ഗസ്സ: ഗസ്സയില്‍ ഭക്ഷണത്തിനായി കാത്തിരിക്കുന്നതിനിടെ ഇസ്‌റാഈല്‍ കൊലപ്പെടുത്തിയ ഫലസ്തീന്‍ ദേശീയ ടീം മുന്‍ ക്യാപ്റ്റനും പ്രശസ്ത ഫുട്‌ബോള്‍ താരവുമായ സുലൈമാന്‍ അല്‍ ഉബൈദിന് ആദരാഞ്ജലികള്‍ അര്‍പ്പിച്ച് യൂണിയന്‍ ഓഫ് യൂറോപ്യന്‍ ഫുട്‌ബോള്‍ അസോസിയേഷന്‍ (Union of European Football Associations, UEFA). 'ഏറ്റവും ഇരുണ്ട സമയങ്ങളില്‍ പോലും എണ്ണമറ്റ കുട്ടികള്‍ക്ക് പ്രതീക്ഷ നല്‍കിയ പ്രതിഭ' എന്നാണ് യുവേഫ സോഷ്യല്‍ മീഡിയയില്‍ സുലൈമാന്‍ അല്‍ ഉബൈദിന്റെ ചിത്രസഹിതമുള്ള കുറിപ്പില്‍ വിശേഷിപ്പിച്ചത്.

തെക്കന്‍ ഗസ്സയിലെ സഹായവിതരണ കേന്ദ്രത്തില്‍ ഭക്ഷണത്തിനായി കാത്തിരിക്കുന്നതിനിടെ ബുധനാഴ്ചയാണ് 41 കാരനായ ഉബൈദ് കൊല്ലപ്പെട്ടത്. സുലൈമാന്‍ അല്‍ ഉബൈദിന്റെ അഞ്ച് മക്കള്‍ ആക്രമണത്തില്‍ നിന്ന് രക്ഷപ്പെട്ടു. ഉബൈദിന്റെ കൊലപാതകത്തില്‍ ഇതുവരെ ഔദ്യോഗികമായി ഇസ്‌റാഈല്‍ പ്രതികരിച്ചിട്ടില്ല. ആരാധകര്‍ക്കിടയില്‍ 'ഫലസ്തീന്‍ പെലെ' എന്നറിയപ്പെടുന്ന സുലൈമാന്‍ അല്‍ ഉബൈദ് തന്റെ കരിയറില്‍ നൂറിലധികം ഗോളുകള്‍ നേടിയിരുന്നതായി ഫലസ്തീന്‍ ഫുട്‌ബോള്‍ അസോസിയേഷന്‍ പ്രസ്താവനയില്‍ പറഞ്ഞു.

Can you tell us how he died, where, and why? https://t.co/W7HCyVVtBE

— Mohamed Salah (@MoSalah) August 9, 2025

കറുത്ത മുത്ത്, ഫലസ്തീനിലെ ഹെന്റി, ഫലസ്തീന്‍ ഫുട്‌ബോളിലെ പെലെ എന്നിവയെല്ലാം താരത്തിന്റെ വിളിപ്പേരുകളാണ്. കളിക്കാര്‍, ടീം പരിശീലകര്‍, അഡ്മിനിസ്‌ട്രേറ്റര്‍മാര്‍, റഫറിമാര്‍, ക്ലബ് ബോര്‍ഡ് അംഗങ്ങള്‍ എന്നിവര്‍ ഉള്‍പ്പെടെ ഗസ്സയില്‍ സയണിസ്റ്റ് ആക്രമണത്തില്‍ കൊല്ലപ്പെട്ട അസോസിയേഷന്‍ അംഗങ്ങളുടെ എണ്ണം 321 ആയെന്നും ഫലസ്തീന്‍ ഫുട്‌ബോള്‍ അധികൃതര്‍ അറിയിച്ചു.

 

 

അതേസമയം, യുവേഫയുടെ ആദരാഞ്ജലിയില്‍ ഇസ്‌റാഈലിന്റെ ക്രൂരതവിട്ടുപോയ നടപടിയെ വിമര്‍ശിച്ച് ലിവര്‍പൂള്‍ സൂപ്പര്‍ താരം മുഹമ്മദ് സലാഹ് രംഗത്തുവന്നു. യുവേഫയുടെ ട്വീറ്റ് പങ്കുവച്ച സലാഹ്, അദ്ദേഹം എങ്ങനെ, എവിടെ, എന്തുകൊണ്ട് മരിച്ചു എന്ന് പറയാമോയെന്ന് ചോദിച്ചു. സലാഹിന്റെ കുറിപ്പ് സോഷ്യല്‍മീഡിയയില്‍ പെട്ടെന്ന് തന്നെ വൈറലാകുകയുംചെയ്തു. നേരത്തെയും ഫലസ്തീന്‍ വിഷയത്തില്‍ മനുഷ്യപക്ഷത്തുനിന്ന് ഇടപെട്ട വ്യക്തിയാണ്, സമകാലിക ഫുട്‌ബോളിലെ ഏറ്റവും മികച്ച മുന്നേറ്റതാരങ്ങളില്‍ ഒരാളായ സലാഹ്.

ഫലസ്തീന്‍ കായികതാരങ്ങള്‍ക്ക് എതിരെ ആക്രമണം തുടരുന്ന പശ്ചാത്തലത്തില്‍ ഇസ്‌റാഈല്‍ ഫുട്‌ബോള്‍ അസോസിയേഷന്റെ അംഗത്വം റദ്ദാക്കണമെന്ന് മനുഷ്യാവകാശ സംഘടനകള്‍ ഫിഫയോട് ആവശ്യപ്പെട്ടിട്ടുണ്ട്.

Liverpool forward Mohamed Salah has criticised the Union of European Football Associations (UEFA)’s tribute to the late Suleiman Al-Obeid, known as the “Palestinian Pele,” after European football’s governing body failed to reference the circumstances surrounding his death this week.