കൊല്‍ക്കത്ത: ബംഗാളില്‍ എം.ബി.ബി.എസ് വിദ്യാര്‍ഥിനിയെ പീഡിപ്പിച്ച കേസില്‍ സഹപാഠി അറസ്റ്റില്‍. വിദ്യാര്‍ഥിനിക്കൊപ്പം രാത്രി ഭക്ഷണം കഴിക്കാന്‍ പോയ  സഹപാഠിയാണ് ഇന്നലെ പിടിയിലായത്. ഇതോടെ കേസില്‍ ആറുപേരാണ് അറസ്റ്റിലായത്.

ഒഡീഷയിലെ ജലേശ്വറില്‍ നിന്നുള്ള 23 കാരിയായ മെഡിക്കല്‍ വിദ്യാര്‍ത്ഥിനി നല്‍കിയ പരാതിയുടെ അടിസ്ഥാനത്തിലാണ് സഹപാഠിയെ അറസ്റ്റ് ചെയ്തിരിക്കുന്നത്. രാത്രിയില്‍ ഭക്ഷണം കഴിക്കാനായി പുറത്ത് പോയ സമയത്ത് ഇയാള്‍ തന്നെ ബലാത്സംഗത്തിനിരയാക്കിയെന്നാണ് അതിജീവിത നല്‍കിയ പരാതി. 

വെള്ളിയാഴ്ച രാത്രി തന്നെ കോളജിനടുത്തുള്ള കാട്ടിലേക്ക് വലിച്ചിഴച്ച് ഭീഷണിപ്പെടുത്തി ബലാത്സംഗം ചെയ്തതായി പരാതിയില്‍ പറയുന്നു. പെണ്‍കുട്ടിയുടെ പിതാവ് നല്‍കിയ പരാതിയില്‍ അലിയുടെ പേരും ഉള്‍പ്പെടുത്തിയിട്ടുണ്ട്. നാളെ രാവിലെ കോടതിയില്‍ ഹാജരാക്കും. സംഭവത്തിന് ശേഷം പെണ്‍കുട്ടി അലിക്കൊപ്പമാണ് ഹോസ്റ്റലില്‍ തിരിച്ചെത്തിയത്. ആദ്യ ദിവസം മുതല്‍ അയാള്‍ പൊലിസിന്റെ നിരീക്ഷണത്തിലായിരുന്നു. കഴിഞ്ഞ നാല് ദിവസമായി പൊലിസ് ഇയാളെ ചോദ്യം ചെയ്തു വരികയായിരുന്നു.

കേസില്‍ ആദ്യം നല്‍കിയ മൊഴി ഇങ്ങനെ 
അതേസമയം, വിദ്യാര്‍ഥിനി കൂട്ടബലാത്സംഗത്തിന് ഇരയായിട്ടില്ലെന്ന് പൊലിസ് പറഞ്ഞു. തങ്ങളെ ഒരു കൂട്ടം ആളുകള്‍ പിന്തുടര്‍ന്നുവെന്നും അവരില്‍ നിന്ന് രക്ഷപ്പെടാനായി കാടിന്റെ ഭാഗത്തേക്ക് ഓടിയെന്നുമാണ് വിദ്യാര്‍ഥി ആദ്യ നല്‍കിയ മൊഴി. കൂടെയുണ്ടായിരുന്ന സഹപാഠി പേടിച്ച് ഓടിയെന്നും മൊഴിയില്‍ പറഞ്ഞിരുന്നു. യുവതിയുടെ മൊബൈല്‍ ഫോണ്‍ തട്ടിയെടുത്ത പ്രതികള്‍, ഒച്ചവെക്കുകയോ പരാതി നല്‍കുകയോ ചെയ്താല്‍ ഗുരുതര പ്രത്യാഘാതങ്ങള്‍ നേരിടേണ്ടിവരുമെന്നും ഭീഷണിപ്പെടുത്തി.

