കണ്ണൂർ: ശബരിമല യുവതീപ്രവേശന വിഷയത്തിൽ നഷ്ടമായ ഹിന്ദുവോട്ടുകളിൽ കണ്ണുനട്ട് ആഗോള അയ്യപ്പ സംഗമത്തിന് സി.പി.എം കൈകൂപ്പുമ്പോൾ മുൻനിലപാടുകൾ പാർട്ടിയെ തിരിഞ്ഞുകൊത്തുന്നു. തദ്ദേശ, നിയമസഭാ തെരഞ്ഞെടുപ്പുകൾ പടിവാതിൽക്കലെത്തിയതോടെ, ലോക്‌സഭാ തെരഞ്ഞെടുപ്പിൽ ചോർന്ന വോട്ടുകൾ തിരിച്ചുപിടിക്കുകയെന്ന ലക്ഷ്യത്തിലാണ് സി.പി.എം. ഭക്തി, വിശ്വാസം എന്നിവയോട് മുൻപുണ്ടായിരുന്ന വിരോധവും അകൽച്ചയും തുടർന്നാൽ അണികളുൾപ്പെടെ അകലുമെന്ന തിരിച്ചറിവിലാണ് കളംമാറിയുള്ള പുതിയ കളി. എന്നാൽ പാർട്ടിയും സർക്കാരും പ്രതീക്ഷിച്ച വഴിയിലേക്ക് കാര്യങ്ങളെത്തിക്കുക എളുപ്പമല്ല. 
സി.പി.എം സ്‌പോൺസേർഡ് പരിപാടി എന്നാണ് അയ്യപ്പസംഗമത്തെ യു.ഡി.എഫും ബി.ജെ.പിയും വിശേഷിപ്പിക്കുന്നത്. തിരുവിതാംകൂർ ദേവസ്വം ബോർഡിനെ മറയാക്കിയാണ് അയ്യപ്പസംഗമത്തിന് സർക്കാർ കരുനീക്കുന്നത്.

 ലോക്‌സഭാ തെരഞ്ഞെടുപ്പുകാലത്ത് പയറ്റിയ ന്യൂനപക്ഷ രക്ഷകവേഷം ഫലിച്ചില്ലെന്ന ബോധ്യമാണ് ഇത്തവണ ഭൂരിപക്ഷ കാർഡിറക്കാൻ സി.പി.എമ്മിനെ പ്രേരിപ്പിക്കുന്നത്. കേന്ദ്ര സർക്കാരിന്റെ പൗരത്വഭേദഗതി ബില്ലിനെതിരേ മുഖ്യമന്ത്രി പിണറായി വിജയൻ ഉൾപ്പെടെയുള്ളവർ പിന്തുണയുമായെത്തിയിട്ടും അതിന്റെ ഉദ്ദേശ ശുദ്ധിയിൽ പല മുസ്‌ലിം സംഘടനകളും സംശയം പ്രകടിപ്പിച്ചിരുന്നു. 
പൗരത്വഭേദഗതി പ്രതിഷേധങ്ങളുമായി ബന്ധപ്പെട്ട് സംസ്ഥാനത്ത് 7913 പേർക്കെതിരേ 835 കേസുകളാണ് റജിസ്റ്റർ ചെയ്തത്. അതിൽ 114 കേസുകൾ പിൻവലിക്കുകയും 241 കേസുകളിൽ ശിക്ഷ വിധിക്കുകയുമുണ്ടായി. അഞ്ഞൂറോളം കേസുകളിൽ വിചാരണ തുടരുകയാണ്. ശബരിമല യുവതീപ്രവേശ വിഷയത്തിലും സി.പി.എം ഇരട്ടത്താപ്പ് തുടരുകയാണെന്ന് പ്രതിപക്ഷം ആരോപിക്കുന്നു. 

