ജർമനി: ഇസ്‌റാഈൽ ഫുട്ബോൾ താരം ഷോൺ വൈസ്മനെ ടീമിലെത്തിക്കാനുള്ള തീരുമാനത്തിൽ നിന്നും പിന്മാറി ജർമൻ ക്ലബ്ബ് ഫോർച്യൂണ ഡസൽഡോർഫ്. ഗസ്സയെ തുടച്ചുനീക്കണമെന്നുള്ള താരത്തിന്റെ സോഷ്യൽ മീഡിയ പോസ്റ്റുകളിൽ ആരാധകരുടെ പ്രതിഷേധം ഉയർന്നതിന് പിന്നാലെയാണ് ജർമ്മൻ ക്ലബ്‌ വൈസ്മനെ ടീമിൽ എത്തിക്കാനുള്ള ഈ തീരുമാനം ഉപേക്ഷിച്ചതെന്നാണ് അന്താരാഷ്ട്ര മാധ്യമങ്ങൾ റിപ്പോർട്ട് ചെയ്യുന്നത്. 

2023 ഒക്ടോബർ ഏഴിന് ഗസ-ഇസ്‌റാഈൽ യുദ്ധം തുടങ്ങിയതിന് പിന്നാലെ വൈസ്മൻ ഗസ്സക്കെതിരെ ധാരാളം പോസ്റ്റുകൾ സോഷ്യൽ മീഡിയയിൽ പങ്കുവെച്ചിരുന്നു. ഗസ്സയെ ഭൂപടത്തിൽ നിന്നും തുടച്ചു നീക്കാൻ ആഹ്വാനം ചെയ്യുന്ന തരത്തിലുള്ള പോസ്റ്റുകൾ വൈസ്മൻ ഷെയർ ചെയ്യുകയും ലൈക്ക് ചെയ്തുവെന്നുമാണ് റിപ്പോർട്ടുകൾ.

സ്പാനിഷ് ക്ലബ്ബായ ഗ്രാനഡയിൽ നിന്നും ആയിരുന്നു ഷോൺ വൈസ്മാനെ സ്വന്തമാക്കാൻ ഫോർച്യൂണ ഡസൽഡോർഫ് ഒരുങ്ങിയിരുന്നത്. താരത്തിന്റെ മെഡിക്കൽ പരിശോധന പൂർത്തിയായിരുന്നുവെന്ന് ജർമൻ മാധ്യമമായ ബിൽഡ് റിപ്പോർട്ട് ചെയ്തിരുന്നു.

തിങ്കളാഴ്ച ഈ വാർത്ത പുറത്ത് വന്നതോടെ ഫുട്ബോൾ ആരാധകർക്കിടെയിൽ വലിയ പ്രതിഷേധം ഉയരുകയായിരുന്നു. എന്നാൽ താരത്തെ ടീമിൽ എത്തിക്കുന്നതിനുള്ള നീക്കത്തിൽ നിന്നും പിന്മാറാനുള്ള കാരണം എന്താണെന്ന് ക്ലബ്ബ് ഇതുവരെ വ്യക്തമാക്കിയിട്ടില്ല. ആരാധകരുടെ പ്രതിഷേധം തന്നെയാണ് ഇതിന് പിന്നിലുള്ള കാരണം എന്നാണ് റിപ്പോർട്ടുകൾ സൂചിപ്പിക്കുന്നത്. 

Fans protest against Gaza remarks German club abandons move to sign Israeli player Shon Weissman