സംഭവത്തില്‍ സ്വമേധയാ കേസെടുത്ത ദേശീയ വനിതാ കമ്മീഷന്‍, പ്രതികളെ ഉടന്‍ അറസ്റ്റ് ചെയ്യണമെന്ന് ആവശ്യപ്പെട്ട് ബംഗാള്‍ ഡി.ജി.പിക്ക് കത്ത് നല്‍കിയിരുന്നു. ആദ്യം നല്‍കിയ മൊഴിയുടെ അടിസ്ഥാനത്തിലായിരുന്നു അഞ്ച് പേരെ അറസ്റ്റ് ചെയ്തത്. 

ALSO READ: 'അര്‍ധരാത്രി 12.30 ന് അവള്‍ എങ്ങനെ കാമ്പസിന് പുറത്തുപോയി, വൈകി പുറത്ത് പോകാന്‍ പെണ്‍കുട്ടികളെ അനുവദിക്കരുത്': മമതാ ബാനര്‍ജി
പെണ്‍കുട്ടിയും അറസ്റ്റിലായവരും നല്‍കിയ മൊഴിയില്‍ വൈരുദ്ധ്യങ്ങള്‍ ഉള്ളതായി പൊലിസ് പറയുന്നു.  കേസില്‍ നേരത്തെ പിടികൂടിയ അഞ്ച് പേരുടെ പങ്ക് എന്താണെന്ന് അന്വേഷിച്ചുവരികയാണ്. പ്രതികളെ വൈദ്യപരിശോധനയ്ക്കായി കൊണ്ടുപോകും.' ദുര്‍ഗാപൂര്‍ പൊലിസ് മാധ്യമങ്ങളോട് പറഞ്ഞു.

സംഭവത്തില്‍ അയല്‍ സംസ്ഥാനമായ ഒഡിഷ രൂക്ഷമായ വിമര്‍ശനവുമായി രംഗത്തെത്തി. കുറ്റവാളികളെ എത്രയും വേഗത്തില്‍ പിടികൂടണമെന്നും കര്‍ശനമായ ശിക്ഷ ഉറപ്പാക്കണമെന്നും പശ്ചിമ ബംഗാള്‍ മുഖ്യമന്ത്രി മോഹന്‍ ചരണ്‍ മാജി ആവശ്യപ്പെട്ടു. ഒഡിഷ സംസ്ഥാന വനിതാ കമ്മീഷന്‍ (ഒഎസ്സിഡബ്ല്യു) ചെയര്‍പേഴ്സണ്‍ സോവന മൊഹന്തി ബംഗാളിലെത്തി അതിജീവിതയുമായി ഇന്നലെ സംസാരിച്ചു. അവരുടെ ആരോഗ്യസ്ഥിതി പരിശോധിക്കുകയും മാതാപിതാക്കളെ കാണുകയും പ്രാദേശിക പൊലിസുമായി ചര്‍ച്ച നടത്തുകയും ചെയ്തു.

ALSO READ: ബംഗാളില്‍ മെഡിക്കല്‍ വിദ്യാര്‍ഥിനി കൂട്ടബലാത്സംഗത്തിനിരയായ സംഭവം; മൂന്ന് പേര്‍ അറസ്റ്റില്‍

സംഭവത്തില്‍ അന്വേഷണം നടന്നുവരികയാണെന്നും പെണ്‍കുട്ടിയുടെ സുരക്ഷയില്‍ തന്റെ സര്‍ക്കാരിന്റെ പേര് വലിച്ചിഴക്കരുതെന്നും ബംഗാള്‍ മുഖ്യമന്ത്രി മമത ബാനര്‍ജി പ്രതികരിച്ചു. പെണ്‍കുട്ടികളെ രാത്രി പുറത്തിറങ്ങാന്‍ അനുവദിക്കരുതെന്നും പെണ്‍കുട്ടികള്‍ സ്വയം സംരക്ഷിക്കണമെന്ന മുഖ്യമന്ത്രിയുടെ പ്രസ്താവനയ്‌ക്കെതിരെ കടുത്ത വിമര്‍ശനമുയര്‍ന്നിരുന്നു.

a medical student in bengal was allegedly raped, and police have arrested a fellow classmate. however, authorities clarified that it was not a gangrape case.