ഓച്ചിറ വലിയകുളങ്ങരയിൽ ദേശീയപാതയിൽ കെഎസ്ആർടിസി ഫാസ്റ്റ് പാസഞ്ചർ ബസും മഹീന്ദ്ര ഥാർ വാഹനവും കൂട്ടിയിടിച്ചുണ്ടായ അപകടത്തിൽ അച്ഛനും രണ്ട് മക്കളും മരിച്ചു. തേവലക്കര സ്വദേശിയായ പ്രിൻസ് തോമസ് (44), മക്കളായ അതുൽ (14), അൽക്ക (5) എന്നിവരാണ് മരിച്ചത്. പ്രിൻസിന്റെ ഭാര്യ ബിന്ദ്യയ്ക്കും മകൾ ഐശ്വര്യയ്ക്കും പരിക്കേറ്റു. ഇതിൽ ഐശ്വര്യയുടെ നില അതീവ ഗുരുതരമാണ്.

അപകടം നടന്നത് വ്യാഴാഴ്ച പുലർച്ചെ 6:15-ന് ഓച്ചിറ വലിയകുളങ്ങരയിലാണ്. ബിന്ദ്യയുടെ സഹോദരനെ നെടുമ്പാശ്ശേരി വിമാനത്താവളത്തിൽ ആക്കി മടങ്ങുകയായിരുന്ന കുടുംബം, കരുനാഗപ്പള്ളിയിൽ നിന്ന് ചേർത്തലയിലേക്ക് പോവുകയായിരുന്ന കെഎസ്ആർടിസി ബസുമായി കൂട്ടിയിടിക്കുകയായിരുന്നു. സംഭവത്തിന്റെ സിസിടിവി ദൃശ്യങ്ങൾ പുറത്തുവന്നിട്ടുണ്ട്.

അമിത വേഗതയിൽ എത്തിയ ഥാർ വാഹനം കെഎസ്ആർടിസി ബസിൽ നേരിട്ട് ഇടിക്കുകയായിരുന്നു. ഇടിയുടെ ആഘാതത്തിൽ ബസിന്റെ മുൻ ചക്രങ്ങൾ തെറിച്ചുപോയി, ഥാർ പൂർണമായും തകർന്നു. വാഹനം വെട്ടിപ്പൊളിച്ചാണ് പ്രിൻസിനെയും കുടുംബത്തെയും പുറത്തെടുത്തത്. പ്രിൻസ് സംഭവസ്ഥലത്ത് തന്നെ മരിച്ചിരുന്നു. ബസിലുണ്ടായിരുന്ന 20 യാത്രക്കാർക്ക് പരിക്കേറ്റിട്ടുണ്ട്. ഇവരെ ഓച്ചിറയിലെ ആശുപത്രിയിൽ പ്രവേശിപ്പിച്ചിരിക്കുകയാണ്.

പ്രിൻസ് ഡ്രൈവിംഗിനിടെ ഉറങ്ങിപ്പോയതാകാം അപകടത്തിന് കാരണമെന്നാണ് പൊലfസിന്റെ പ്രാഥമിക നിഗമനം. തേവലക്കരയിൽ കച്ചവടം നടത്തിവന്നിരുന്ന പ്രിൻസിന്റെ മകൻ അതുൽ ഒൻപതാം ക്ലാസ് വിദ്യാർഥിയും, മകൾ അൽക്ക എൽകെജി വിദ്യാർഥിനിയുമാണ്. പരിക്കേറ്റ ഐശ്വര്യ പ്ലസ് ടു വിദ്യാർഥിനിയാണ്.