തിരുവനന്തപുരം: യൂത്ത് കോൺഗ്രസ് കേരള ഘടകത്തിന്റെ പുതിയ സംസ്ഥാന അധ്യക്ഷനെ ഒരാഴ്ചയ്ക്കുള്ളിൽ പ്രഖ്യാപിക്കുമെന്ന് സൂചന. നിലവിലെ ദേശീയ ജനറൽ സെക്രട്ടറി ബിനു ചുള്ളിയിൽ, സംസ്ഥാന വൈസ് പ്രസിഡന്റുമാരായ അബിൻ വർക്കി, ഒ.ജെ. ജനീഷ്, മുൻ കെഎസ്‌യു സംസ്ഥാന അധ്യക്ഷൻ കെ.എം. അഭിജിത്ത് എന്നിവരാണ് പ്രധാന പരിഗണനയിലുള്ളത്. 

ഓഗസ്റ്റ് 21-ന് രാഹുൽ മാങ്കൂട്ടത്തിൽ രാജിവെച്ചതിനു പിന്നാലെ ഉടലെടുത്ത നേതൃത്വ വിടവ് നികത്താൻ ദേശീയ നേതൃത്വം ശ്രമം തുടരുന്നതിനിടെയാണ് പുതിയ വിവരങ്ങൾ പുറത്തുവരുന്നത്.

ALSO READ: കുന്നംകുളം കസ്റ്റഡി മർദനം: ദൃശ്യങ്ങൾ പുറത്തുവന്നതിന് പിന്നാലെ മുഖ്യമന്ത്രിക്കൊപ്പം ഓണസദ്യ കഴിച്ചത് 'മോശമായിപ്പോയി'; സതീശനെതിരെ രൂക്ഷ വിമർശനവുമായി കെ. സുധാകരൻ

കേരളത്തിന്റെ ചുമതലയുള്ള യൂത്ത് കോൺഗ്രസ് അഖിലേന്ത്യാ ജനറൽ സെക്രട്ടറി ശ്രാവൺ റാവു സംസ്ഥാന നേതാക്കളുമായി നേരിട്ട് ചർച്ച നടത്തിയതായി വിവരമുണ്ട്. പ്രതിപക്ഷ നേതാവ് വി.ഡി. സതീശൻ രണ്ടു പേരുകളും കെപിസിസി അധ്യക്ഷൻ കെ. സുധാകരൻ മൂന്നു പേരുകളും മുൻ മുഖ്യമന്ത്രി രമേശ് ചെന്നിത്തല ഒരു പേരും നിർദേശിച്ചതായി അറിയുന്നു. സെപ്റ്റംബർ 10-നു മുൻപ് പ്രഖ്യാപനമുണ്ടാകുമെന്നാണ് സൂചന.
കഴിഞ്ഞ സംഘടനാ തെരഞ്ഞെടുപ്പിൽ രാഹുൽ മാങ്കൂട്ടത്തിലിനോട് പരാജയപ്പെട്ടെങ്കിലും ഏറ്റവും കൂടുതൽ വോട്ടുകൾ നേടിയ അബിൻ വർക്കിയെ അധ്യക്ഷനാക്കണമെന്ന ആവശ്യം ശക്തമാണ്. എന്നാൽ, സാമുദായിക സമവാക്യങ്ങൾ മുൻനിർത്തി അബിനെ ഒഴിവാക്കിയാൽ അതൃപ്തി പരസ്യമാകുമെന്ന ആശങ്കയുണ്ട്. നിലവിൽ കോൺഗ്രസ്, കെഎസ്‌യു, മഹിളാ കോൺഗ്രസ് അധ്യക്ഷ സ്ഥാനങ്ങൾ ന്യൂനപക്ഷ വിഭാഗങ്ങളിലെ നേതാക്കളാണ് വഹിക്കുന്നത്.

ALSO READ: കുന്നംകുളം കസ്റ്റഡി മർദനം: പ്രതികളായ പൊലിസ് ഉദ്യോഗസ്ഥരെ സസ്പെൻഡ് ചെയ്യാൻ ഡിഐജിയുടെ ശുപാർശ  

ഇതിനിടെ, 'എ' ഗ്രൂപ്പ് കെ.എം. അഭിജിത്തിനും എസ്. അഖിലിനും പിന്തുണ പ്രഖ്യാപിച്ചിട്ടുണ്ട്. ദേശീയ പുനഃസംഘടനയിൽ ജനറൽ സെക്രട്ടറിയായ ബിനു ചുള്ളിയിലിന് കെ.സി. വേണുഗോപാലുമായുള്ള അടുപ്പം അനുകൂല ഘടകമാകുമെന്നാണ് അനുയായികളുടെ വിശ്വാസം. ഒ.ജെ. ജനീഷിനും സംസ്ഥാനതല ചർച്ചകളിൽ പ്രാധാന്യമുണ്ട്. അതേസമയം, അധ്യക്ഷ നിയമനം വൈകുന്നത് സംഘടനയിൽ അസ്വസ്ഥതയുണ്ടാക്കുന്നുവെന്ന് ചില നേതാക്കൾ പരസ്യമായി വിമർശിച്ചു.

ALSO READ: ബീഡി-ബിഹാർ വിവാദം: വി.ടി. ബൽറാം കെപിസിസി സോഷ്യൽ മീഡിയ ചുമതലയൊഴിഞ്ഞു; ഡിജിറ്റൽ വിങ് പുനഃസംഘടിപ്പിക്കും  

ലൈംഗികാരോപണങ്ങളെ തുടർന്നായിരുന്നു രാഹുൽ മാങ്കൂട്ടത്തിലിന്റെ രാജി. അതിനുശേഷം പാർട്ടി പുനരുദ്ധാരണ ചർച്ചകൾ വൈകുന്നതായി വിമർശനമുയർന്നിരുന്നു. അസ്വാരസ്യങ്ങൾ ഇല്ലാതെ എല്ലാവരെയും ഒരുമിച്ചു കൊണ്ടുപോകാൻ കഴിയുന്ന ശക്തമായ നേതൃത്വം വേണമെന്നാണ് പൊതുവികാരം. പ്രഖ്യാപനം വരുന്നതോടെ യൂത്ത് കോൺഗ്രസിലെ ആഭ്യന്തര ഗ്രൂപ്പ് പോരാട്ടങ്ങൾക്ക് താത്കാലിക വിരാമമാകുമെന്നാണ് പ്രതീക്ഷ.

ALSO READ: കൊല്ലത്ത് തിരുവോണ ദിനത്തിൽ ക്ഷേത്രമുറ്റത്ത് പൂക്കളമിട്ടതിനെ ചൊല്ലിയുണ്ടായ തർക്കം; ആർഎസ്എസ് പ്രവർത്തകർക്കെതിരെ കേസെടുത്ത് പൊലിസ്

The Youth Congress is set to announce its new Kerala state president within a week. K.M. Abhijith, Abin Varkey, and Binu Chulliyil are among the key contenders being considered for the role