തിരുവനന്തപുരം: സർക്കാർ മെഡിക്കൽ കോളേജുകളിലെക്കുള്ള ഹൃദയ ശസ്ത്രക്രിയ ഉപകരണങ്ങളുടെ വിതരണം നിർത്തിവെച്ച വിതരണക്കാർ കടുത്ത നിലപാടിലേക്കും നീങ്ങുന്നു. 158 കോടി രൂപയുടെ കുടിശ്ശിക ഇതുവരെ അടച്ചു തീർക്കാത്തതിനാൽ നിലവിൽ നൽകിയിരിക്കുന്ന സ്റ്റോക്ക് തിരിച്ചെടുക്കുമെന്ന് അറിയിച്ചുകൊണ്ട് മെഡിക്കൽകോളേജുകൾക്ക് വിതരണക്കാർ കത്ത് നൽകി.

ഒക്ടോബർ 5 വരെ കാത്തിരിക്കുമെന്നും അതിനുള്ളിൽ പണം അടച്ചില്ലെങ്കിൽ ഉപകരണങ്ങൾ തിരിച്ചെടുക്കുമെന്നുമാണ് കത്തിലൂടെ സർക്കാരിന് മുന്നറിയിപ്പ് നൽകിയിരിക്കുന്നത്. സെപ്തംബർ 1 മുതൽ ഉപകരണ വിതരണം നിർത്തിവെച്ചിരുന്ന വിതരണക്കാർ, മാർച്ച് 31 വരെയുള്ള എല്ലാ തുകയും അടച്ചുതീർക്കണമെന്നാണ് സർക്കാരിനോട് ആവശ്യപ്പെടുന്നത്. 

തിരുവനന്തപുരം മെഡിക്കൽ കോളേജിലെ കാർഡിയോളജി, യൂറോളജി വിഭാഗങ്ങളിലെ ശസ്ത്രക്രിയകൾ മുടങ്ങിയ അവസ്ഥയിലെത്തിയപ്പോൾ, കുടിശ്ശിക തീർക്കുന്നതിന് മുമ്പുതന്നെ ഉപകരണങ്ങൾ എത്തിച്ചിരുന്നു. എന്നാൽ, ഇപ്പോഴും പണം ലഭിക്കാത്തതിനാൽ കടുത്ത നടപടികളിലേക്ക് നീങ്ങിയിരിക്കുകയാണ് വിതരണക്കാർ.

സർക്കാർ പ്രതിനിധികളുമായി നടത്തിയ ചർച്ചകൾ ഫലം കാണാതെ വന്നതോടെയാണ് ഈ നിലപാട് സ്വീകരിക്കുന്നതെന്ന് വിതരണക്കാർ പറയുന്നു. ആകെ ലഭിക്കാനുള്ള തുകയുമായി താരതമ്യപ്പെടുത്തുമ്പോൾ നാളിതുവരെ ലഭിച്ചത് തുച്ഛമായ പണം മാത്രമാണെന്നും കത്തിൽ വിതരണക്കാർ ചൂണ്ടിക്കാട്ടി. ഓഗസ്റ്റ് 29-നും ഇതേ വിഷയം സൂചിപ്പിച്ച് കത്ത് നൽകിയിരുന്നതായി അവർ വ്യക്തമാക്കി.

കേരളത്തിലെ 21 സർക്കാർ ആശുപത്രികളിൽ നിന്നാണ് 158.7 കോടി രൂപയുടെ കുടിശ്ശിക ഉണ്ടായത്. കോഴിക്കോട് മെഡിക്കൽ കോളേജ് (34.9 കോടി), തിരുവനന്തപുരം മെഡിക്കൽ കോളേജ് (29.56 കോടി), കോട്ടയം മെഡിക്കൽ കോളേജ് (21.74 കോടി) തുടങ്ങിയവയാണ് ഏറ്റവും കൂടുതൽ കുടിശ്ശികയുള്ളത്.

ഈ പ്രതിസന്ധി നിയമസഭയിലും ചർച്ചയായിരുന്നു. തിരുവനന്തപുരം മെഡിക്കൽ കോളേജ് യൂറോളജി വിഭാഗം മേധാവി ഡോ. ഹാരിസ് ചിറയക്കൽ, രോഗികളിൽ നിന്ന് പിരിവ് വാങ്ങി ഉപകരണങ്ങൾ വാങ്ങുന്നതായി വെളിപ്പെടുത്തിയിരുന്നു. പ്രതിപക്ഷം വിഷയം ഉയർത്തിയപ്പോൾ, ആരോഗ്യമന്ത്രി രോഗികളിൽ നിന്ന് പിരിവ് പാടില്ലെന്ന് നിർദേശിച്ചു. ഇതിനുപിന്നാലെ ശസ്ത്രക്രിയകളുടെ അഡ്മിഷൻ താത്കാലികമായി നിർത്തിവെച്ചു. നാല് ദിവസങ്ങൾക്ക് മുമ്പ് മാത്രമാണ് ഉപകരണങ്ങൾ വീണ്ടും എത്തിച്ചത്.

പ്രതിസന്ധി പരിഹരിക്കാൻ സർക്കാർ 100 കോടി രൂപ അനുവദിച്ചിട്ടുണ്ട്. ഇതിൽ 65 കോടി സർക്കാർ ആശുപത്രികൾക്കും 35 കോടി സ്വകാര്യ ആശുപത്രികൾക്കുമാണ്. എന്നാൽ, വിതരണക്കാർ പൂർണ തുക ആവശ്യപ്പെടുന്ന സാഹചര്യത്തിൽ പ്രതിസന്ധി തുടരാനാണ് സാധ്യത.

Suppliers of heart surgery equipment have threatened to reclaim stock from government medical colleges due to unpaid dues of ₹158 crore. The crisis has halted equipment supply since September 1, affecting critical surgeries in cardiology and urology departments, particularly at Thiruvananthapuram Medical College. Despite discussions, the government’s failure to clear the dues has led suppliers to issue a final warning, with a deadline of October 5.