ന്യൂഡൽഹി: പൊതുമേഖലാ ടെലികോം കമ്പനിയായ ഭാരത് സഞ്ചാർ നിഗം ലിമിറ്റഡിന്റെ (ബിഎസ്എൻഎൽ) ഉപഭോക്താക്കൾക്ക് സന്തോഷ വാർത്ത. നാളെ മുതൽ രാജ്യവ്യാപകമായി 4ജി സേവനങ്ങൾ ആരംഭിക്കാൻ ബിഎസ്എൻഎൽ ഒരുങ്ങുകയാണ്. 5ജി സേവനങ്ങൾക്കുള്ള പദ്ധതികളും കമ്പനി പ്രഖ്യാപിച്ചിട്ടുണ്ട്. ബിഎസ്എൻഎൽ ചെയർമാനും മാനേജിംഗ് ഡയറക്ടറുമായ എ. റോബർട്ട് ജെ. രവി ഇക്കാര്യം സ്ഥിരീകരിച്ചു.

ഈ മാസം അവസാനത്തോടെ രാജ്യത്തുടനീളം 4ജി നെറ്റ്‌വർക്ക് പൂർണമായും പ്രവർത്തനക്ഷമമാകുമെന്നും എല്ലാ ഉപഭോക്താക്കൾക്കും മെച്ചപ്പെട്ട നെറ്റ്‌വർക്ക് ലഭ്യമാകുമെന്നും റോബർട്ട് ജെ. രവി അറിയിച്ചു. ഭാരത് ഡിജിറ്റൽ ഇൻഫ്രാ സമ്മിറ്റ് 2025-ൽ നടത്തിയ പ്രസംഗത്തിൽ, സെപ്റ്റംബർ 27-ന് ഉദ്ഘാടനം ചെയ്യുന്ന 4ജി സേവനം ബിഎസ്എൻഎല്ലിന്റെ തദ്ദേശീയ സാങ്കേതികവിദ്യ ഉപയോഗിച്ചാണ് നടപ്പാക്കുന്നതെന്നും അദ്ദേഹം വ്യക്തമാക്കി. ഓഗസ്റ്റ് 15-ന് ഡൽഹിയിലെ ടെലികോം സർക്കിളിൽ 4ജി സേവനങ്ങളുടെ സോഫ്റ്റ് ലോഞ്ച് ബിഎസ്എൻഎൽ നടത്തിയിരുന്നു.

കഴിഞ്ഞ വർഷമാണ് 25,000 കോടി രൂപയുടെ പ്രാരംഭ നിക്ഷേപത്തോടെ മെട്രോ നഗരങ്ങളിൽ 4ജി സേവനങ്ങൾ ലഭ്യമാക്കാൻ ബിഎസ്എൻഎൽ ശ്രമങ്ങൾ ആരംഭിച്ചിരുന്നത്. ഇതിനായി ഒരു ലക്ഷം മൊബൈൽ ടവറുകൾ ഇതിനോടകം സ്ഥാപിച്ചിട്ടുണ്ട്. 5ജി സേവനങ്ങൾ ലഭ്യമാക്കുന്നതിനും നെറ്റ്‌വർക്ക് ശേഷി വർധിപ്പിക്കുന്നതിനുമായി 47,000 കോടി രൂപ വരെ നിക്ഷേപിക്കാനാണ് ബിഎസ്എൻഎൽ പദ്ധതിയിടുന്നത്. 4ജി സേവനങ്ങൾ ശക്തിപ്പെടുത്തിയതിന്റെ ഫലമായി, ഈ സാമ്പത്തിക വർഷത്തിന്റെ വരും പാദങ്ങളിൽ ബിഎസ്എൻഎൽ ലാഭം റിപ്പോർട്ട് ചെയ്യുമെന്ന് ടെലികോം മന്ത്രി ജ്യോതിരാദിത്യ സിന്ധ്യ ജൂലൈയിൽ പ്രത്യാശ പ്രകടിപ്പിച്ചിരുന്നു.

ഓരോ ഉപഭോക്താവിൽ നിന്നുമുള്ള ശരാശരി വരുമാനം 50 ശതമാനം വർധിപ്പിക്കണമെന്നും, എൻ്റർപ്രൈസ് ബിസിനസ് 25 മുതൽ 30 ശതമാനം വരെ വളർത്തണമെന്നും മന്ത്രി ബിഎസ്എൻഎല്ലിന്റെ അവലോകന യോഗത്തിലാണ് ആവശ്യപ്പെട്ടിരുന്നത്. കഴിഞ്ഞ സാമ്പത്തിക വർഷത്തിന്റെ ജൂലൈ-സെപ്റ്റംബർ പാദത്തിൽ 262 കോടി രൂപയും, ഒക്ടോബർ-ഡിസംബർ പാദത്തിൽ 280 കോടി രൂപയും അറ്റാദായം ബിഎസ്എൻഎൽ നേടി. 18 വർഷത്തിനിടെ ആദ്യമായാണ് കമ്പനി തുടർച്ചയായ ലാഭം രേഖപ്പെടുത്തുന്നത്.

പ്രധാനമന്ത്രി നരേന്ദ്ര മോദി അടുത്തിടെ ചെങ്കോട്ടയിൽ നടത്തിയ പ്രസംഗത്തിൽ ഇന്ത്യയുടെ 6ജി സാങ്കേതികവിദ്യയ്ക്കുള്ള ഭാവി പദ്ധതികളെക്കുറിച്ച്  പരാമർശിച്ചിരുന്നു. 6ജി സേവനങ്ങൾ മിഷൻ മോഡിൽ ആരംഭിക്കുമെന്നും, ലോകത്തിലെ ആദ്യ 6ജി രാജ്യങ്ങളിലൊന്നായി ഇന്ത്യ മാറുമെന്നും അദ്ദേഹം വ്യക്തമാക്കി. ബിഎസ്എൻഎല്ലിന്റെ 4ജി, 5ജി സേവനങ്ങൾ ഉപഭോക്താക്കൾക്ക് കൂടുതൽ കാര്യക്ഷമവും വേഗതയേറിയതുമായ കണക്ടിവിറ്റി വാഗ്ദാനം ചെയ്യുമെന്നാണ് പ്രതീക്ഷിക്കപ്പെടുന്നത്.