പിരിയാപട്ടണ: ഗോസംരക്ഷണത്തിന്റെ പേരില്‍  പൊലിസ് കര്‍ഷകനെ അക്രമിച്ചതായി പരാതി. പിരിയാപട്ടണം മുത്തൂറു ഗ്രാമത്തിലെ പുട്ടേ ഗൗഡയുടെ മകന്‍ മാദേഗൗഡയാണ് കഴിഞ്ഞ ദിവസം രാത്രി പൊലിസ് അക്രമിച്ചതായി പരാതിപ്പെട്ടത്. താന്‍ വളര്‍ത്തുന്ന രണ്ട് പശുക്കളെ സിദ്ധാപുരത്തിനടുത്ത് ഗൂടുഗദ്ധ ഗ്രാമത്തിലെ ദോരെ എന്ന കര്‍ഷകന് വില്‍ക്കാന്‍ കൊണ്ടുവന്നതായിരുന്നു. വഴിയില്‍വച്ച് സിദ്ധാപുരം എ.എസ്‌ഐയും പൊലിസും തടഞ്ഞുവച്ചു തന്നെ ആക്രമിക്കുകയായിരുന്നുവെന്നും മകളെ വിവാഹം ചെയ്തു കൊടുത്ത വകയിലുള്ള കടം വീട്ടാന്‍ വില്‍ക്കുകയാണെന്നു പറഞ്ഞപ്പോള്‍ പരിഗണിച്ചില്ലെന്നും മാദേ ഗൗഡ പറത്തു. പശുക്കളെ മൈസൂരു ഗോസംരക്ഷണ ശാലയിലേക്ക് കൊണ്ടുപോയി. മര്‍ദനത്തില്‍ പരുക്കേറ്റ മാദേഗൗഡ സിദ്ധാപുരം സര്‍ക്കാര്‍ ആശുപത്രിയില്‍ ചികിത്സ തേടി.