ദുബൈ: ലോകോത്തര വാസ്തുവിദ്യയുടെ കേന്ദ്രമായ ദുബൈ, അതി​ഗംഭീരമായ പുതിയൊരു നിർമ്മിതിക്ക് കൂടി സാക്ഷ്യം വഹിക്കാൻ ഒരുങ്ങുകയാണ്. വെറും ഒരു അപ്പാർട്ട്‌മെൻ്റിൻ്റെ വീതിയിലും (ഏകദേശം 22.5 മീറ്റർ) 380 മീറ്റർ (1,247 അടി) ഉയരത്തിലും നിർമ്മിക്കുന്ന 'മുറാബ വെയിൽ' എന്ന അവിശ്വസനീയമാംവിധം മെലിഞ്ഞ സൂപ്പർ-സ്ലിം അംബരചുംബി കെട്ടിടത്തിൻ്റെ നിർമാണ പ്രവൃത്തികൾ പുരോഗമിക്കുകയാണ്.

അതിമനോഹരമായ വാസ്തുവിദ്യാ സവിശേഷതകളാൽ ആഡംബര ജീവിതത്തെ പുനർനിർവചിക്കാൻ ഒരുങ്ങുന്ന 73 നിലകളുള്ള ഈ ടവർ രൂപകൽപ്പന ചെയ്തിരിക്കുന്നത്, 2017 ലെ പ്രശസ്തമായ പ്രിറ്റ്‌സ്‌കർ സമ്മാന ജേതാക്കളായ സ്പാനിഷ് ആർക്കിടെക്ചർ സ്ഥാപനമായ ആർ‌സി‌ആർ ആർക്കിടെക്റ്റസാണ്. മുറാബ വെയിലിൽ രണ്ട് മുതൽ അഞ്ച് വരെ കിടപ്പുമുറികളുള്ള 131 അത്യാഡംബര വസതികളാണ് ഉണ്ടാവുക. 

ALSO READ: ദുബൈയിലെ യാത്രാദുരിതത്തിന് അറുതിയാകുമോ? 170 ബില്യൺ ദിർഹമിൻ്റെ ഹൈവേ പദ്ധതിക്ക് അംഗീകാരം; ആശ്വാസത്തിൽ യാത്രക്കാർ 

പച്ചപ്പിൻ്റെ നിഴലുള്ള അകത്തെ മുറ്റങ്ങളിൽ ശ്രദ്ധ കേന്ദ്രീകരിക്കുന്ന പരമ്പരാഗത അറേബ്യൻ വീടുകളിൽ നിന്ന് പ്രചോദനം ഉൾക്കൊണ്ടാണ് ഇതിൻ്റെ രൂപകൽപ്പന നിർവ്വഹിച്ചിരിക്കുന്നത്. ദുബൈ ആകാശരേഖയുടെ മനോഹരമായ കാഴ്ചകളോടൊപ്പം സമാനതകളില്ലാത്ത സ്വകാര്യതയും ഇവിടെ ഉറപ്പാക്കും. ദുബൈയിലെ കഠിനമായ ചൂടിൻ്റെ തീവ്രത കുറയ്ക്കുന്നതിനും ആകാശത്തിൻ്റെ മാറുന്ന ഷേഡുകൾ പ്രതിഫലിപ്പിക്കുന്നതിനും വേണ്ടി ടവറിൻ്റെ മുൻഭാഗം, സുഷിരങ്ങളുള്ള സ്റ്റെയിൻലെസ് സ്റ്റീൽ മെഷ് കൊണ്ടുള്ള ഒരു ശിൽപപരമായ മൂടുപടം കൊണ്ട് പൊതിയും. 

നാട്ടുകാർ ജോഗിംഗ്, സൈക്ലിം​ഗ് എന്നിവ ആസ്വദിക്കുന്ന ഈന്തപ്പനകൾ നിറഞ്ഞ പ്രൊമെനേഡുകളിൽ നിന്ന് ഏതാനും ചുവടുകൾ മാത്രം അകലെയാണ് ഈ ടവർ സ്ഥിതിചെയ്യുന്നത്. കൈറ്റ്സർഫർമാർക്കും കുടുംബങ്ങൾക്കും പ്രിയപ്പെട്ട കൈറ്റ് ബീച്ചിൽ നിന്ന് നടക്കാവുന്ന ദൂരത്തിലാണ് മുറാബ ടവർ വരുന്നത്.

ALSO READ: 2026 കുടുംബ വർഷമായി ആചരിക്കും; നിർണായക പ്രഖ്യാപനവുമായി യുഎഇ പ്രസിഡന്റ് 

സ്പാ, റെസ്റ്റോറന്റ്, ആർട്ട് ഗാലറി, പാഡിൽ കോർട്ട്, സ്വകാര്യ സിനിമാ തിയേറ്റർ എന്നിവയുൾപ്പെടെയുള്ള അത്യാധുനിക സൗകര്യങ്ങൾ താമസക്കാർക്ക് ഇവിടെ ലഭ്യമാക്കും.

മുറാബയും ആർ‌സി‌ആർ ആർക്കിടെക്റ്റുകളും തമ്മിലുള്ള അഞ്ചാമത്തെ പങ്കാളിത്തമാണ് ഈ പദ്ധതി. 2028 ഡിസംബറോടെ ഇതിന്റെ നിർമ്മാണം പൂർത്തിയാകുമെന്നാണ് പ്രതീക്ഷിക്കുന്നത്. 18 മില്യൺ ദിർഹത്തിൽ (ഏകദേശം 4.9 മില്യൺ ഡോളർ) ആരംഭിക്കുന്ന അപ്പാർട്ട്‌മെൻ്റ് വില, ദുബൈയിലെ ഏറ്റവും എലൈറ്റ് വിലാസങ്ങളിലൊന്നായി ഇതിനെ മാറ്റും. ലോകത്തിലെ ഏറ്റവും ഉയരം കൂടിയ കെട്ടിടമായ ബുർജ് ഖലീഫ സ്ഥിതി ചെയ്യുന്ന ദുബൈ നൂതനത്വത്തിനും റെക്കോർഡ് സൃഷ്ടിക്കുന്ന ഡിസൈനുകൾക്കുമുള്ള ന​ഗരത്തിന്റെ ഖ്യാതി പുതിയ നിർമ്മിതിയിലൂടെ വീണ്ടും ഊട്ടി ഉറപ്പിക്കുകയാണ്.

muraba introduces a stunning super slim tower in dubai, designed to redefine urban architecture and elegance. the new skyscraper aims to touch the city’s iconic skyline with its sleek, modern design and luxury features.