലുകളും ആണെങ്കിൽ പിന്നെ ഒന്നും പറയണ്ട. ഒരുകാലത്ത് ഇന്ത്യൻ റോഡുകൾ അടക്കി വാണിരുന്ന യമഹയുടെ പഴയ രാജ്ദൂധ് മോ‍ഡലിനോട് സാമ്യം എന്ന് വിളിക്കാവുന്ന പുതിയ സൂപ്പർ ഐറ്റം ട്രയംഫ് മോട്ടോർസൈക്കിൾസ് ഇന്ത്യയിൽ ഇന്ന് പുറത്തിറക്കി. തങ്ങളുടെ പുതിയ മോഡൽ ത്രക്സ്റ്റൺ 400 ഇന്ത്യൻ വിപണിയിൽ അവതരിപ്പിച്ച് ബൈക്ക് സഞ്ചാരികൾക്കിടയിൽ ആവേശം കൊള്ളിച്ചിരിക്കുകയാണ്. 2.74 ലക്ഷം രൂപ (എക്സ്-ഷോറൂം) വിലയിൽ ലഭ്യമാകും. ട്രയംഫിന്റെ 400 സിസി ശ്രേണിയിൽ സ്പീഡ് 400, സ്ക്രാംബ്ലർ 400 എക്‌സ് എന്നിവയ്‌ക്കൊപ്പം ചേരുന്ന ഏറ്റവും പുതിയ കഫേ റേസർ മോഡലാണിത്. ക്ലാസിക് ശൈലിയും ആധുനിക സാങ്കേതികവിദ്യയും ഒരുപോലെ സമന്വയിപ്പിച്ചിട്ടുണ്ട്. സ്പോർട്ടി രൂപകൽപ്പനയും മികച്ച പ്രകടനവും ഈ മോഡൽ വാഗ്ദാനം ചെയ്യുന്നു. 

 

 

 

ട്രയംഫ് സ്പീഡ് 400 (2.40 ലക്ഷം രൂപ), സ്ക്രാംബ്ലർ 400 എക്‌സ് (2.65 ലക്ഷം രൂപ) എന്നിവയെ അപേക്ഷിച്ച് ത്രക്സ്റ്റൺ 400, 2.74 ലക്ഷം രൂപ വിലയിൽ 400 സിസി ശ്രേണിയിലെ പ്രീമിയം മോഡലാണ് . "ഇന്ത്യയിൽ ട്രയംഫിന്റെ ബിസിനസ്സ് കഴിഞ്ഞ ഒരു വർഷമായി വൻ വളർച്ചയാണ് കൈവരിച്ചു കൊണ്ടിരിക്കുന്നത്. മോഡേൺ ക്ലാസിക് 400 സിസി ശ്രേണിയോടുള്ള ഇരുചക്ര പ്രേമികളുടെ പ്രതികരണം പ്രതീക്ഷകളെ മറികടന്നു എന്ന് പറയാം. ത്രക്സ്റ്റൺ 400, ആധികാരിക കഫേ റേസർ ശൈലിയും മികച്ച നിർമ്മാണ നിലവാരവും ആവേശകരമായ പ്രകടനവും ഉപഭോക്താക്കൾക്ക് നൽകുമെന്ന് ഉറപ്പാണ്, ബജാജ് ഓട്ടോ ലിമിറ്റഡിന്റെ എക്സിക്യൂട്ടീവ് ഡയറക്ടർ രാകേഷ് ശർമ്മ പറഞ്ഞു. വാഹനത്തെ കുറിച്ചുള്ള കൂടുതൽ വിവരങ്ങൾ നോക്കാം.

ALSO READ: ആഡംബര വിപണിയിൽ കളം നിറയാൻ കൊറിയൻ ഭീമൻ: ഹ്യുണ്ടായി ജെനസീസ് ഇന്ത്യയിലേക്ക് വരുന്നു

 

 

ഡിസൈൻ: റെട്രോ ശൈലിയിൽ ആധുനിക സ്പർശം

ത്രക്സ്റ്റൺ 400, ഫൈറ്റർ ജെറ്റ്- ഫ്രണ്ട് ഫെയറിംഗ്, വൃത്താകൃതിയിലുള്ള എൽഇഡി ഹെഡ്‌ലാമ്പ്, ക്ലിപ്പ്-ഓൺ ഹാൻഡിൽബാറുകൾ, ബാർ-എൻഡ് മിററുകൾ എന്നിവയുമായി റെട്രോ കാലത്തെ മോട്ടോർ സൈക്കിളുകളെ ഓർമ്മപ്പെടുത്തുന്നതാണ്. ശിൽപങ്ങളോടുകൂടെ ചെയ്ത ഇന്ധന ടാങ്കിൽ പുതിയ ഇൻസെറ്റ് ട്രയംഫ് ലോഗോ, ചതുരാകൃതിയിലുള്ള ടെയിൽ-ലൈറ്റ്, കറുത്ത യുഎസ്ഡി ഫോർക്കുകൾ, ബ്രഷ് ചെയ്ത അലുമിനിയം സൈഡ് പാനലുകൾ എന്നിവ ഡിസൈനിന്റെ പ്രത്യേകതകളാണ്. ഒറ്റ-സീറ്റ് സജ്ജീകരണവും നീക്കം ചെയ്യാവുന്ന പിൻ കൗളും ഈ ബൈക്കിന്റെ കഫേ റേസർ ആകർഷണത്തെ തീർച്ചയായും വർധിപ്പിക്കുന്നു.

