ബെയ്ജിങ്: ആഗോള ലോകക്രമത്തെ നിയന്ത്രിക്കാൻ തങ്ങൾക്കാകുമെന്ന് ശുഭാപ്തി പ്രകടിപ്പിച്ച് ഷാങ്ഹായ് കോഓപ്പറേഷൻ ഓർഗനൈസേഷൻ (എസ്.സി.ഒ) രാജ്യങ്ങളുടെ ഉച്ചകോടി പുതിയ "സഖ്യ'ത്തിനുള്ള സൂചന നൽകിയതോടെ പരിഭ്രാന്തിയിലായി യു.എസ്. ഇന്ത്യയും ചൈനയുമടക്കമുള്ള രാജ്യങ്ങൾക്കു മേൽ കനത്ത ഇറക്കുമതി തീരുവ ചുമത്തിയ പ്രസിഡന്റ് ഡൊണാൾഡ് ട്രംപിന്റെ നടപടി ഇന്ത്യയും ചൈനയും അടുക്കാനിടയാക്കുമെന്ന് യു.എസിലെ മുൻ ദേശീയ സുരക്ഷാ ഉപദേഷ്ടാക്കൾ മുന്നറിയിപ്പു നൽകി. 

പാകിസ്ഥാനുവേണ്ടിയുള്ള ബിസിനസ് ഇടപാടിനു വേണ്ടിയാണ് ട്രംപ് ഇന്ത്യക്കെതിരേ അധിക തീരുവ ചുമത്തിയതെന്നാണ് മുൻ ദേശീയ സുരക്ഷാ ഉപദേഷ്ടാവ് ജെയ്ക് സുള്ളിവൻ പറഞ്ഞത്. തങ്ങൾ കാലങ്ങളായി റഷ്യൻ ചേരിയിൽ നിന്ന് ഇന്ത്യയെ അകറ്റിയത്, ട്രംപ് ഒറ്റദിവസം കൊണ്ട് പാഴാക്കിയെന്നാണ് മറ്റൊരു മുൻ സുരക്ഷാ ഉപദേഷ്ടാവായ ജോൺ ബോൾട്ടൻ കുറ്റപ്പെടുത്തിയത്.  ഇന്ത്യയും ചൈനയും അടുക്കാൻ ട്രംപിന്റെ നടപടി ഇടയാക്കിയതായി ആദ്യ ട്രംപ് ഭരണകൂടത്തിൽ പ്രവർത്തിച്ച ബോൾട്ടൻ പറഞ്ഞു.

ALSO READ: പാക്കിസ്താനിൽ ചാവേർ ബോംബ് സ്ഫോടനം; 11 പേർ കൊല്ലപ്പെട്ടു, 30ലേറെ പേർക്ക് പരുക്ക്

എസ്.സി.ഒ ഉച്ചകോടി ഏഷ്യൻ ഓഹരിവിപണിക്ക് ഉത്തേജനമായപ്പോൾ യു.എസിന്റെ നാസ്ഡാക്, ഡോജോൺസ് എന്നിവ ഇടിഞ്ഞത് ഉച്ചകോടി യു.എസിന് തിരിച്ചടിയായതിന്റെ സൂചനയായി. ഉച്ചകോടിയെ ചൈനീസ് മാധ്യമങ്ങൾ പുകഴ്ത്തിയപ്പോൾ ട്രംപിനുള്ള മുന്നറിയിപ്പാണ് ഇതെന്ന് യു.എസ് മാധ്യമങ്ങൾ വിലയിരുത്തി. 

അതിനിടെ, റഷ്യയും ചൈനയും ആഗോള ഊർജ ഭൂപടത്തെ മാറ്റിയെഴുതുന്ന സൈബീരിയ പൈപ്പ്‌ലൈൻ പദ്ധതിക്കായി കരാറിലൊപ്പുവച്ചതും യു.എസിന് തിരിച്ചടിയായി. ഇതുവഴി റഷ്യ ചൈനക്ക് പരിധിയില്ലാതെ പ്രകൃതിവാതകം വിതരണം ചെയ്യും. ഇതോടെ റഷ്യക്കുമേൽ യു.എസും പടിഞ്ഞാറൻ രാജ്യങ്ങളും ഏർപ്പെടുത്തിയ ഉപരോധങ്ങൾ പാഴാവുകയും റഷ്യ സാമ്പത്തികശേഷി ആർജിക്കുകയും ചെയ്യും. 

അതേസമയം, മോദി ചൈനീസ് പ്രസിഡന്റ ഷി ജിൻപിങ്ങിനെയും റഷ്യൻ പ്രസിഡന്റ് പുടിനെയും കണ്ടത് ലജ്ജാകരമെന്ന് ട്രംപിന്റെ വാണിജ്യ ഉപദേഷ്ടാവ് പീറ്റർ നവാരോ കുറ്റപ്പെടുത്തി. ഇന്ത്യ യു.എസിനോടാണ് അടുക്കേണ്ടതെന്നും റഷ്യയോടല്ലെന്നും അദ്ദേഹം പറഞ്ഞു. ഇതും ഇന്ത്യ ചൈനയോടും റഷ്യയോടും കൂടുതൽ അടുക്കുന്നതിലെ യു.എസിന്റെ ആശങ്ക വ്യക്തമാക്കുന്നതായി.