പുതിയതായി വാങ്ങിയ ഇലക്ട്രിക് സ്കൂട്ടറിന്റെ തകരാർ പരിഹരിക്കാത്തതിൽ പ്രതിഷേധിച്ച് ഗുജറാത്തിലെ പാലൻപൂർ സ്വദേശിയായ യുവാവ് ഒല ഷോറൂമിന് മുന്നിൽ സ്വന്തം സ്കൂട്ടറിന് തീയിട്ടു. സംഭവത്തിന്റെ വീഡിയോ ദൃശ്യങ്ങൾ സോഷ്യൽ മീഡിയയിൽ വൈറലായി. സ്കൂട്ടർ പൂർണമായും കത്തിനശിച്ചു.

ഭാര്യയ്ക്കും അഞ്ച് വയസ്സുള്ള മകനോടൊപ്പം യുവാവ് ഹൈവേയിൽ കൂടി യാത്ര ചെയ്യവേ സ്കൂട്ടറിന്റെ ടയറും സ്റ്റിയറിംഗും വേർപെട്ട് അപകടം ഉണ്ടായതാണ് പ്രതിഷേധത്തിന് കാരണം. ഹൈവേയിൽ കുറഞ്ഞ വേഗതയിൽ സഞ്ചരിച്ചതിനാലാണ് വൻ അപകടം ഒഴിവായത് എന്ന് യുവാവ് പറഞ്ഞു. എന്നാൽ തകരാർ സംബന്ധിച്ച് ഒല ഇലക്ട്രിക് കമ്പനിക്ക് നിരവധി തവണ പരാതി നൽകിയെങ്കിലും തൃപ്തികരമായ മറുപടിയോ പരിഹാരമോ ലഭിച്ചില്ലെന്ന് അദ്ദേഹം ആരോപിച്ചു.

ALSO READ: ഒന്നേ മുക്കാൽ കോടി രൂപയുടെ കാർ വാങ്ങാൻ കാളവണ്ടിയുമായി കർഷകൻ നേരെ ഷോറൂമിലേക്ക്; ​ഗംഭീര സ്വീകരണം

ഇതുമായി ബന്ധപ്പെട്ട് പലതവണ ഷോറൂം സന്ദർശിച്ചിട്ടുണ്ടെന്നും എന്നാൽ അധികൃതർ പ്രശ്നം അവഗണിക്കുകയായിരുന്നുവെന്നും യുവാവ് വ്യക്തമാക്കി. ഇതിൽ പ്രതിഷേധിച്ചാണ് ഷോറൂമിന് മുന്നിൽ എത്തി യുവാവ് സ്കൂട്ടറിൽ പെട്രോൾ ഒഴിച്ച് തീയിട്ടത്. സംഭവത്തിന്റെ പ്രചരിക്കുന്ന വീഡിയോ ദൃശ്യങ്ങളിൽ യുവാവ് സ്കൂട്ടറിൽ മണ്ണെണ്ണ ഒഴിക്കുന്നതും തീ കൊളുത്തുന്നതും വ്യക്തമാണ്. നിമിഷങ്ങൾക്കകം വാഹനം പൂർണമായി കത്തിനശിച്ചു. എന്താണ് സംഭവം എന്നറിയാൻ വലിയ ജനക്കൂട്ടവും ഷോറൂമിന് പുറത്ത് തടിച്ചുകൂടി.

എന്തായാലും സംഭവം ഒല ഇലക്ട്രിക് സ്കൂട്ടറുകളുടെ സർവീസ് നിലവാരത്തെക്കുറിച്ച് ഉപഭോക്താക്കൾക്കിടയിൽ വലിയ ആശങ്കകളാണ് ഉയർത്തുന്നത്. സോഷ്യൽ മീഡിയയിൽ ഇതിനെതിരെ നിരവധി പ്രതികരണങ്ങളും ഉയരുന്നുണ്ട്.

ഒല ഇലക്ട്രിക് സർവീസ് പ്രശ്നങ്ങൾ: ഉപഭോക്താക്കളുടെ പരാതികളും കമ്പനിയുടെ നടപടികളും

ഇന്ത്യയിലെ പ്രമുഖ ഇലക്ട്രിക് ഇരുചക്ര വാഹന കമ്പനിയായ ഒല ഇലക്ട്രിക്കിനെതിരെ രാജ്യ വ്യാപകമായി സർവീസ് സംബന്ധമായ പരാതികൾ വർഷങ്ങളായി വർധിച്ചുവരികയാണ്. കഴിഞ്ഞ വർഷം അവസാനത്തോടെ 10,000-ത്തിലധികം ഉപഭോക്തൃ പരാതികളാണ് ഒലയ്ക്കെതിരെ രജിസ്റ്റ് ചെയ്തിട്ടുള്ളത് എന്ന് സെൻട്രൽ കൺസ്യൂമർ പ്രൊട്ടക്ഷൻ അതോറിറ്റി (സിസിപിഎ) അറിയിച്ചു. അതേസമയം ഈ വർഷവും ഇത് തുടരുകയാണ്, പ്രത്യേകിച്ച് ഡിമാൻഡ് വർധനവിനിടയിൽ സർവീസ് ബാക്ക്‌ലോഗും റെഗുലേറ്ററി പ്രശ്നങ്ങളും കമ്പനിയെ ബാധിക്കുന്നു. 

പരാതി രജിസ്ട്രേഷൻ

നാഷണൽ കൺസ്യൂമർ ഹെൽപ്പ്‌ലൈൻ (1915) അല്ലെങ്കിൽ ഒല ആപ്പ് വഴി പരാതിപ്പെടുക. ഒല 'ഇന്ത്യ ഇൻസൈഡ്' വിഷനോടെ പുതിയ മോഡലുകൾ (റോഡ്സ്റ്റർ X+) അവതരിപ്പിക്കുന്നുണ്ടെങ്കിലും, സർവീസ് മെച്ചപ്പെടുന്നത് വരെ വാങ്ങാൻ ആ​ഗ്രഹിക്കുന്നവർ ജാഗ്രത പാലിക്കുക. ഈ പ്രശ്നങ്ങൾ ഇന്ത്യയിലെ ഇരുചക്ര ഇലക്ട്രിക് സ്കൂട്ടർ മാർക്കറ്റിന്റെ വളർച്ചയെ ബാധിക്കുമെങ്കിലും, ഒലയുടെ നിക്ഷേപങ്ങൾ ദീർഘകാലത്തേക്ക് പ്രതീക്ഷ നൽകുന്നുണ്ട്.

A man from Palanpur, Gujarat, set his Ola electric scooter on fire outside a showroom to protest the company's failure to address a defect that caused the scooter's tyre and steering to detach during a ride with his wife and five-year-old son, narrowly escaping a major accident. Despite multiple complaints, the issue remained unresolved, leading to the dramatic act, which was captured in a viral video.