റിയാദ്: 2026 ഫിഫ ലോകകപ്പിന് യോഗ്യത നേടി സഊദി അറേബ്യ. ഏഷ്യൻ വേൾഡ് കപ്പ് ക്വാളിഫയറിൽ ഇറാഖിനെ സമനിലയിൽ തളച്ചാണ് സഊദി അറേബ്യ അടുത്ത ലോകകപ്പിന്റെ ടിക്കറ്റ് ഉറപ്പിച്ചത്. കിങ് അബ്ദുള്ള സ്പോർട്സ് സിറ്റി സ്റ്റേഡിയത്തിൽ നടന്ന മത്സരത്തിൽ ഇരുടീമുകളും ഗോൾ രഹിത സമനിലയിൽ പിരിയുകയായിരുന്നു.

ഗ്രൂപ്പ് ബിയിൽ നിന്നും രണ്ടു മത്സരങ്ങളിൽ നിന്നും ഒരു വിജയവും ഒരു സമനിലയുമായി നാല് പോയിന്റോടെയാണ് സഊദി അറേബ്യ തങ്ങളുടെ ലോകകപ്പ് യോഗ്യത ഉറപ്പാക്കിയത്. ഏഴാം തവണയാണ് സഊദി അറേബ്യ ലോകകപ്പിന് യോഗ്യത നേടുന്നത്. 1994ൽ ആയിരുന്നു സഊദി ആദ്യമായി ലോകകപ്പിൽ കളിച്ചത്. 

2022 ഖത്തർ ലോകകപ്പിൽ ശ്രദ്ധേയമായ പ്രകടനം കാഴ്ചവെക്കാൻ സഊദി അറേബ്യക്ക് സാധിച്ചിരുന്നു. ഗ്രൂപ്പ് ഘട്ടത്തിൽ ആദ്യ മത്സരത്തിൽ അർജന്റീനയെ വീഴ്ത്തി ഫുട്ബോൾ ലോകത്തെ ഞെട്ടിക്കാൻ സഊദിക്ക് സാധിച്ചിരുന്നു. നിലവിലെ ലോക ചാമ്പ്യന്മാരെ ഒന്നിനെതിരെ രണ്ട് ഗോളുകൾക്കായിരുന്നു സഊദി പരാജയപ്പെടുത്തിയിരുന്നത്. വീണ്ടും മറ്റൊരു ലോകകപ്പിൽ കൂടി തങ്ങളുടെ സാന്നിധ്യം ഉറപ്പാക്കുമ്പോൾ ഫുട്ബോൾ ലോകത്ത് സഊദിക്ക് വീണ്ടും അത്ഭുതങ്ങൾ സൃഷ്ടിക്കാൻ സാധിക്കുമോയെന്നും കണ്ടുതന്നെ അറിയണം.   

അതേസമയം ഇറാഖിനെതിരെയുള്ള മത്സരത്തിൽ സമ്പൂർണ്ണ ആധിപത്യം  സഊദിയുടെ കൈവശമായിരുന്നു. ബോൾ പൊസഷനിലും ഷോട്ടുകളുടെ എണ്ണത്തിലും ഇറാഖിന് മേൽ കൃത്യമായ ആധിപത്യം പുലർത്താൻ സഊദിക്ക് സാധിച്ചു. മത്സരത്തിൽ 63 ശതമാനം ബോൾ പൊസിഷൻ സ്വന്തമാക്കിയ സഊദി 15 ഷോട്ടുകളാണ് എതിരാളികളുടെ പോസ്റ്റിലേക്ക് ഉതിർത്തത്. ഇതിൽ നാല് ഷോട്ടുകളും ഓൺ ടാർഗറ്റിലേക്ക് ആയിരുന്നു.

സഊദിയുടെ മികച്ച നീക്കങ്ങളെ തടഞ്ഞുനിർത്തിക്കൊണ്ട് ഇറാഖ് പ്രതിരോധം മികച്ചു നിന്നപ്പോൾ സൗഊദിക്ക് ഗോള്‍ നേടാൻ സാധിക്കാതെ പോവുകയായിരുന്നു. മറുഭാഗത്ത് നാല് ഷോട്ടുകൾ മാത്രമാണ് ഇറാഖിന് നേടാൻ സാധിച്ചത്. ഇതിൽ ഒരു ഷോട്ട് മാത്രമാണ് സഊദിയുടെ പോസ്റ്റിലേക്ക് ഇറാഖ് ഉന്നം വെച്ചത്.

Saudi Arabia has qualified for the 2026 FIFA World Cup. Saudi Arabia secured its ticket to the next World Cup by drawing with Iraq in the Asian World Cup qualifiers. This is the seventh time Saudi Arabia has qualified for the World Cup.