കാനഡ: പ്രശസ്ത ഇന്ത്യൻ ഹാസ്യതാരവും അവതാരകനുമായ കപിൽ ശർമ്മയുടെ കാനഡയിലെ കാപ്‌സ് കഫേയിൽ വീണ്ടും വെടിവയ്പ്പ്.  ഇന്ന് പുലർച്ചെയാണ് ആക്രമണം. സറേയിലെ 85 അവന്യൂവിനും സ്കോട്ട് റോഡിനും ഇടയിൽ സ്ഥിതി ചെയ്യുന്ന കഫേയ്ക്ക് നേരെയാണ് ആക്രമണം. സമീപത്ത് നിന്ന് ആറ് വെടിയുണ്ടകൾ കണ്ടെത്തി. ആക്രമണ സമയത്ത് ജീവനക്കാർ അകത്തുണ്ടായിരുന്നിട്ടും ആർക്കും പരുക്കേറ്റതായി വിവരമില്ല. വെടിവയ്പ്പിന്റെ ഉത്തരവാദിത്തം ലോറൻസ് ബിഷ്‌ണോയി സംഘം ഏറ്റെടുത്തതായി മാധ്യമ റിപ്പോർട്ടുകൾ വരുന്നുണ്ടെങ്കിലും ഔദ്യോ​ഗികമായി ഇതുവരെ സ്ഥിരീകരിച്ചിട്ടില്ല.

‘കോമഡി നൈറ്റ്‌സ് വിത്ത് കപിൽ’, ‘ദി കപിൽ ശർമ്മ ഷോ’ തുടങ്ങിയ ജനപ്രിയ പരിപാടികളിലൂടെ ആഗോള പ്രശസ്തി നേടിയ താരമാണ് കപിൽ ശർമ്മ. സംഭവത്തെക്കുറിച്ച് കപിൽ ഇതുവരെ പ്രതികരിച്ചിട്ടില്ല.

ALSO READ: ഡാർക്ക് എഡിഷൻ കാറുകൾക്ക് ആരാധകരുണ്ടോ? 15 ലക്ഷത്തിനുള്ളിൽ ലഭിക്കുന്ന നാല് കാറുകൾ 

ജൂലൈ 10-നാണ് കഫേ തുറന്നത്. ദിവസങ്ങൾക്ക് ശേഷം കഫേയ്ക്ക് നേരെ ആക്രമണം നടന്നിരുന്നു. ഇതിന് പിന്നാലെയാണ് പുതിയ സംഭവം.  ബബ്ബർ ഖൽസ ഇന്റർനാഷണൽ (ബികെഐ) പ്രവർത്തകൻ ഹർജിത് സിംഗ് ലാഡി ആദ്യ ആക്രമണത്തിന്റെ ഉത്തരവാദിത്തം ഏറ്റെടുത്തിരുന്നു. കപിൽ ശർമ്മ നിഹാങ് സിഖുകാരെക്കുറിച്ച് നടത്തിയ അപകീർത്തികരമായ പരാമർശങ്ങളാണ് ആക്രമണത്തിന് കാരണമെന്ന് ലാഡിയും തൂഫാൻ സിംഗ് എന്ന മറ്റൊരാളും സോഷ്യൽ മീഡിയയിൽ ആരോപിച്ചിരുന്നു. ആദ്യ ആക്രമണത്തിന് ശേഷം ജൂലൈ 20-നാണ് കഫേ വീണ്ടും തുറന്നത്. അതേസമയം സറേയിലെ ദക്ഷിണേഷ്യൻ ബിസിനസുകളെ ലക്ഷ്യമിട്ടുള്ള ഭീഷണികൾ വർദ്ധിക്കുന്നതിനിടയിലാണ് ഈ രണ്ടാമത്തെ ആക്രമണം.

ALSO READ: ഇൻഷുറൻസ് ഇല്ലാതെ വാഹനം റോഡിലിറക്കിയാൽ പണി പാളും; പിഴ തുക മൂന്ന് മുതൽ അഞ്ചിരട്ടി വരെയായി ഉയരും

സറേ മേയർ ബ്രെൻഡ ലോക്ക് ജൂലൈ 11-ന് കഫേ സന്ദർശിച്ച് സംഭവത്തെ “സമൂഹത്തിൽ ഭയം വളർത്താൻ ഉദ്ദേശിച്ചുള്ള അക്രമം” എന്ന് വിശേഷിപ്പിച്ചു. അക്രമാസക്തമായ ഉള്ളടക്കങ്ങൾ നിയന്ത്രിക്കാൻ മെറ്റ, എക്‌സ്, ടിക് ടോക്ക് തുടങ്ങിയ സോഷ്യൽ മീഡിയ പ്ലാറ്റ്‌ഫോമുകളോട് മേയർ ആവശ്യപ്പെട്ടു. ക്രിമിനൽ ഗ്രൂപ്പുകൾക്ക് ഭീഷണിപ്പെടുത്താനും റിക്രൂട്ട് ചെയ്യാനുമുള്ള മൈക്രോഫോണായി സോഷ്യൽ മീഡിയ മാറിയിരിക്കുന്നു. ഇത്തരം അക്കൗണ്ടുകൾ ശാശ്വതമായി നിരോധിക്കണമെന്നും മേയർ ആവശ്യപ്പെട്ടിട്ടുണ്ട്. സറേയിലെ ഈ തുടർച്ചയായ ആക്രമണങ്ങൾ പ്രാദേശിക സമൂഹത്തിൽ ആശങ്ക വർദ്ധിപ്പിക്കുകയാണ്. പൊലിസ് അന്വേഷണം പുരോ​ഗമിക്കുകയാണ്. എന്നാൽ ആക്രമണങ്ങളുടെ ഉദ്ദേശ്യം ഇതുവരെ വ്യക്തമല്ല എന്നാണ് റിപ്പോർട്ട്.

ALSO READ: ജൂലൈയിൽ ഏറ്റവും കൂടുതൽ വിറ്റഴിക്കപ്പെട്ട കാറുകൾ; ക്രെറ്റയെ പിന്നിലാക്കി മാരുതിയുടെ സൂപ്പർ താരം; മൈലേജ് തന്നെ മുഖ്യം   

A shooting targeted Kapil Sharma's cafe in Canada, marking the second attack in a month. The Lawrence Bishnoi gang has reportedly claimed responsibility for the incident