പാലക്കാട്: പാലക്കാട് ജില്ലയിലെ അലനല്ലൂരിൽ വാഹനാപകടത്തെ തുടർന്നുണ്ടായ സംഘർഷത്തിൽ നടുറോഡിൽ കത്തിക്കുത്ത്  നടന്ന സംഭവത്തിൽ പ്രതികളെ പിടികൂടാൻ പൊലിസ് അന്വേഷണം ശക്തമാക്കി. സംഭവവുമായി ബന്ധപ്പെട്ട കൂടുതൽ ദൃശ്യങ്ങൾ പുറത്തുവന്നെങ്കിലും, ആറംഗ സംഘത്തിൽ ഒരാൾ മാത്രമാണ് നിലവിൽ പിടിയിലായിരിക്കുന്നത്. ബാക്കി അഞ്ച് പ്രതികൾക്കായി അന്വേഷണം ഊർജിതമാക്കിയതായി പൊലിസ് അറിയിച്ചു.

കഴിഞ്ഞ ഞായറാഴ്ച അലനല്ലൂർ സെന്ററിലാണ് സംഭവം നടന്നത്. കാട്ടുകുളം സ്വദേശി റഷീദ് ഓടിച്ചിരുന്ന കാർ, പ്രദേശവാസികളായ ആറംഗ സംഘം സഞ്ചരിച്ച മറ്റൊരു കാറിൽ ഇടിച്ചു. ഇതിനെ തുടർന്ന് ഇരു കൂട്ടർക്കുമിടയിൽ ചെറിയ വാക്കുതർക്കം ഉണ്ടായെങ്കിലും, ആദ്യം ഇവർ പിരിഞ്ഞു പോയി. എന്നാൽ, പ്രശ്നം പരിഹരിക്കാനായി റഷീദിന്റെ സഹോദരന്മാരായ അഷ്റഫ്, യൂസഫ്, ഷിഹാബ് എന്നിവർ സംഭവസ്ഥലത്തെത്തി. ഇവരെ കണ്ടതോടെ ആറംഗ സംഘം പ്രകോപിതരാവുകയും, കത്തി ഉപയോഗിച്ച് കുത്തുകയും ഇരുമ്പ് ദണ്ഡ് ഉൾപ്പെടെയുള്ള മാരകായുധങ്ങൾ ഉപയോഗിച്ച് ആക്രമിക്കുകയും ചെയ്തതായി പൊലിസ് എഫ്ഐആറിൽ പറയുന്നു.

ആക്രമണത്തിൽ യൂസഫിനും ഷിഹാബിനും തലയ്ക്ക് വെട്ടേറ്റു, അഷ്റഫിന് മുഖത്ത് ഗുരുതരമായ പരിക്കേറ്റു. ശബ്ദം കേട്ട് ഓടിക്കൂടിയ നാട്ടുകാർ മൂവരെയും ആശുപത്രിയിൽ എത്തിച്ചു. പ്രതികളെ പിടികൂടാൻ എത്തിയ പൊലിസിന് നേരെയും സംഘം കത്തി വീശി. ഇതോടെ നാട്ടുകാർ കമ്പുകളും വടികളുമായി പ്രതികൾക്കെതിരെ സംഘടിച്ചെത്തി. പ്രതികൾ പ്രദേശത്ത് ലഹരിമരുന്ന് വിതരണം ചെയ്യുന്നവരാണെന്നും നാട്ടുകാർ ആരോപിച്ചു.

സംഘർഷത്തിനിടെ പരിക്കേറ്റ് ആശുപത്രിയിൽ ചികിത്സ തേടിയ രണ്ടാം പ്രതി ഫിറോസിനെ അടുത്ത ദിവസം പൊലിസ് അറസ്റ്റ് ചെയ്ത് റിമാൻഡ് ചെയ്തു. മറ്റ് പ്രതികളായ നിഹാൽ, സാദിഖ് അലി, സഞ്ജിത്ത്, ഹസീബ്, സമീർ എന്നിവർക്കായി നാട്ടുകൽ പൊലിസ് അന്വേഷണം ഊർജിതമാക്കിയിട്ടുണ്ട്. അതേസമയം, റിമാൻഡിലുള്ള ഫിറോസിന്റെ പരാതിയിൽ, പരിക്കേറ്റ യൂസഫിനും കണ്ടാലറിയാവുന്ന മറ്റ് രണ്ട് പേർക്കെതിരെയും പൊലിസ് കേസെടുത്തു. ഫിറോസിന്റെ മകനെ മർദിക്കുന്നത് തടയാൻ ശ്രമിക്കവേ മരവടി ഉപയോഗിച്ച് ആക്രമിച്ചുവെന്നാണ് പരാതി.