ദുബൈ: ടാറ്റ ഗ്രൂപ്പിന്റെ ഭാഗവും തനിഷ്‌കിന്റെ മാതൃസ്ഥാപനവുമായ ടൈറ്റന്‍ കമ്പനി ലിമിറ്റഡ് ഗള്‍ഫ് മേഖലയില്‍ നൂറ്റാണ്ടിന്റെ പാരമ്പര്യമുള്ള ദമാസ് ജ്വല്ലറിയുടെ ഭൂരിപക്ഷം ഓഹരികളും ഏറ്റെടുത്തു. ദുബൈ കേന്ദ്രമായുള്ള ദമാസിന്റെ 67 ശതമാനം ഓഹരികള്‍ ഏറ്റെടുത്താണ് ടൈറ്റന്‍ ഗള്‍ഫിലെ ആഭരണ വിപണിയില്‍ വന്‍ കുതിപ്പിനൊരുങ്ങുന്നത്.
മേഖലയില്‍ ആഴത്തില്‍ വേരുറപ്പിക്കാനുള്ള ടൈറ്റന്റെ ശക്തമായ നീക്കമാണിതെന്ന് വിലയിരുത്തപ്പെടുന്നു. ജ്വല്ലറി റീടെയില്‍ മേഖലയിലെ രണ്ട് പ്രമുഖ ബ്രാന്‍ഡുകളെ ഒരു കുടക്കീഴില്‍ കൊണ്ടുവരുന്നതാണ് പുതിയ പങ്കാളിത്തമെന്ന് ടൈറ്റന്‍ കമ്പനി പ്രതിനിധികള്‍ ദുബൈയില്‍ പറഞ്ഞു. കമ്പനിയുടെ ആഗോള വിപണിയിലേക്കുള്ള വിപുലീകരണ ഘട്ടത്തിലെ സുപ്രധാന നിമിഷമാണിതെന്നും അവര്‍ ചൂണ്ടിക്കാട്ടി.

ടൈറ്റന്റെ പൂര്‍ണ ഉടമസ്ഥതയിലുള്ള ഉപകമ്പനി ടൈറ്റന്‍ ഹോള്‍ഡിങ്‌സ് ഇന്റര്‍നാഷനല്‍ മുഖേനയാണ് ദമാസ് ജ്വല്ലറിയുടെ ഏറ്റെടുക്കല്‍ സാധ്യമാക്കിയത്. ഇതുവഴി യു.എ.ഇ, ഖത്തര്‍, കുവൈത്ത്, ബഹ്‌റൈന്‍, ഒമാന്‍ എന്നിവിടങ്ങളിലെ 146 ദമാസ് സ്റ്റോറുകളുടെ ഭാഗമാകാന്‍ തനിഷ്‌കിന് സാധിച്ചു. മാത്രമല്ല, ഗള്‍ഫ് മേഖലയിലെ ഏറ്റവും വലിയ ജ്വല്ലറി ബ്രാന്‍ഡുകളില്‍ ഒന്ന് എന്ന പദവിയില്‍ നിലയുറപ്പിക്കാനുമായി.
ബിസിനസ് ഇടപാട് എന്നതിലുപരി, വിശ്വാസ്യതയും രൂപകല്‍പനാ മികവും ആഭരണങ്ങള്‍ സംബന്ധിച്ച ആഴത്തിലുള്ള ധാരണയും അടിസ്ഥാനമാക്കി വളര്‍ന്നു വന്ന രണ്ട് പ്രമുഖ ബ്രാന്‍ഡുകളുടെ കൂടിച്ചേരലാണിതെന്ന് ടൈറ്റന്‍ കമ്പനി മാനേജിങ് ഡയരക്ടര്‍ സി.കെ വെങ്കിട്ടരാമന്‍ പറഞ്ഞു. ഗള്‍ഫ് മേഖലയില്‍ തനിഷ്‌കിന്റെ ചുവടുകള്‍ക്ക് ശക്തി പകരുന്നതും ലോകത്തിലെ തന്നെ ഏറ്റവും വേഗത്തില്‍ കുതിക്കുന്ന ജ്വല്ലറി റീടെയില്‍ വിപണിയില്‍ പുതിയ സാധ്യതകള്‍ക്ക് വഴി തെളിയിക്കുന്നതുമാണിത്. ഉപയോക്താക്കളെ ലക്ഷ്യമിട്ടു കൊണ്ടുള്ള മാറ്റമാണ് ഈയൊരു ബിസിനസ് ഡീലിനെ സവിശേഷമാക്കുന്നത്'അദ്ദേഹം അഭിപ്രായപ്പെട്ടു.

പുതിയ പങ്കാളിത്തത്തോടെ, രണ്ട് തരത്തിലുള്ള ഉപയോക്താക്കളെയാണ് ടൈറ്റന്‍ ലക്ഷ്യമിടുന്നത് തനിഷ്‌കിലൂടെ ഇന്ത്യക്കാരും മറ്റു തെക്കനേഷ്യന്‍ ജനവിഭാഗങ്ങളും ദമാസിലൂടെ അറബ് രാജ്യക്കാരും. ദമാസ് എക്കാലത്തും മനോഹാരിതയ്ക്കും പാരമ്പര്യത്തിനും രൂപകല്‍പനാ ചാതുര്യത്തിനും പ്രാധാന്യം കൊടുത്തിട്ടുണ്ടെന്ന് മന്നൈ കോര്‍പറേഷന്‍ ഗ്രൂപ് സി.ഇ.ഒ അലേഖ് ഗ്രേവാല്‍ പറഞ്ഞു. ടൈറ്റന്റെ പിന്തുണയോടെ, ആഗോള റീടെയില്‍ വിദഗ്ധരിലേക്കും 'ഫ്യൂച്ചര്‍ റെഡി' കാഴ്ചപ്പാടിലേക്കും തങ്ങള്‍ക്ക് എത്താനായെന്നും പറഞ്ഞ അലേഖ്, കൂടുതല്‍ നിക്ഷേപമിറക്കാനും പോര്‍ട്‌ഫോളിയോ നവീകരിക്കാനും ഉപയോക്താക്കളെ കൂടുതല്‍ മികവോടെ സേവിക്കാനും പുതിയ പങ്കാളിത്തം പ്രാപ്തമാക്കുമെന്നും പ്രത്യാശിച്ചു.

ALSO READ: വിമാനത്താവളത്തില്‍വച്ച് ഉമ്മയുടെ യാത്ര അകാരണമായി തടഞ്ഞു, എയര്‍ ഇന്ത്യ എക്‌സ്പ്രസിനെതിരേ ഗുരുതര ആരോപണവുമായി മലയാളി യുവതി

Titan Company Limited, under the Tata Group's umbrella and the cornerstone behind the Tanishq brand, has recently made a strategic acquisition by purchasing a 67% stake in Damas Jewellery, a company with roots in Dubai and a storied century-long history in luxury jewellery retail