തിരുവനന്തപുരം: യാത്രക്കിടയിൽ ഏറ്റവും കൂടുതൽ ആളുകൾ ആശ്രയിക്കുന്ന കുടിവെള്ളത്തിന്റെ വില കുറച്ച് റെയിൽവേ. റെയില്‍വേ ബോര്‍ഡ് ഇന്നലെയാണ് കുപ്പിവെള്ളത്തിന്റെ കുറയ്ക്കാൻ അനുമതി നൽകിയത്. ഒരു ലിറ്റർ വെള്ളത്തിന്റെ വില 14 രൂപയായാണ് കുറച്ചത്. നാളെ മുതല്‍ പുതിയ വില നിലവില്‍വരും.

ഐ.ആര്‍.സി.ടി.സി. വഴി വിതരണം ചെയ്യുന്ന 'റെയില്‍നീര്‍' കുപ്പിവെള്ളത്തിന്റെ വിലയാണ് കുറച്ചത്. ഒരു ലിറ്റര്‍ കുപ്പിവെള്ളത്തിന്റെ വില 15ല്‍ നിന്നും 14ആയി കുറച്ചു. റെയിൽവേയ്ക്ക് പുറത്ത് ഒരു ലിറ്ററിന് 20 രൂപ വിലയിൽ വിൽക്കുന്ന വെള്ളമമാണ് റെയിൽവേ സ്റ്റേഷനുകളിലും ട്രെയിനിലും 14 രൂപയ്ക്ക് ലഭിക്കുക. അരലിറ്ററിന്റെ കുപ്പിവെള്ളത്തിന് 10 രൂപ എന്ന വില ഒമ്പത് രൂപയായും കുറച്ചിട്ടുണ്ട്.

റെയില്‍വേ സ്റ്റേഷനുകളിലും ട്രെയിനുകളിലും വിതരണം ചെയ്യുന്ന മറ്റ് ബ്രാന്‍ഡുകള്‍ക്കും പരമാവധി റെയില്‍നീരിന്റെ അതേവില മാത്രമെ ഉപയോഗിക്കാവു എന്നും റെയില്‍വേ സര്‍ക്കുലറിലൂടെ നിര്‍ദ്ദേശിച്ചിട്ടുണ്ട്.

നിലവില്‍ 20 പ്ലാന്റുകള്‍ വഴിയാണ് രാജ്യത്തെ 410 റെയില്‍വേ സ്റ്റേഷനുകളിലും ട്രെയിനുകളിലും റെയില്‍നീര്‍ ഉല്‍പ്പാദിപ്പിച്ച് വിതരണം ചെയ്യുന്നത്. കേരളത്തില്‍ തിരുവനന്തപുരം ജില്ലയിലെ പാറശാലയിലാണ് പ്ലാന്റുള്ളത്.

കഴിഞ്ഞ സാമ്പത്തിക വര്‍ഷം 46.46 കോടി കുപ്പി വെള്ളമാണ് റെയില്‍വേ വില്‍പ്പന നടത്തിയത്. ഇതുവഴി 378.58 കോടിയുടെ വിറ്റുവരവാണ് നേടിയത്. ഇത് ഐ.ആര്‍.സി.ടി.സിയുടെ ആകെ വരുമാനത്തിന്റെ 8.10 ശതമാനമാണ്.