ഡൽഹി: ജനപ്രിയ ടെലിവിഷൻ നടൻ ആശിഷ് കപൂറിനെ ബലാത്സംഗ കേസിൽ ഡൽഹി പൊലിസ് അറസ്റ്റ് ചെയ്തു. കഴിഞ്ഞ മാസം ഡൽഹിയിൽ നടന്ന ഒരു ഹൗസ് പാർട്ടിക്കിടെ ശുചിമുറിയിൽ വെച്ച് ഒരു യുവതിയെ ലൈംഗികമായി പീഡിപ്പിച്ചുവെന്ന പരാതിയെ തുടർന്നാണ് നടപടി. ബുധനാഴ്ചയാണ് ആശിഷിനെ പൊലിസ് കസ്റ്റഡിയിലെടുത്തത്.

ഇൻസ്റ്റഗ്രാമിലൂടെ യുവതിയുമായി ബന്ധം സ്ഥാപിച്ച ആശിഷ്, അവരെ തന്റെ സുഹൃത്തിന്റെ വീട്ടിൽ നടന്ന പാർട്ടിയിലേക്ക് ക്ഷണിക്കുകയായിരുന്നുവെന്ന് പൊലിസ് വ്യക്തമാക്കി. പാർട്ടിക്കിടെ ശുചിമുറിയിൽ വെച്ചാണ് പീഡനം നടന്നതെന്നാണ് യുവതിയുടെ ആരോപണം.
പ്രാഥമിക എഫ്ഐആറിൽ ആശിഷ്, അദ്ദേഹത്തിന്റെ സുഹൃത്ത്, സുഹൃത്തിന്റെ ഭാര്യ, തിരിച്ചറിയാത്ത രണ്ട് വ്യക്തികൾ എന്നിവരുടെ പേര് ഉൾപ്പെട്ടിട്ടുണ്ട്. എന്നാൽ, പിന്നീട് യുവതി മൊഴി മാറ്റി, ആശിഷ് മാത്രമാണ് തന്നെ ബലാത്സംഗം ചെയ്തതെന്ന് വ്യക്തമാക്കി. സംഭവത്തിന്റെ വീഡിയോ ദൃശ്യങ്ങൾ പകർത്തിയിട്ടുണ്ടെന്നും യുവതി ആരോപിച്ചെങ്കിലും, ഇത്തരം ദൃശ്യങ്ങൾ പൊലിസിന് കണ്ടെത്താൻ കഴിഞ്ഞിട്ടില്ല.

സംഭവത്തിന് ശേഷം, ആശിഷിന്റെ സുഹൃത്തിന്റെ ഭാര്യ ശുചിമുറിക്ക് പുറത്ത് വെച്ച് തന്നെ മർദിച്ചതായും യുവതിയുടെ പരാതിയിൽ പറയുന്നുണ്ട്. സംഭവം പൊലിസിനെ അറിയിക്കാൻ പിസിആർ വിളിച്ചത് സുഹൃത്തിന്റെ ഭാര്യയാണെന്നും പൊലിസ് വെളിപ്പെടുത്തി. കേസിൽ അന്വേഷണം തുടരുകയാണ്.

‘സരസ്വതിചന്ദ്ര’, ‘ലവ് മാര്യേജ് യാ അറേഞ്ച്ഡ് മാര്യേജ്’, ‘ചാന്ദ് ഛുപാ ബാദൽ മേം’, ‘ദേഖാ ഏക് ഖ്വാബ്’, ‘മോൽക്കി രിഷതോം കി അഗ്നിപരീക്ഷ’, ‘വോ അപ്നാ സാ’, ‘ബന്ദിനി’ തുടങ്ങിയ ജനപ്രിയ ടെലിവിഷൻ ഷോകളിൽ അഭിനയിച്ചിട്ടുള്ള ആശിഷ് കപൂർ ഇന്ത്യൻ ടെലിവിഷൻ രംഗത്തെ സുപരിചിത മുഖമാണ്.