ലണ്ടൻ: ബ്രിട്ടനിലെ തീവ്രവലതുപക്ഷ ആക്ടിവിസ്റ്റ് ടോമി റോബിൻസൺ (സ്റ്റീഫൻ യാക്സ്ലി-ലെനോൺ) ലണ്ടന്റെ ഹൃദയഭാഗത്ത് ലക്ഷക്കണക്കിന് ജനങ്ങളെ അണിനിരത്തി സംഘടിപ്പിച്ച കുടിയേറ്റ വിരുദ്ധ റാലി ലോകശ്രദ്ധ നേടിയിരിക്കുന്നു. 'യുണൈറ്റ് ദി കിങ്ഡം' എന്ന പേരിൽ നടന്ന ഈ മെഗാ പ്രതിഷേധം അനധികൃത കുടിയേറ്റത്തിനും അത് പ്രോത്സാഹിപ്പിക്കുന്ന സർക്കാരിനുമെതിരായിരുന്നു. അതിർത്തി നിയന്ത്രണം, ബ്രിട്ടീഷ് സംസ്കാരം സംരക്ഷിക്കൽ എന്നീ മുദ്രാവാക്യങ്ങൾ ഉയർത്തിക്കൊണ്ട് നടന്ന റാലി പൊലിസുമായുള്ള ഏറ്റുമുട്ടലുകളിലും അറസ്റ്റുകളിലും അവസാനിച്ചു. ഏകദേശം 1,10,000-ത്തിലധികം പേർ പങ്കെടുത്ത ഈ സംഭവത്തിൽ 26 പൊലിസുകാർക്ക് പരിക്കേറ്റു, നാല് പേർക്ക് പരിക്ക് ഗുരുതരമായിരുന്നു.

കുടിയേറ്റക്കാരുടെ കടന്നുകയറ്റം തടയുക, രേഖകളില്ലാത്തവരെ നാടുകടത്തുക, തദ്ദേശീയ ബ്രിട്ടീഷുകാർക്ക് മുൻഗണന നൽകുക എന്നിവയാണ് റാലിയിലെ പ്രധാന ആവശ്യങ്ങൾ. എന്നാൽ, കുടിയേറ്റ വിരുദ്ധ നിലപാട് മുന്നോട്ടുവെക്കുന്ന റോബിൻസണിന്റെ ഇന്ത്യൻ പൗരന്മാരോടുള്ള മൃദുസമീപനമാണ് ഇപ്പോൾ വിമർശനത്തിന് കാരണമായത്. യുകെയിലെ ഇന്ത്യാക്കാരെ 'സമാധാനപ്രിയരും ബ്രിട്ടീഷ് ജീവിതവുമായി ഇഴുകിച്ചേരുന്നവരും' എന്ന് വിശേഷിപ്പിക്കുന്ന അദ്ദേഹത്തിന്റെ പരാമർശങ്ങൾ തീവ്രവലതുപക്ഷ വിമർശകരെ പ്രകോപിപ്പിച്ചു. മുസ്‌ലിം  കുടിയേറ്റക്കാരോടുള്ള വിദ്വേഷം റോബിൻസണിൽ പ്രതിഫലിച്ചു കാണാം, എന്നാൽ ഇന്ത്യാക്കാരുടെ കുടിയേറ്റത്തിൽ മൃതുസമീപനം എടുക്കുന്നത് അദ്ദേഹത്തിന്റെ നിലപാടിന്റെ വൈരുദ്ധ്യമാണെന്നാണ് ഉയരുന്ന ആരോപണം.