യുവതീപ്രവേശ വിഷയവുമായി ബന്ധപ്പെട്ട് 2018ൽ ഹൈന്ദവസംഘടനകൾ ശബരിമലയിൽ വിശ്വാസസംരക്ഷണ യജ്ഞം സംഘടിപ്പിച്ചപ്പോൾ അതിനെതിരേ നവോത്ഥാന മതിൽ ഉണ്ടാക്കിയവരാണ് സി.പി.എം എന്നാണ് പ്രതിപക്ഷനേതാവ് വി.ഡി സതീശൻ പറയുന്നത്. നവോത്ഥാനസമിതിയുടെ നേതൃത്വത്തിലായിരുന്നു കാസർകോട് മുതൽ തിരുവനന്തപുരം വരെ നവോത്ഥാന മതിൽ തീർത്തത്. ആ നവോത്ഥാന സമിതി ഇതുവരെ പിരിച്ചുവിടാത്തവരാണ് അയ്യപ്പസംഗമവുമായി വരുന്നതെന്നും സതീശൻ കുറ്റപ്പെടുത്തുന്നു. 
കഴിഞ്ഞ ഏഴുകൊല്ലമായി നടത്താത്ത അയ്യപ്പസംഗമം ഇപ്പോൾ നടത്തുന്നതിലെ പൊള്ളത്തരവും പ്രതിപക്ഷം ചോദ്യം ചെയ്യുന്നുണ്ട്. എന്നാൽ അയ്യപ്പസംഗമത്തിന് അനുകൂല നിലപാടാണ് എൻ.എസ്.എസിനും എസ്.എൻ.ഡി.പിക്കും. സർക്കാർ നിർദേശപ്രകാരം തിരുവിതാംകൂർ ദേവസ്വംബോർഡ് പ്രതിനിധികളാണ് സമുദായ സംഘടനകളുമായി ചർച്ച നടത്തിയതും പിന്തുണ ഉറപ്പിച്ചതും. ഇത് യു.ഡി.എഫിന് തലവേദനയാണ്. 

സമുദായ സംഘടനകളുടെ ഈ നിലപാട് അയ്യപ്പസംഗമത്തെ തുടക്കംമുതൽ എതിർക്കുന്ന ബി.ജെ.പിക്കും ഭീഷണിയാണ്. അതിനാൽ ആഗോള അയ്യപ്പസംഗമത്തിനു ബദലായി അയ്യപ്പ വിശ്വാസസംഗമം നടത്താനുള്ള ഒരുക്കത്തിലാണ് ഹിന്ദു ഐക്യവേദിയും ശബരിമല കർമസമിതിയും. 
 വിശ്വാസികളെ ഒപ്പം നിർത്താനുള്ള ഈ കളിയിലും സി.പി.എമ്മിനും സംസ്ഥാന സർക്കാരിനും തിരിച്ചടിയാകുമോ എന്നാണ് രാഷ്ട്രീയ നിരീക്ഷകർ ഉറ്റുനോക്കുന്നത്. പാർട്ടിയും സർക്കാരും വിശ്വാസികൾക്കൊപ്പമെന്നാണ് സി.പി.എം സംസ്ഥാന സെക്രട്ടറി എം.വി ഗോവിന്ദൻ പറയുന്നത്. യുവതീപ്രവേശം അടഞ്ഞ അധ്യായമാണെന്നും അത്തരം ചർച്ചകളിലേക്ക് അയ്യപ്പസംഗമത്തെ വലിച്ചിഴയ്ക്കുന്നതിനു പിന്നിൽ ഗൂഢതാൽപര്യങ്ങളുണ്ടെന്നും സി.പി.എം ഓർമിപ്പിക്കുന്നു. 

ശബരിമല യുവതീപ്രവേശ നിലപാടിൽ നിന്നു സർക്കാർ പിന്നോട്ടുപോകരുതെന്നാണ് കെ.പി.എം.എസ് ജനറൽ സെക്രട്ടറി പുന്നല ശ്രീകുമാർ പറയുന്നത്. പുരോഗമന ചിന്തയിൽ നിന്നുള്ള വ്യതിചലനം സി.പി.എമ്മിനും സർക്കാരിനും തിരിച്ചടിയാകുമെന്നും അദ്ദേഹം വ്യക്തമാക്കുന്നു.

Political circles in Kerala are abuzz as speculations rise over Ayyappa Sangham's potential support for the CPI(M) ahead of key political developments.