കണ്ണൂര്‍: പള്ളിക്കുന്നില്‍ വീണ്ടും ബോംബുകള്‍ കണ്ടെടുത്തു. പള്ളിക്കുന്ന് ഗവ. ഹയര്‍സെക്കന്‍ഡറി സ്‌കൂളിനു പിന്‍വശത്തെ ആളൊഴിഞ്ഞ പറമ്പില്‍നിന്ന് ബോംബുകള്‍ കണ്ടെത്തിയതിനു പിന്നാലെ പരിസരപ്രദേശങ്ങളില്‍ ഇന്നലെ പൊലിസ് നടത്തിയ റെയ്ഡിലാണു മൂന്ന് ഐസ്‌ക്രീം ബോംബുകള്‍ കൂടി കണ്ടെടുത്തത്. ടൗണ്‍ സി.ഐ കെ.വി വേണുഗോപാല്‍, എസ്.ഐ എ.പി കുട്ടികൃഷ്ണന്‍, ഡോഗ് സ്‌ക്വാഡ്, ബോംബ് സ്‌ക്വാഡ് എന്നിവര്‍ സംയുക്തമായാണ് ഇന്നലെ ഉച്ചയ്ക്ക് ഒന്നോടെ കൂറുമ്പ കാവിനു സമീപം പരിശോധന നടത്തിയത്.
ബുധനാഴ്ച വൈകുന്നേരം മൂകാംബിക ക്ഷേത്ര റോഡിനു സമീപത്തെ മുംബൈ സ്വദേശിയുടെ ഉടമസ്ഥതയിലുള്ള പറമ്പില്‍ നിന്ന് സ്റ്റീല്‍ ബോം ബും ഐസ്‌ക്രീം ബോംബും പ്ലാസ്റ്റിക് കവറിലാക്കി സൂക്ഷിച്ച നിലയില്‍ കണ്ടെടുത്തിരുന്നു. സ്‌കൂളിനു സമീപം കഞ്ചാവ് വില്‍പനയും ഉപയോഗവും വ്യാപകമാണെന്ന പരാതിയെത്തുടര്‍ന്നു പരിശോധനയ്‌ക്കെത്തിയ എക്‌സൈസ് സംഘമാണു ബോംബുകള്‍ കണ്ടെത്തിയിരുന്നത്.
ശാന്തമായ പള്ളിക്കുന്ന് പ്രദേശത്തുനിന്നു കൂടുതല്‍ ബോംബുകള്‍ കണ്ടെത്തിയതോടെ പ്രദേശവാസികള്‍ ആശങ്കയിലാണ്.
ഇന്നലെ പിടികൂടിയ ബോംബുകള്‍ പയ്യാമ്പലം കടപ്പുറത്ത് വച്ച് നിര്‍വീര്യമാക്കി.