ക്രിക്കറ്റ് ലോകം ആകാംഷയോടെ കാത്തിരിക്കുന്ന ഏഷ്യ കപ്പ് ആരംഭിക്കാൻ ഇനി ദിവസങ്ങൾ മാത്രമേ ബാക്കിയുള്ളൂ. സെപ്റ്റംബർ ഒമ്പതിനാണ് ഏഷ്യയിലെ ക്രിക്കറ്റ് പോരാട്ടങ്ങൾക്ക് തുടക്കമാവുന്നത്. സെപ്റ്റംബർ 10ന് യുഎഇക്കെതിരെയാണ് ഏഷ്യ കപ്പിൽ ഇന്ത്യയുടെ ആദ്യ മത്സരം. ആരാധകർ ഏറെ പ്രതീക്ഷയോടെ കാത്തിരിക്കുന്ന ഇന്ത്യ-പാകിസ്ഥാൻ ഗ്രൂപ്പ് ഘട്ട മത്സരം സെപ്റ്റംബർ 14ന് നടക്കും. ടൂർണമെന്റിൽ ഗ്രൂപ്പ് എയിലാണ് ഇന്ത്യ ഇടം നേടിയിട്ടുള്ളത്. ഇന്ത്യക്കൊപ്പം പാകിസ്ഥാൻ, യുഎഇ, ഒമാൻ എന്നീ ടീമുകളുമാണ് ഗ്രൂപ്പിലുള്ളത്‌. 

ഇപ്പോഴിതാ ഏഷ്യ കപ്പിനു മുന്നോടിയായി ഇന്ത്യക്കായി ഒരു ഭയവുമില്ലാതെ കളിക്കാൻ സാധിക്കുന്ന താരമാരാണെന്ന് തുറന്നു പറഞ്ഞിരിക്കുകയാണ് മുൻ ഇന്ത്യൻ താരം സുരേഷ് റെയ്‌ന. ഓപ്പണറായ അഭിഷേക് ശർമ്മയെകുറിച്ചാണ് റെയ്‌ന സംസാരിച്ചത്. ശുഭങ്കർ മിശ്രയുടെ യൂട്യൂബ് ചാനലിലൂടെ സംസാരിക്കുകയായിരുന്നു റെയ്‌ന. 

''അഭിഷേക് ശർമ്മ. ക്രിക്കറ്റിലെ അദ്ദേഹത്തിന്റെ നിർഭയമായ സമീപനത്തെ ഞാൻ അഭിനന്ദിക്കുന്നു. യുവരാജ് സിങ് അദ്ദേഹത്തെ വളരെയധികം പരിശീലിപ്പിട്ടുണ്ട്'' സുരേഷ് റെയ്‌ന പറഞ്ഞു. 

ഇന്ത്യക്കായി 16 ടി-20 ഇന്നിംഗ്‌സുകളിൽ നിന്ന് 535 റൺസാണ് അഭിഷേക് ശർമ്മ നേടിയിട്ടുള്ളത്. രണ്ട് വീതം സെഞ്ച്വറിയും അർദ്ധ സെഞ്ച്വറിയും താരം സ്വന്തമാക്കിയിട്ടുണ്ട്. . ഇന്റർനാഷണൽ ടി-20യിൽ ഇന്ത്യൻ താരത്തിന്റെ ഏറ്റവും ഉയർന്ന സ്കോർ അഭിഷേക് ശർമയുടെ പേരിലാണ്. ഇംഗ്ലണ്ടിനെതിരായ ടി-20 പരമ്പരയിലാണ് അഭിഷേക് സെഞ്ച്വറി നേടി തിളങ്ങിയത്. 54 പന്തിൽ 135 റൺസാണ് അഭിഷേക് അടിച്ചെടുത്തത്. 250 പ്രഹരശേഷിയിൽ 13 കൂറ്റൻ സിക്സറുകളും ഏഴ് ഫോറുകളുമാണ് താരത്തിന്റെ ബാറ്റിൽ നിന്നും പിറന്നത്. ഐപിഎല്ലിൽ സൺറൈസേഴ്‌സ് ഹൈദരാബാദിനായി 74 ഇന്നിംഗ്‌സുകളിൽ നിന്ന് 1,816 റൺസും താരം നേടി. 

2025 ഏഷ്യാ കപ്പിനുള്ള ടീം ഇന്ത്യ സ്‌ക്വാഡ് 

സൂര്യകുമാർ യാദവ് (ക്യാപ്റ്റൻ), ശുഭ്മാൻ ഗിൽ (വൈസ് ക്യാപ്റ്റൻ), അഭിഷേക് ശർമ, തിലക് വർമ്മ, ഹാർദിക് പാണ്ഡ്യ, ശിവം ദുബെ, അക്സർ പട്ടേൽ, ജിതേഷ് ശർമ (വിക്കറ്റ് കീപ്പർ), ജസ്പ്രീത് ബുംറ, അർഷ്ദീപ് സിംഗ്, വരുൺ ചക്രവർത്തി, കുൽദീപ് യാദവ്, സഞ്ജു സാംസൺ (വിക്കറ്റ് കീപ്പർ), ഹർഷിത് റാണ, റിങ്കു സിങ്.

Ahead of the Asia Cup, former Indian player Suresh Raina has openly stated that there are players who can play for India without any fear.