അബൂദബി: അബൂദബിയിലെ ദർബ് റോഡ് ടോൾ സംവിധാനത്തിൽ നാളെ മുതൽ പുതിയ മാറ്റങ്ങൾ. പ്രധാനമായും, വൈകുന്നേരത്തെ ടോൾ സമയങ്ങളിൽ മാറ്റങ്ങൾ വരുത്തിയിട്ടുണ്ട്. പുതിയ ഷെഡ്യൂൾ അനുസരിച്ച് വൈകുന്നേരത്തെ തിരക്കേറിയ സമയം ഉച്ചകഴിഞ്ഞ് 3 മണി മുതൽ 7 മണി വരെയാണ്. അതേസമയം, രാവിലെ 7 മുതൽ 9 മണി വരെയുള്ള തിരക്കേറിയ സമയം തിങ്കൾ മുതൽ ശനി വരെ മാറ്റമില്ലാതെ തുടരും. കൂടാതെ, ഞായറാഴ്ചകളിലും ഔദ്യോഗിക പൊതു അവധി ദിനങ്ങളിലും ടോൾ ഒഴിവാക്കിയിട്ടുണ്ട്.

പ്രധാന റോഡുകളിലെ തിരക്ക് കുറയ്ക്കാനും ഗതാഗത പ്രവാഹം മെച്ചപ്പെടുത്താനും ലക്ഷ്യമിട്ട് മുനിസിപ്പാലിറ്റീസ് ആൻഡ് ട്രാൻസ്‌പോർട്ട് വകുപ്പിന്റെ ഭാഗമായ ഇന്റഗ്രേറ്റഡ് ട്രാൻസ്‌പോർട്ട് സെന്റർ (ഐ.ടി.സി) ഈ മാസം ആദ്യമാണ് ഈ ഭേദഗതികൾ പ്രഖ്യാപിച്ചത്. 

ALSO READ: കുവൈത്തിലെ പ്രധാന റോഡുകളിൽ ട്രക്കുകൾക്ക് നിരോധനം; നിരോധനം നാളെ മുതൽ

സ്വകാര്യ വാഹനങ്ങൾക്കുള്ള നിലവിലെ പ്രതിദിന, പ്രതിമാസ ടോൾ പരിധികൾ റദ്ദാക്കലും പുതിയ മാറ്റങ്ങളിൽ‌പ്പെടുന്നു. ഇതിനർത്ഥം, ഒരു വാഹനത്തിന് പ്രതിദിനം 16 ദിർഹം, ആദ്യ വാഹനത്തിന് പ്രതിമാസം 200 ദിർഹം, രണ്ടാമത്തെ വാഹനത്തിന് 150 ദിർഹം, മൂന്നാമത്തെയും തുടർന്നുള്ള വാഹനങ്ങൾക്കും 100 ദിർഹം എന്നിങ്ങനെ നിശ്ചയിച്ചിരുന്ന പരമാവധി ടോൾ തുക ഇനി ബാധകമല്ല.

അബൂദബിയിലെ ദർബ് ഗേറ്റുകളിലൂടെയുള്ള ഓരോ യാത്രക്കും 4 ദിർഹം ടോൾ ഫീസ് തുടർന്നും ഈടാക്കും. അതേസമയം, വികലാംഗർ, കുറഞ്ഞ വരുമാനമുള്ള കുടുംബങ്ങൾ, മുതിർന്ന പൗരന്മാർ, വിരമിച്ചവർ തുടങ്ങിയവർക്കുള്ള നിലവിലെ ഒഴിവാക്കൽ തുടരും. നാളെ മുതൽ (2025 സെപ്റ്റംബർ 1) പുതിയ ടോൾ നിയമങ്ങൾ പ്രാബല്യത്തിൽ വരുമെന്ന് ഐ.ടി.സി വ്യക്തമാക്കി.

ALSO READ: ലഹരിക്കടത്ത്: മൂന്നം​ഗ സംഘത്തെ പിടികൂടി ദുബൈ പൊലിസ്; 89,760 ക്യാപ്റ്റഗോൺ ഗുളികകൾ പിടിച്ചെടുത്തു

ദർബ് ടോൾ സംവിധാനം നിയന്ത്രിക്കുന്നതും പ്രവർത്തിപ്പിക്കുന്നതും എ.ഡി.ക്യുവിന്റെ ഉപകമ്പനിയായ ക്യു മൊബിലിറ്റിയാണ്. ബന്ധപ്പെട്ട അധികാരികളുമായി സഹകരിച്ച് പുതിയ ക്രമീകരണങ്ങൾ നടപ്പിലാക്കാനുള്ള ചുമതലയും ക്യു മൊബിലിറ്റിക്കാണ്.

2021 ജനുവരിയിലാണ് അബൂദബിയിൽ ആദ്യമായി ടോൾ സംവിധാനം അവതരിപ്പിച്ചത്. ഇതുപ്രകാരം, വാഹനം ഒന്നിന് 100 ദിർഹം രജിസ്ട്രേഷൻ ഫീസ് ഈടാക്കും. തുടർന്ന്, ഇതിൽ 50 ദിർഹം ഉപയോക്താവിന്റെ ദർബ് അക്കൗണ്ടിലേക്ക് ക്രെഡിറ്റ് ചെയ്യും.

Abu Dhabi's Integrated Transport Centre (ITC) has announced changes to the Darb toll system, effective September 1, 2025. The evening peak hour toll period will be adjusted to 3 pm to 7 pm, while morning peak hours remain unchanged from 7 am to 9 am, Monday through Saturday. No tolls will be charged on Sundays and public holidays. Additionally, the daily and monthly toll caps for private vehicles will be removed, and a standardized flat fee of AED 4 will be charged per toll gate crossing.