കോഴിക്കോട്: ഓണാഘോഷത്തോടനുബന്ധിച്ചു കോഴിക്കോട് കോര്‍പറേഷന്‍ കുടുംബശ്രീയുടെ ആഭിമുഖ്യത്തില്‍ 'സ്‌നേഹപാലിക-2016' മെഗാ പൂക്കളമത്സരം സംഘടിപ്പിക്കുന്നു. അറുപതിനായിരം ചതുരശ്ര അടി വിസ്തൃതിയുള്ള ബൃഹദ്‌വേദിയില്‍ രണ്ടായിരം അയല്‍ക്കൂട്ടങ്ങളിലെ പതിനായിരം വനിതകള്‍ ചേര്‍ന്ന് രണ്ടായിരം പൂക്കളങ്ങളാണ് ഒരുക്കുക.
10ന് രാവിലെ 9.30ന് കോഴിക്കോട് മലബാര്‍ ക്രിസ്ത്യന്‍ കോളജ് ഗ്രൗണ്ടിലാണ് പൂക്കളമത്സരം നടക്കുന്നത്. വിജയികളെ കണ്ടെത്തുന്നതിനായി എത്തുന്ന 60 വിധികര്‍ത്താക്കളും സ്ത്രീകളാണ് എന്ന പ്രത്യേകതയുമുണ്ട്. ഒപ്പം എസ്.പി.സി, ജെ.ആര്‍.സി, ഗൈഡ്‌സ് വിഭാഗത്തിലെ നൂറു വിദ്യാര്‍ഥിനികളും വളണ്ടിയര്‍മാരായി രംഗത്തുണ്ടാകും. കോഴിക്കോട് കോര്‍പറേഷന്‍ എഴുപത്തിയഞ്ച് വാര്‍ഡുകളില്‍  നിന്നുള്ള അയല്‍ക്കൂട്ടങ്ങളിലെ മൂന്നു മുതല്‍ അഞ്ചു വരെയുള്ള അംഗങ്ങള്‍ മൂന്നടി വിസ്തീര്‍ണത്തിലാണ് കൂട്ടായ്മയുടെ പൂക്കളങ്ങളൊരുക്കുക. വേദിയില്‍ സജ്ജീകരിക്കുന്ന രജിസ്‌ട്രേഷന്‍ കൗണ്ടര്‍ അന്നേദിവസം രാവിലെ എട്ടിന് പ്രവര്‍ത്തനമാരംഭിക്കും.
 ഒന്നും രണ്ടും മൂന്നും സ്ഥാനം നേടുന്നവര്‍ക്ക്  യഥാക്രമം എട്ടു ഗ്രാം, നാലു ഗ്രാം, രണ്ടു ഗ്രാം സ്വര്‍ണ മെഡലുകളാണ് സമ്മാനമായി ലഭിക്കുക. നാലു മുതല്‍ ഏഴു വരെ സ്ഥാനം നേടുന്ന മത്സരാര്‍ഥികള്‍ക്ക് പ്രോത്സാഹന സമ്മാനങ്ങളും ഏറ്റവും കൂടുതല്‍ മത്സരാര്‍ഥികളെ പങ്കെടുപ്പിക്കുന്ന എ.ഡി.എസിന് പ്രത്യേക സമ്മാനവും നല്‍കും. വെസ്റ്റേണ്‍ യൂനിയന്റെ  സഹകരണത്തോടെ നടത്തുന്ന മത്സരം ലിംക ബുക്ക് ഓഫ് റെക്കോര്‍ഡ്‌സില്‍ രജിസ്റ്റര്‍ ചെയ്തതായി കോര്‍പറേഷന്‍ ഡെപ്യൂട്ടിമേയര്‍ മീരാ ദര്‍ശക് വാര്‍ത്താസമ്മേളനത്തില്‍ അറിയിച്ചു. കുടുംബശ്രീ മെമ്പര്‍ സെക്രട്ടറി എം.വി റംസി ഇസ്മാഈല്‍, പി.പി ഷീജ, കെ. ബീന, പ്രമീളാ ദേവദാസ്, ആര്‍. ജയന്ത്കുമാര്‍ വാര്‍ത്താസമ്മേളനത്തില്‍ പങ്കെടുത്തു.