പാലക്കാട്: പുതുപ്പരിയാരത്ത് യുവതി ആത്മഹത്യ ചെയ്ത സംഭവത്തിൽ ഭർത്താവിനെ പൊലിസ് അറസ്റ്റ് ചെയ്തു. പൂച്ചിറ സ്വദേശി അനൂപിനെയാണ് പൊലീസ് കസ്റ്റഡിയിലെടുത്തത്. 29-കാരിയായ മീര എന്ന യുവതിയെ സെപ്റ്റംബർ 10-ന് ഭർത്താവിന്റെ വീട്ടിൽ മരിച്ച നിലയിൽ കണ്ടെത്തിയിരുന്നു. അനൂപിനെതിരെ ആത്മഹത്യാ പ്രേരണയ്ക്ക് കേസെടുത്താണ് അറസ്റ്റ് ചെയ്തിരിക്കുന്നത്. മീരയുടെ ആത്മഹത്യാ കുറിപ്പിൽ, തന്നോടും തന്റെ ആദ്യ വിവാഹത്തിലെ കുഞ്ഞിനോടും ഭർത്താവ് സ്നേഹവും പരിഗണനയും കാണിച്ചില്ലെന്ന് വ്യക്തമാക്കിയിരുന്നു. ഈ കുറിപ്പ് അടിസ്ഥാനമാക്കിയാണ് പൊലീസ് അന്വേഷണം ആരംഭിച്ചത്.

പുതുപ്പരിയാരം പൂച്ചിറയിലെ ഭർത്താവിന്റെ വീട്ടിൽ മീരയെ മരിച്ച നിലയിൽ കണ്ടെത്തുകയായിരുന്നു. ഭർത്താവുമായുള്ള അഭിപ്രായ വ്യത്യാസത്തെ തുടർന്ന് മീര സ്വന്തം വീട്ടിലേക്ക് മടങ്ങിയിരുന്നു. എന്നാൽ, അന്ന് രാത്രി അനൂപ് എത്തി മീരയെ തിരികെ ഭർതൃവീട്ടിലേക്ക് കൂട്ടിക്കൊണ്ടുപോയി. മണിക്കൂറുകൾക്കുള്ളിൽ മീരയുടെ മരണവാർത്ത വന്നു. ഒരു വർഷം മുമ്പാണ് മീരയും അനൂപും വിവാഹിതരായത്, ഇരുവരുടേയും രണ്ടാം വിവാഹമായിരുന്നു ഇത്. മീരയുടെ ആദ്യ വിവാഹത്തിലെ കുഞ്ഞിനോട് അനൂപ് ശ്രദ്ധ കാണിക്കുന്നില്ലെന്ന് മീര നേരത്തെ പരാതിപ്പെട്ടിരുന്നു. ഇതുസംബന്ധിച്ച് ഇരുവർക്കുമിടയിൽ തർക്കങ്ങൾ നിലനിന്നിരുന്നതായി മീരയുടെ കുടുംബാംഗങ്ങൾ പറയുന്നു.

അനൂപിന്റെ നിരന്തരമായ മാനസിക പീഡനമാണ് മീരയെ ആത്മഹത്യയിലേക്ക് നയിച്ചതെന്നാണ് കുടുംബത്തിന്റെ ആരോപണം. മീരയുടെ മൃതദേഹം പാലക്കാട് ജില്ലാ ആശുപത്രിയിലെ മോർച്ചറിയിലേക്ക് മാറ്റിയ ശേഷമാണ് വീട്ടുകാരെ വിവരം അറിയിച്ചതെന്നും കുടുംബം ചൂണ്ടിക്കാട്ടുന്നു. മീരയുടെ മരണത്തെക്കുറിച്ച് പൊലിസ് വിശദമായ അന്വേഷണം നടത്തിവരികയാണ്.