തിരുവനന്തപുരം: കേരളത്തിലെ വിവിധ ദേവസ്വം ബോര്‍ഡുകളിലെ ഒരേ തസ്തികക്ക് പല യോഗ്യതകള്‍ വച്ച് അപേക്ഷകള്‍ ക്ഷണിക്കുന്നതായി പരാതി. കേരള ദേവസ്വം റിക്രൂട്ടമെന്റ് ബോര്‍ഡിനെ മറികടന്ന്, കേരളത്തിലെ മിക്ക ദേവസ്വം ബോര്‍ഡുകളും സ്വയം യോഗ്യതകള്‍ നിശ്ചയിക്കുന്നതായിട്ടാണ് ആക്ഷേപം. കേരളത്തിലെ ദേവസ്വം റിക്രൂട്ട്‌മെന്റ് ബോര്‍ഡുകളെ ഒന്നിപ്പിച്ച് ഏകീകൃതമായി പരീക്ഷകള്‍ നടത്തി നിയമനം നടത്താന്‍ നിലവില്‍വന്നതാണ് ദേവസ്വം റിക്രൂട്ട്മെന്റ് ബോർഡ്.

134 ഒഴിവുകളുള്ള ക്ലര്‍ക്ക്/ സബ്ഗ്രൂപ്പ് ഓഫിസര്‍ പരീക്ഷയ്ക്ക് ഇക്കഴിഞ്ഞ ഒന്നിന് ആയിരുന്നു കെ.ഡി.ആര്‍ ബിയുടേതായി തിരുവിതാംകൂര്‍ ദേവസ്വംബോര്‍ഡിലേക്ക് അപേക്ഷ ക്ഷണിച്ചത്. ഈ തസ്തികയ്ക്ക് നേരത്തെയുള്ള യോഗ്യത എസ്.എസ്.എല്‍.സി ആയിരുന്നു. എന്നാലിപ്പോൾ  പ്ലസ്ടുവും വേഡ് പ്രോസസിങും  പകരം പുതിയ യോഗ്യതയായി ഉയര്‍ത്തിയാണ് വിജ്ഞാപനം ഇറക്കിയത്. 
ഏകീകൃതമായി പരീക്ഷാ യോഗ്യതയിലോ നടത്തിപ്പിലോ വേണ്ട ഇടപെടലുകള്‍ നടത്താന്‍ കെ.ഡി.ആര്‍.ബിക്ക് കഴിയുന്നില്ല.ഇതിനായി യോഗ്യത മാറ്റി ഗസറ്റ് വിജ്ഞാപനം വേഗത്തിലാക്കി തട്ടിക്കൂട്ട് വിജ്ഞാപനം പുറത്തിറക്കുകയായിരുന്നു. ഇതിനൊപ്പം തന്നെ മിക്ക പരീക്ഷകളുടെയും യോഗ്യതകളും മാറ്റിയിട്ടുണ്ട്. 

ദേവസ്വത്തിലെ 14 ഒഴിവുകളുള്ള പ്യൂണിന്  വരെ എസ്.എസ്.എല്‍.സി യോഗ്യതയാക്കി, ഒപ്പം പണ്ട് പി.എസ്.സി വരെ ഒഴിവാക്കിയ സൈക്കിളിങ് ടെസ്റ്റും അഭികാമ്യയോഗ്യതയാക്കി പുനര്‍നിര്‍ണയിച്ചു.നിലവിലെ സംഭവങ്ങളോടെ കെ.ഡി.ആര്‍.ബി  കടലാസ്-ഏജന്‍സിയായി  മാറിയതായി ഉദ്യോഗാര്‍ഥികള്‍ക്ക് പരാതിയുണ്ട്. 

ALSO READ: കുതിപ്പിനിടെ ഒരടി പിന്നോട്ട്; ഇന്ന് സ്വര്‍ണവിലയില്‍ നേരിയ കുറവ്, പ്രതീക്ഷ വെക്കാന്‍ വരട്ടേ 

കെ.ഡി.ആര്‍.ബി  ചെയര്‍മാനും സെക്രട്ടറിയും അംഗങ്ങളും അടങ്ങുന്ന ബോര്‍ഡിനായി ഏറെ തുക ശമ്പളയിനത്തില്‍ തന്നെ ചിലവാകുന്നുണ്ട്. പുതിയ  എല്‍.ഡി ക്ലര്‍ക്കിന്റെ വിജ്ഞാപനം വിവാദമായിട്ടും തീരുമാനമെടുക്കാത്ത കെ.ഡി.ആര്‍.ബി നിലപാട് സംശയത്തിന് കാരണമായിട്ടുണ്ട്.
വേഡ് പ്രൊസസിങ് യോഗ്യതവച്ച് കുറച്ച് പേരെ തിരുകിക്കയറ്റാന്‍ തിടുക്കപ്പെട്ട് സര്‍ക്കാരിനെ കൊണ്ട് ഗസറ്റ് വിജ്ഞാപനം ഇറക്കിയതാണ് പരാതിയിലേക്ക് നയിച്ചത്.അതാത് ബോര്‍ഡുകളാണ് യോഗ്യതകള്‍ നിശ്ചയിക്കുന്നതെന്ന് ന്യായീകരണം നടത്തിയാണ് കെ.ഡി.ആര്‍.ബി തടിയൂരുന്നത്. ഇക്കഴിഞ്ഞ ഒന്നിന് തൃശൂർ കൂടല്‍മാണിക്യ ക്ഷേത്രത്തില്‍ ഇതേ തസ്തികയുടെ വിജ്ഞാപനത്തിൽ യോഗ്യത എസ്.എസ്.എല്‍.സിയും കംപ്യൂട്ടറില്‍ അറിവും  മതിയായിരുന്നു. 

അതിനിടെയാണ് തിരുവിതാംകൂര്‍ ദേവസ്വംബോര്‍ഡിലെ വിജ്ഞാപനത്തിൽ അംഗീകൃത സ്ഥാപനത്തില്‍ നിന്നുള്ള കംപ്യൂട്ടര്‍ സര്‍ട്ടിഫിക്കറ്റ്  ചോദിച്ചത്. അതിനുമുന്‍പ് അപേക്ഷ ക്ഷണിച്ചപ്പോള്‍ എസ്.എസ്.എല്‍.സി മാത്രമായിരുന്നു യോഗ്യത. ക്ഷേത്രങ്ങളിലെ സബ്  ഗ്രൂപ്പ് ഓഫിസർക്ക് മുകളിലുള്ള, അസി. കമ്മിഷനര്‍ ഓഫിസുകളില്‍ മാത്രമാണ് നാമമാത്രമായി എങ്കിലും കംപ്യൂട്ടറുകള്‍ ഉപയോഗിക്കുന്നത്.

Controversy erupts as Devaswom Recruitment Board invites applications with different qualifications for the same post. Allegations of irregularities surface.