തിരുവനന്തപുരം: ഓണക്കാലത്ത് 3000 സുരക്ഷിത പച്ചക്കറി വിപണന കേന്ദ്രങ്ങളുമായി കൃഷിവകുപ്പ്. ഫാംഫ്രഷ് കേരള വെജിറ്റബിള്‍സ് എന്ന ബ്രാന്‍ഡിലായിരിക്കും വിപണികള്‍ പ്രവര്‍ത്തിക്കുക. 12 കോടിയാണ് ഇതിനുവേണ്ടി വകയിരുത്തിയിരിക്കുന്നത്. അഞ്ച് കോടി ഹോര്‍ട്ടികോര്‍പ്പിനുള്ളതാണ്. ഓണസമൃദ്ധി വിപണികളുടെ സംസ്ഥാനതല ഉദ്ഘാടനം നാളെ വൈകിട്ട് മൂന്നിന് പാളയം ഹോര്‍ട്ടികോര്‍പ്പ് വിപണിയില്‍ മുഖ്യമന്ത്രി പിണറായി വിജയന്‍ നിര്‍വഹിക്കും. കാര്‍ഷിക വകുപ്പിന്റെ 1350 ഔദ്യോഗിക വിപണനകേന്ദ്രങ്ങള്‍ ഉള്‍പ്പെടെ 3000ത്തോളം ചെറുകിട കേന്ദ്രങ്ങളായിരിക്കും പ്രവര്‍ത്തിക്കുക. ഇതില്‍ കൃഷിഭവനുകള്‍ പ്രാദേശികതലത്തില്‍ തയ്യാറാക്കുന്ന 980 ഓണസമൃദ്ധി ചന്തകളും ഉണ്ടാവും. പച്ചക്കറികള്‍ക്ക് 30 ശതമാനം സബ്‌സിഡി ലഭിക്കും. ഹോര്‍ട്ടികോര്‍പ്പിന്റെ നേതൃത്വത്തില്‍ 180 വിപണികളും വി.എഫ്.പി.സി.കെയുടെ 190 വിപണികള്‍ക്കും പുറമെ കുടുംബശ്രീ ഉള്‍പ്പെടെയുള്ള ഇതര സ്ഥാപനങ്ങളുടെ ഓണ വിപണികളും ചേര്‍ന്നതാണ് ഓണസമൃദ്ധിയെന്ന് കൃഷി മന്ത്രി വി.എസ് സുനില്‍കുമാര്‍ വാര്‍ത്താസമ്മേളനത്തില്‍ പറഞ്ഞു. 40,000 മെട്രിക് ടണ്‍ സുരക്ഷിത പച്ചക്കറികളും 60,000 മെട്രിക് ടണ്‍ പഴവര്‍ഗങ്ങളും ലഭ്യമാക്കുകയാണ് ലക്ഷ്യം. കേരളത്തില്‍ ഉല്‍പാദിപ്പിക്കുന്ന18 തരം പച്ചക്കറികള്‍ ഈ വിപണികള്‍ വഴി വില്‍ക്കും.
വട്ടവട-കാന്തല്ലൂര്‍ വിഭവങ്ങളുടെ പവലിയനും ഓണവിപണിയില്‍ ഉണ്ടാവും. സമതലങ്ങളില്ലാത്ത പ്രത്യേക ബീന്‍സ് ഇനങ്ങളും മരത്തക്കാളി, ആപ്പിള്‍ ചെടികള്‍, വെളുത്തുള്ളി ചെടികള്‍ തുടങ്ങിയ സവിശേഷ ഇനങ്ങള്‍ ഈ പവലിയനില്‍ പ്രദര്‍ശനത്തിനുണ്ടാകും. തമിഴ്‌നാട്ടില്‍ നിന്നെത്തുന്നവ ഘട്ടംഘട്ടമായി കുറയ്ക്കുമെന്നും എന്നാല്‍ കേരളത്തില്‍ ഉല്‍പ്പാദനം വര്‍ധിപ്പിച്ചാല്‍ മാത്രമേ ഇതിനു സാധിക്കുകയുള്ളൂവെന്നും മന്ത്രി പറഞ്ഞു.
എല്ലാ ഓണവിപണികളിലും കൃഷി വകുപ്പ് നേരിട്ട് ഇടപെടും. അവിടെയെല്ലാം ഫാംഫ്രഷ് കേരള ബ്രാന്‍ഡില്‍ പച്ചക്കറികള്‍ സംഭരിച്ച് വിതരണം ചെയ്യുമെന്നും മന്ത്രി പറഞ്ഞു. വിപണികളില്‍ നാടനും തമിഴ്‌നാട്ടില്‍ നിന്നുള്ളവയും വെവ്വേറെയാണ് വില്‍ക്കുക. തമിഴ്‌നാട്ടില്‍ നിന്നുള്ള പച്ചക്കറികള്‍ തിരിച്ചറിയാന്‍ തമിഴ്‌നാട് പച്ചക്കറികള്‍ എന്ന ബോര്‍ഡ് എഴുതി വെയ്ക്കുമെന്നും അദ്ദേഹം പറഞ്ഞു. കാര്‍ഷികമേഖലയ്ക്കുവേണ്ടി അടുത്തവര്‍ഷം മുതല്‍ വിപുലമായ പദ്ധതികളാണ് ആലോചിക്കുന്നത്. വ്യക്തമായ ആസൂത്രണമില്ലാത്തതാണ് നല്ല പച്ചക്കറികള്‍ വിപണികളില്‍ എത്തിക്കാന്‍ സാധിക്കാത്തത്. അടുത്തവര്‍ഷം മുതല്‍ പൂര്‍ണമായും നാടന്‍ പച്ചക്കറികള്‍ വിപണിയിലെത്തിക്കാന്‍ വന്‍തോതില്‍ കൃഷി ആരംഭിക്കും. വൈവിധ്യം, ഗുണമേന്മ, ലഭ്യത എന്നിവയില്‍ അധിഷ്ടിതമായ കൃഷി രീതിയായിരിക്കും അത്.