മഞ്ഞ, വെള്ളി ടു-ടോൺ നിറങ്ങളിൽ ലഭ്യമായ ത്രക്സ്റ്റൺ 400, മിനിമലിസ്റ്റിക് റിയർ എൻഡ്, റിബൺഡ് സീറ്റ്, ഗ്രാബ് റെയിൽ എന്നിവയുമായി ശ്രദ്ധേയമാണ്.

ALSO READ: കിടിലൻ ഫീച്ചറുകളുമായി ഹാരിയർ, സഫാരി പുതിയ അഡ്വഞ്ചർ X വേരിയന്റുകൾ; അതും ടാറ്റാ 50,000 രൂപ വില കുറച്ചും

എഞ്ചിൻ: ശക്തവും സ്‌പോർട്ടിയും

TR-സീരീസ് 398 സിസി, സിംഗിൾ-സിലിണ്ടർ, ലിക്വിഡ്-കൂൾഡ് എഞ്ചിനാണ് ത്രക്സ്റ്റൺ 400-ന് കരുത്ത് പകരുന്നത്. 9,000 rpm-ൽ 42 bhp ഉത്പാദിപ്പിക്കുന്ന ഈ എഞ്ചിൻ, സ്പീഡ് 400-നെ അപേക്ഷിച്ച് 2 bhp അധിക ശക്തി വാഗ്ദാനം ചെയ്യുന്നുണ്ട്. 37.5 Nm ടോർക്ക് 6-സ്പീഡ് ഗിയർബോക്സും സ്ലിപ്പർ ക്ലച്ചും ഉപയോഗിച്ച് ജോടിയാക്കിയിരിക്കുന്നു.

 

 

ഫീച്ചറുകൾ

സ്പീഡ് 400-ന്റെ പ്ലാറ്റ്‌ഫോം പങ്കിടുന്ന ത്രക്സ്റ്റൺ 400, പൂർണ്ണ എൽഇഡി ലൈറ്റിംഗ്, ഡിജിറ്റൽ-അനലോഗ് ഇൻസ്ട്രുമെന്റ് ക്ലസ്റ്റർ, ഡ്യുവൽ-ചാനൽ എബിഎസ്, സ്ലിപ്പ്-ആൻഡ്-അസിസ്റ്റ് ക്ലച്ച് എന്നിവ വാഗ്ദാനം ചെയ്യുന്നു. അപ്‌സൈഡ്-ഡൗൺ ഫ്രണ്ട് ഫോർക്കുകൾ, റിയർ മോണോഷോക്ക്, ഇരു അറ്റത്തും ഡിസ്‌ക് ബ്രേക്കുകൾ എന്നിവ ചേസിസ് സജ്ജീകരണത്തിൽ ഉൾപ്പെടുത്തിയിട്ടുണ്ട്. ഇന്ത്യൻ വിപണിയിൽ ചെലവ് കുറയ്ക്കാൻ എംആർഎഫ് ടയറുകൾ ഉപയോഗിച്ചേക്കാം, എങ്കിലും ആഗോള മോഡലുകൾ പിറെല്ലി ടയറുകൾ തന്നെയായിരിക്കും ഉപയോഗിക്കുന്നത്.

റോയൽ എൻഫീൽഡ് ക്ലാസിക് 350, ജാവ 42, ഹോണ്ട CB350RS എന്നിവയാണ് ത്രക്സ്റ്റൺ 400-ന്റെ പ്രധാന എതിരാളികൾ. ട്രയംഫിന്റെ പ്രീമിയം ബ്രാൻഡ് ഇമേജും ആധുനിക ഫീച്ചറുകളും ഈ മോട്ടോർസൈക്കിളിനെ യുവ റൈഡർമാർക്കിടയിൽ ആകർഷകമാക്കുന്നു. ഇന്ത്യയിലെ ട്രയംഫിന്റെ വിപുലീകരിക്കപ്പെട്ട ഡീലർഷിപ്പ് ശൃംഖലയും റൈഡർ കമ്മ്യൂണിറ്റി ഇവന്റുകളും ഈ ലോഞ്ചിന്റെ വിജയത്തിന് കരുത്ത് പകരുമെന്നാണ് കരുതുന്നത്.

The Triumph Thruxton 400, a riders' favorite, has been launched in India. This stylish retro motorcycle blends classic design with modern performance, offering an exhilarating ride for enthusiasts. Discover its features, specs, and price now