റിയാദ്: സഊദി ഇസ്‌ലാമിക കാര്യ മന്ത്രാലയത്തിന്റെ കീഴില്‍ ലോകത്തിന്റെ വിവിധ ഭാഗങ്ങളില്‍ നടത്തുന്ന പ്രബോധന പ്രവര്‍ത്തനങ്ങള്‍ താല്‍കാലികമായി നിര്‍ത്തിവച്ചു.
മന്ത്രാലയത്തിന് കീഴിലെ ഇമാമുമാരും പ്രബോധകരും വിദേശ രാജ്യങ്ങളില്‍ പ്രബോധന പ്രവര്‍ത്തനങ്ങളില്‍ പങ്കെടുക്കുന്നതും നിര്‍ത്തി വെക്കാന്‍ ഉത്തരവിട്ടിട്ടുണ്ട്.വിദേശ രാജ്യങ്ങളില്‍ പ്രബോധന പ്രവര്‍ത്തനം നടത്തുന്നതിന് പുതിയ വ്യവസ്ഥകളും നിയന്ത്രണങ്ങളും നടപ്പാക്കുന്നതിന് നീക്കമുണ്ട്. ഇത് പൂര്‍ണമായും പ്രാവര്‍ത്തികമായാല്‍ വീണ്ടും അനുമതി നല്‍കും.
ഇസ്‌ലാമികകാര്യ മന്ത്രാലയത്തിന് കീഴിലെ പ്രബോധകര്‍ വിദേശങ്ങളില്‍ പ്രബോധന പരിപാടികളില്‍ പങ്കെടുക്കുന്നത് നിര്‍ത്തിവയ്ക്കണമെന്നാവശ്യപ്പെട്ടു ഡെപ്യൂട്ടി ഇസ്‌ലാമികകാര്യ മന്ത്രി ഡോ. തൗഫീഖ് അല്‍ സുദൈരിയാണ് അടിയന്തര സര്‍ക്കുലര്‍ ഇറക്കിയത്.
പുതിയ വ്യവസ്ഥകള്‍ക്കും നിയന്ത്രണങ്ങള്‍ക്കും രൂപം നല്‍കി വരികയാണെന്ന് ഇസ്‌ലാമികകാര്യ മന്ത്രാലയ സെക്രട്ടറിമാര്‍ക്കും മന്ത്രാലയ ശാഖാ മേധാവികള്‍ക്കും മറ്റു മുതിര്‍ന്ന ഉദ്യോഗസ്ഥര്‍ക്കും അയച്ച സര്‍ക്കുലറില്‍ വ്യക്തമാക്കുന്നുണ്ട്.