ന്യൂഡല്‍ഹി: എട്ടാം ക്ലാസ് പാഠപുസ്തകത്തില്‍ നിന്ന് ടിപ്പു സുല്‍ത്താനെ കുറിച്ചുള്ള ഭാഗങ്ങള്‍ ഒഴിവാക്കി എന്‍സിഇആര്‍ടി. സോഷ്യല്‍ സയന്‍സ് ടെക്‌സ്റ്റ് ബുക്കില്‍ നിന്നാണ് ടിപ്പു സുല്‍ത്താന്‍, പിതാവ് ഹൈദരാലി, 1700ലെ ആംഗ്ലോ-മൈസൂര്‍ യുദ്ധം എന്നിവയെക്കുറിച്ചുള്ള ഭാഗങ്ങള്‍ വെട്ടിയത്. 

വിഷയം തൃണമൂല്‍ കോണ്‍ഗ്രസ് എംപി ഋതബ്രത ബാനര്‍ജി പാര്‍ലമെന്റില്‍ ഉയര്‍ത്തിയതിന് പിന്നാലെ കേന്ദ്ര വിദ്യാഭ്യാസ വകുപ്പ് സഹമന്ത്രി ജയന്ത് ചൗധരി ന്യായീകരണവുമായി രംഗത്തെത്തി. അതത് സംസ്ഥാനങ്ങള്‍ക്ക് അവരുടെ നാട്ടില്‍ നിന്നുള്ള വ്യക്തികളെ കുറിച്ച് കൂടുതല്‍ വിവരങ്ങള്‍ പാഠഭാഗങ്ങളില്‍ ഉള്‍പ്പെടുത്താമെന്ന വിചിത്ര വാദമാണ് കേന്ദ്ര മന്ത്രി ഉയര്‍ത്തിയത്. 

' വിദ്യാഭ്യാസം കണ്‍കറന്റ് ലിസ്റ്റിന് കീഴില്‍ വരുന്ന കാര്യമാണ്. ഭൂരിഭാഗം സ്‌കൂളുകളും സംസ്ഥാന സര്‍ക്കാരുകള്‍ക്ക് കീഴിലാണ് പ്രവര്‍ത്തിക്കുന്നത്. അതത് സംസ്ഥാന സര്‍ക്കാരുകള്‍ക്ക് എന്‍സിഇആര്‍ടി പാഠപുസ്തകങ്ങള്‍ സ്വീകരിക്കുകയോ, ദേശീയ പാഠ്യപദ്ധതി ചട്ടക്കൂടിനെ അടിസ്ഥാനമാക്കി അനുയോജ്യമായ രീതിയില്‍ പാഠപുസ്തകങ്ങള്‍ രൂപപ്പെടുത്തുകയോ ചെയ്യാവുന്നതാണെന്നും ജയന്ത് ചൗധരി പറഞ്ഞു.

ALSO READ: അമിത് ഷായ്ക്കെതിരെ അപകീർത്തി പരാമർശങ്ങൾ നടത്തിയെന്ന കേസ്; രാഹുൽ ​ഗാന്ധിക്ക് ജാമ്യം

ദേശീയ വിദ്യാഭ്യാസ നയത്തെ കൂട്ടുപിടിച്ച് പാഠപുസ്തകങ്ങളിൽ സംഘപരിവാര അനുകൂല നിലപാടുകൾ കർശനമാക്കുന്നതായി നേരത്തെ ആരോപണമുണ്ട്. കഴിഞ്ഞ മാസം എൻസിഇആർടി ഔറംഗസീബും അക്ബറും ബാബറും ഉള്‍പ്പെടെയുള്ള മുഗള്‍രാജാക്കന്മാരെ ക്രൂരന്മാരും കൊലപാതകികളുമാക്കി അവതരിപ്പിച്ച് പുസ്തകങ്ങൾ പരിഷ്കരിച്ചിരുന്നു. അനിസ്ലാമികമായ ആചാരങ്ങള്‍ രാജ്യത്ത് നിരോധിച്ച ഭരണാധികാരിയായി ഔറംഗസീബിനെ വിശേഷിപ്പിക്കുമ്പോള്‍, ക്രൂരതയുടെയും അസഹിഷ്ണുതയുടെയും പ്രതീകമായിട്ടാണ് അക്ബറിനെ പുസ്തകങ്ങളില്‍ അവതരിപ്പിച്ചിരിക്കുന്നത്. മറാത്ത രാജാവ് ഛത്രപതി ശിവാജിയെ മികച്ച തന്ത്രജ്ഞനും കാഴ്ചപ്പാടുള്ള വ്യക്തിയായും വിശേഷിപ്പിക്കുന്നു. എട്ടാം ക്ലാസിലെ സാമൂഹ്യശാസ്ത്ര പുസ്തകത്തിലാണ് ചരിത്രപരമായ ഉള്ളടക്കത്തില്‍ വിവാദങ്ങള്‍ക്ക് കാരണമാകുന്ന മാറ്റങ്ങള്‍ വരുത്തിയിരിക്കുന്നത്.

NCERT has removed portions about Tipu Sultan from the 8th-grade textbook. The omitted sections, taken from the Social Science textbook, included references to Tipu Sultan, his father Hyder Ali, and the Anglo-Mysore wars of the 1700s.