റോബിൻസണിന്റെ പ്രചാരണങ്ങളിൽ മുസ്‌ലിം  വിദ്വേഷം പ്രതിഫലിക്കുന്നുവെന്ന ആരോപണങ്ങൾ നിലനിൽക്കുമ്പോഴാണ് ഇന്ത്യാക്കാരോടുള്ള ഈ മൃദുഭാഷണം ഉയർന്നുവരുന്നത്. മുസ്ലിം രാജ്യങ്ങളിൽ നിന്നുള്ള കുടിയേറ്റക്കാരും ഇന്ത്യാക്കാരും തമ്മിൽ വേർതിരിവ് സൃഷ്ടിക്കാൻ അദ്ദേഹം ശ്രമിക്കുന്നുവെന്ന് വിമർശകർ ചൂണ്ടിക്കാട്ടുന്നു. 2022-ൽ ഏഷ്യാ കപ്പ് മത്സരത്തിന് ശേഷം ലെസ്റ്ററിൽ ബ്രിട്ടീഷ് ഹിന്ദുക്കളും മുസ്‌ലിങ്ങളും തമ്മിൽ ഏറ്റുമുട്ടിയപ്പോൾ, ആവശ്യമെങ്കിൽ ഹിന്ദുക്കളെ പിന്തുണയ്ക്കാൻ 'വ്യക്തിപരമായി നൂറുകണക്കിന് ആളുകളെ അണിനിരത്താം' എന്ന് റോബിൻസൺ പ്രഖ്യാപിച്ചിരുന്നു. ഈ സംഭവത്തിൽ അദ്ദേഹം ഹിന്ദു ദേശീയവാദികളുടെ 'ശിക്ഷാ' വാദങ്ങൾ ആവർത്തിച്ചു.

അഭിപ്രായ സ്വാതന്ത്ര്യത്തിന്റെയും ദേശീയ സ്വത്വത്തിന്റെയും പ്രതിരോധമായി തന്റെ ആക്ടിവിസത്തെ ചിത്രീകരിക്കുന്ന റോബിൻസൺ, മുസ്‌ലിം  മതവിശ്വാസികളെ 'ആക്രമണകാരികളും കുറ്റവാളികളുമായി' കാണുന്ന വ്യക്തമായ വേർതിരിവാണ് പ്രദർശിപ്പിക്കുന്നത്. 2022-ൽ ഓപ് ഇന്ത്യയ്ക്ക് നൽകിയ അഭിമുഖത്തിൽ, യുകെയിലെ ഹിന്ദുക്കൾ 'അന്യായമായി ലക്ഷ്യമാക്കപ്പെടുന്നു' എന്ന് അദ്ദേഹം പറഞ്ഞു. പ്രധാനമന്ത്രി നരേന്ദ്ര മോദിയുടെ തിരഞ്ഞെടുപ്പിനെ 'പോപ്പുലിസ്റ്റ് വിപ്ലവം' എന്ന് പുകഴ്ത്തിയ പോസ്റ്റുകളും ലേഖനങ്ങളും അദ്ദേഹത്തിനെതിരെ ആയുധമായി പ്രചരിക്കുന്നു. ഈ നിലപാടുകൾ ഹിന്ദുത്വ ആശയങ്ങളുമായി യോജിക്കുന്നതായി വിമർശകർ ചൂണ്ടിക്കാട്ടുന്നു, മുസ്ലിം-മൈഗ്രന്റ്-ലിബറൽ മൂല്യങ്ങൾ എന്ന പൊതു ശത്രുക്കളെ ചൂണ്ടിക്കാട്ടുന്നു.

റാലിയുടെ സമയത്ത്, കുടിയേറ്റ വിരുദ്ധ പ്രതിഷേധകർ ഇന്ത്യൻ ഭക്ഷണം (ഉള്ളി ഭജിക്കൾ, ബിരിയാണി, സമോസകൾ) ആസ്വദിക്കുന്നത് സോഷ്യൽ മീഡിയയിൽ വിമർശനത്തിന് വിധേയമായി. 'ഇന്ത്യൻ സ്ട്രീറ്റ് ഫുഡ്' വിൽപ്പനക്കാർക്ക് മുന്നിൽ നിന്ന് ഭക്ഷണം വാങ്ങുന്നത് അദ്ദേഹത്തിന്റെ നിലപാടിന്റെ വൈരുദ്ധ്യമായി ചിത്രീകരിക്കപ്പെട്ടു. റോബിൻസണിന്റെ X അക്കൗണ്ട് (ഇലോൺ മസ്ക്കിന്റെ പിന്തുണയോടെ) ലക്ഷക്കണക്കിന് ഫോളോവേഴ്സിനെ സ്വാധീനിക്കുന്നുണ്ട്, എന്നാൽ ഇന്ത്യൻ സമൂഹത്തോടുള്ള അനുകൂല നിലപാട് തീവ്രവലതുപക്ഷക്കാരെ 'ഹിന്ദു ദേശീയവാദത്തെ യൂറോപ്യൻ ഫാർ-റൈറ്റ് രാഷ്ട്രീയത്തിലേക്ക് സമന്വയിപ്പിക്കുന്നു' എന്ന് ആരോപിക്കാൻ പ്രേരിപ്പിക്കുന്നു.