ദോഹ: കൂട്ടക്കുരിതിയും അധിനിവേശവും തുടര്‍ന്ന് കൊണ്ടിരിക്കുന്ന ഗസ്സയില്‍ വെടിനിര്‍ത്തല്‍ സാധ്യമാക്കാനായി ഖത്തറും ഈജിപ്തും സംയുക്തമായി നടത്തിയ ചര്‍ച്ചയില്‍ ഓഗസ്റ്റ് 18ന് വെടിനിര്‍ത്താന്‍ ഹമാസ് തയാറാണെന്ന് അറിയിച്ചെങ്കിലും ഇസ്‌റാഈല്‍ ഇതുവരെയും മറുപടി നല്‍കിയില്ലെന്ന് ഖത്തര്‍. താല്‍കാലിക വെടിനിര്‍ത്തല്‍ നടപ്പാക്കാനുള്ള ശ്രമങ്ങളുടെ ഭാഗമായി മധ്യസ്ഥ രാഷ്ട്രങ്ങള്‍ മുന്‍കൈയെടുത്തു സമര്‍പ്പിച്ച നിര്‍ദേശങ്ങള്‍ ഹമാസ് അംഗീകരിച്ചെങ്കിലും ആഴ്ചകള്‍ പിന്നിട്ടിട്ടും ഇസ്‌റാഈല്‍ ഇതുവരെ മറുപടിയൊന്നും നല്‍കിയില്ലെന്നും ഖത്തര്‍ വിദേശകാര്യ വക്താവ് മാജിദ് അല്‍ അന്‍സാരി വാര്‍ത്താസമ്മേളനത്തില്‍ പറഞ്ഞു.

വെടിനിര്‍ത്തല്‍ നിര്‍ദേശത്തോട് പ്രതികരിക്കുന്നതിനു പകരം, ഗസ്സയില്‍ ഇസ്‌റാഈല്‍ ആക്രമണം ശക്തിപ്പെടുത്തുന്ന കാഴ്ചകളാണ് ലോകം കണ്ടു കൊണ്ടിരിക്കുന്നതെന്നും, മാനുഷിക സഹായങ്ങള്‍ പോലും നിഷേധിച്ച് ഇസ്‌റാഈല്‍ അധിനിവേശം തുടര്‍ന്ന് കൊണ്ടിരിക്കുകയാണെന്നും അദ്ദേഹം അഭിപ്രായപ്പെട്ടു. ഗസ്സയെ പൂര്‍ണമായും കീഴ്‌പ്പെടുത്താനുള്ള ഇസ്‌റാഈല്‍ ശ്രമം എല്ലാവരെയും അപകടത്തിലാക്കും. ഇതിനെതിരേ അന്താരാഷ്ട്ര സമൂഹം ഒറ്റക്കെട്ടായി നിലകൊള്ളണമെന്നും ഗസ്സയിലേക്ക് മാനുഷിക സഹായമെത്തിക്കാന്‍ അതിര്‍ത്തികള്‍ പൂര്‍ണമായും തുറന്നിടണമെന്നും മാജിദ് അല്‍ അന്‍സാരി ആവശ്യപ്പെട്ടു.

ഈമാസം ചേരുന്ന ഐക്യരാഷ്ട്രസഭാ അസംബ്ലി ഫലസ്തീന്‍ പ്രശ്‌നത്തിന് പരിഹാരം കാണാനുള്ള അനുയോജ്യമായ അവസരമാണെന്നും ദ്വിരാഷ്ട്ര പദ്ധതിയാണ് പ്രശ്‌ന പരിഹാരത്തിനുള്ള പോം വഴിയെന്നും അദ്ദേഹം പറഞ്ഞു. ഫലസ്തീന്‍ വിഷയത്തില്‍ തുടക്കം മുതല്‍ തന്നെ മധ്യസ്ഥ ചര്‍ച്ചകള്‍ക്ക് മുന്നിട്ടിറങ്ങിയ ഖത്തര്‍ ലോക രാഷ്ട്രങ്ങളുടെ പിന്തുണയോടെ എത്രയും പെട്ടെന്ന് ഗസ്സയില്‍ വെടിനിര്‍ത്തല്‍ സാധ്യമാക്കാനുള്ള ശ്രമങ്ങള്‍ തുടരുമെന്നും അല്‍ അന്‍സാരി കൂട്ടിച്ചേര്‍ത്തു.

ALSO READ: ഗള്‍ഫിലും വില കുതിക്കുന്നു, സൗദിയില്‍ ഗ്രാമിന് 400 കടന്നു, എങ്കിലും പ്രവാസികള്‍ക്ക് ലാഭം; കേരളത്തിലെയും ഗള്‍ഫിലെയും സ്വര്‍ണവില ഒരു താരതമ്യം | Gold Price in GCC & Kerala

Top Qatari official who is part of the Arab negotiators attempting to end the war in Gaza and release the Israeli hostages held by Hamas has said that Israel has not responded to the ceasefire proposal. Majed al-Ansari, the spokesperson for Qatar’s lead negotiator, Prime Minister Mohammed bin Abdulrahman al-Thani said that they are still entertaining alternative ideas that envision a more comprehensive deal to end the crisis.