ന്യൂഡൽഹി: ഇന്ത്യയിലെ വിവിധ ഭാഗങ്ങളിലായി റോഡിൽ ചിതറിത്തെറിക്കുന്നത് ദിവസം 474 ജീവനുകൾ. 2023ൽ രാജ്യവ്യാപകമായി 4,80,583 അപകടങ്ങളിലായി മരിച്ചുവീണത് 1,72,890 പേർ. റോഡ് സുരക്ഷക്കായി ഓരോ വർഷവും വൻതുക സർക്കാരുകൾ ചെലവഴിക്കുമ്പോഴാണിത്. 2022നെ അപേക്ഷിച്ച് റോഡപകട നിരക്ക് 4.2 ശതമാനം വർധിച്ചപ്പോൾ മരണനിരക്കിൽ 2.6 ശതമാനം വർധയുണ്ടായി. 

റോഡപകടങ്ങളിൽ പരുക്കേറ്റവരുടെ എണ്ണം 4.62 ലക്ഷം വരെയായി ഉയർന്നു. മുൻവർഷത്തെ അപേക്ഷിച്ച് 4.4 ശതമാനം വർധന. ഓരോ ദിവസവും 1,317 അപകടങ്ങൾ സംഭവിക്കുമ്പോഴാണ് ശരാശരി 474 മരണങ്ങൾ റിപ്പോർട്ട് ചെയ്യുന്നത്. ഓരോ മണിക്കൂറിലും 55 അപകടങ്ങളും 20 മരണങ്ങളും ഇന്ത്യയുടെ വിവിധ ഭാഗങ്ങളിലായി റിപ്പോർട്ട് ചെയ്യുന്നതായി കേന്ദ്ര ഗതാഗതമന്ത്രാലയം പുറത്തുവിട്ട കണക്കുകൾ വെളിപ്പെടുത്തുന്നു. 
സുപ്രിം കോടതി നിർദേശപ്രകാരമാണ് കേന്ദ്ര റോഡ് ഹൈവേ മന്ത്രാലയം 2023ലെ റോഡപകട കണക്കുകൾ സംബന്ധിച്ച റിപ്പോർട്ട് പുറത്തുവിട്ടത്. 2022ൽ 1.55 ലക്ഷം ഗുരുതര അപകടങ്ങൾ റിപ്പോർട്ട് ചെയ്തപ്പോൾ, 2023ൽ ഇത് 1.60 ലക്ഷമായി വർധിച്ചു. 
ദേശീയപാതകൾ മരണക്കളമായി മാറുന്നുവെന്നും റിപ്പോർട്ട് സൂചിപ്പിക്കുന്നു. 57,467 മാരക അപകടങ്ങളാണ് ദേശീയപാതയിൽ അരങ്ങേറിയത്. സംസ്ഥാന പാതകളിൽ ഇത് 36,595 ആണ്. ഗതാഗത നിയമലംഘനങ്ങളും അമിത വേഗവുമാണ് കൂടുതൽ അപടങ്ങൾക്കും കാരണമായത്.

കൂടുതലും ടു വീലർ യാത്രികർ

റോഡപകടങ്ങളിൽ പെടുന്നതും മരിച്ചുവീഴുന്നതും കൂടുതലും ഇരുചക്ര വാഹനയാത്രികരാണ്. 44.8 ശതമാനം. അതേസമയം, 20 ശതമാനം കാൽനട യാത്രക്കാരാണ്. 2023ൽ 77,539 ഇരുചക്ര വാഹന യാത്രക്കാർ റോഡപകടങ്ങളിൽ മരിച്ചു. 2022ൽ ഇത് 74,897 ആയിരുന്നു. കാർ, ടാക്‌സി, വാൻ, എൽ.എം.വി വാഹനങ്ങൾ അപകടത്തിൽ പെട്ട് 2023ൽ മരിച്ചത് 21,496 പേരാണ്. 9,489 കുട്ടികൾക്കും 2023ലെ റോഡപകടങ്ങളിൽ ജീവൻ നഷ്ടമായി.

റോഡപകടങ്ങളിൽ കൊല്ലപ്പെടുന്നവർ കൂടുതൽ യുവാക്കളാണെന്ന് റോഡ് ഹൈവേ മന്ത്രാലയം റിപ്പോർട്ട് ചൂണ്ടിക്കാട്ടുന്നു. 2023ലെ റോഡപകടങ്ങളിൽ മരിച്ചവരിൽ 66.4 ശതമാനവും 18നും 45നും ഇടയിൽ പ്രായമുള്ളവരാണ്. 18നും 25നും ഇടയിലെ പ്രായക്കാരിൽ 19 ശതമാനമാണ് മരണം. 25 മുതൽ 35 വരെ പ്രായക്കാർ 25 ശതമാനം വരും. 35 മുതൽ 45 വയസു വരെയുള്ളവർ 21.4 ശതമാനവും റോഡപകടങ്ങളിൽ മരിച്ചു.