തിരുവനന്തപുരം: തിരുവനന്തപുരത്തെ റീജനല്‍ കാന്‍സര്‍ സെന്ററില്‍ ഗുരുതര ചികില്‍സാപിഴവ്. തലച്ചോറിലെ കാന്‍സറിന് ശ്വാസകോശ കാന്‍സറിനുള്ള കീമോതെറപ്പി ഗുളികകള്‍ മാറി നല്‍കി. മരുന്ന് കമ്പനിയുടെ പാക്കിങ്ങിലെ പിഴവാണ് മരുന്ന് മാറി നല്‍കാന്‍ കാരണമായതെന്നാണ് ആശുപത്രി അധികൃതര്‍ നല്‍കുന്ന വിശദീകരണം. 

2130കുപ്പികളില്‍ 2125 കുപ്പികളും വിതരണം ചെയ്തതിനു ശേഷമാണ് പിഴവ് കണ്ടെത്താനായത്. എത്ര രോഗികള്‍ക്കു ഇതു നല്‍കിയിട്ടുണ്ടെന്ന വിവരം ലഭ്യമല്ല. 

ഒരു ബാച്ചില്‍ മാത്രമാണ്  പിഴവ് കണ്ടെത്തിയതെന്നും ആര്‍ക്കും ആരോഗ്യപ്രശ്‌നം റിപ്പോര്‍ട്ട് ചെയ്തിട്ടില്ലെന്നും ആര്‍സിസി വിശദീകരിച്ചു.മരുന്ന് നിര്‍മിച്ച ഗുജറാത്തിലെ ഗ്ലോബെല ഫാര്‍മയ്‌ക്കെതിരെ സംസ്ഥാന ഡ്രഗ് കണ്‍ട്രോളര്‍ കേസെടുത്തു. കമ്പനിയെ കരിമ്പട്ടികയില്‍ പെടുത്തിയെന്നും ആര്‍.സി.സി അറിയിച്ചു.

ALSO READ: കഫ്‌സിറപ്പ് ദുരന്തം; ഫാര്‍മ കമ്പനി ഉടമ പിടിയില്‍, മരണസംഖ്യ 21 ആയി

ഗുജറാത്തിലെ ഗ്ലോബെല ഫാര്‍മ നിര്‍മിച്ച ടെമൊസോളോമൈഡ്100 എന്ന ഗുളികയുടെ അഞ്ച് ഗുളികകള്‍ വരുന്ന കുപ്പിയുടെ പാക്കിങിലാണ് പിഴവ് സംഭവിച്ചത്. ടെമൊസോളോമൈഡ്100 എന്ന പേരുള്ള പേപ്പര്‍ ബോക്‌സില്‍ എറ്റോപോസൈഡ് 50 എന്ന ഗുളികയുടെ കുപ്പിയാണ് വിതരണം ചെയ്തത്. കുപ്പിക്കു പുറത്തും എറ്റോപോസൈഡ് 50 എന്നായിരുന്നു. എട്ട് ഗുളികയായിരുന്നു ഓരോ കുപ്പിയിലും ഉണ്ടായിരുന്നത്. ഡ്രഗ്‌സ് കണ്‍ട്രോളറുടെ പരിശോധനയിലും ബോക്‌സിനുള്ളില്‍ ഈ ഗുളികയാണെന്നു സ്ഥിരീകരിച്ചു.മരുന്ന് മാറിയ വിവരം അറിഞ്ഞതോടെ വിതരണം പൂര്‍ണമായും നിര്‍ത്തിവെച്ചു. മരുന്ന് നല്‍കിയ രണ്ടായിരത്തോളം രോഗികളെ ബന്ധപ്പെടാനുള്ള ശ്രമം ആരംഭിച്ചതായി ആശുപത്രി അധികൃതര്‍ വ്യക്തമാക്കി. 

അതേസമയം, നേരത്തേ വിതരണം ചെയ്ത ബോക്‌സുകളിലും മരുന്നുകള്‍ മാറിയിരുന്നോ എന്ന് വ്യക്തതവരുത്താനായി ഫാര്‍മസിയില്‍നിന്ന് ഒരു മാസത്തിനിടെ എറ്റോപോസൈഡ് വാങ്ങിയ രോഗികളുടെ വിവരം ശേഖരിച്ചുവരികയാണെന്നും അധികൃതര്‍  അറിയിച്ചു. 

English Summary: A serious medical error has been reported at the Regional Cancer Centre (RCC) in Thiruvananthapuram, where patients with brain cancer were mistakenly given a chemotherapy drug intended for lung cancer. The issue reportedly stemmed from a packaging error by Gujarat-based pharmaceutical company Globel Pharma.