വാഷിങ്ടണ്‍: ഇന്ത്യ പാക് യുദ്ധം നിര്‍ത്തിച്ചത് താനാണെന്ന് വീണ്ടും അവകാശവാദം മുഴക്കി യു.എസ് പ്രസിഡന്റ് ഡൊണാള്‍ഡ് ട്രംപ് വീണ്ടും. യു.എസ് ഇടപെടല്‍ ഉണ്ടായില്ലായിരുന്നെങ്കില്‍ ഇന്ത്യയുടെ ഓപ്പറേഷന്‍ സിന്ദൂരില്‍ ഏകദേശം 35 ദശലക്ഷം ആളുകള്‍ മരിക്കുമായിരുന്നുവെന്ന് പാകിസ്താന്‍ പ്രധാനമന്ത്രി ഷെഹ്ബാസ് ഷെരീഫ് തന്നോട് പറഞ്ഞതായും ട്രംപ് അവകാശപ്പെടുന്നു. തന്റെ ഭരണത്തിന്റെ രണ്ടാം ഘട്ട ചുമലയേറ്റെടുത്ത ശേഷമുള്ള ആദ്യ സ്റ്റേറ്റ് ഓഫ് ദി യൂണിയനില്‍ പങ്കെടുത്തു സംസാരിക്കുകയാരുന്നു ട്രംപ്.

താന്‍ പ്രസിഡന്റായി അധികാരമേറ്റെടുത്ത ശേഷമുള്ള പത്ത് മാസത്തിനുള്ളില്‍ എട്ട് യുദ്ധങ്ങള്‍ അവസാനിപ്പിച്ചെന്നാണ് ട്രംപ് അവകാശപ്പെടുന്നത്. ഇസ്‌റാഈല്‍-ഹമാസ്, ഇസ്‌റാഈല്‍-ഇറാന്‍, ഈജിപ്ത്-എത്യോപ്യ, ഇന്ത്യ-പാകിസ്താന്‍, സെര്‍ബിയ-കോസോവോ, റുവാണ്ട-ഡെമോക്രാറ്റിക് റിപ്പബ്ലിക് ഓഫ് കോംഗോ, അര്‍മേനിയ-അസര്‍ബൈജാന്‍, കംബോഡിയ-തായ്‌ലാന്റ് എന്നീ രാജ്യങ്ങള്‍ക്കിടയിലുള്ള പ്രശ്‌നങ്ങള്‍ പരിഹരിച്ചത് താനാണെന്ന് ട്രംപ് വാദിക്കുന്നു.

'സ്വദേശത്തും വിദേശത്തും അമേരിക്കക്കാര്‍ക്ക് സുരക്ഷ പുനഃസ്ഥാപിക്കാനായതില്‍ ഞങ്ങള്‍ അഭിമാനിക്കുന്നു. എന്റെ ആദ്യത്തെ പത്ത് മാസത്തിനുള്ളില്‍ ഞാന്‍ എട്ട് യുദ്ധങ്ങള്‍ അവസാനിപ്പിച്ചു. പാകിസ്താനും ഇന്ത്യയും ഒരു ആണവയുദ്ധം നടത്തുമായിരുന്നു,' ട്രംപ്  പറഞ്ഞു.

'എന്റെ ഇടപെടല്‍ ഇല്ലായിരുന്നെങ്കില്‍ 35 ദശലക്ഷം ആളുകള്‍ മരിക്കുമായിരുന്നു. പാകിസ്താന്‍ പ്രധാനമന്ത്രി പറഞ്ഞു.'

തന്റെ ഭരണകൂടം ഇപ്പോള്‍ ഒമ്പതാമത്തെ യുദ്ധം അവസാനിപ്പിക്കാനുള്ള കഠിന ശ്രമത്തിലാണെന്നും ട്രംപ് കൂട്ടിച്ചേര്‍ത്തു. 
'റഷ്യയും ഉക്രൈനും തമ്മിലുള്ള കൊലപാതകവും കൂട്ടക്കൊലയും. ഞാന്‍ പ്രസിഡന്റായിരുന്നെങ്കില്‍ ഒരിക്കലും സംഭവിക്കില്ലായിരുന്ന ഒരു യുദ്ധമാണിത്- ട്രംപ് പറഞ്ഞു. 

എന്നാല്‍ യുദ്ധം അവസാനിപ്പിക്കുന്നതില്‍ ട്രംപിന്റെ അവകശവാദം ഇന്ത്യ നേരത്തേ തള്ളിക്കളഞ്ഞിരുന്നു. യുദ്ധം അവസാനിപ്പിക്കാന്‍ കാരണം പാകിസ്താന്‍ സൈനിക ജനറലിന്റെ അഭ്യര്‍ഥനയാണെന്നാണ് ഇന്ത്യന്‍ വിദേശ കാര്യ മന്ത്രാലയത്തിന്റെ വിശദീകരണം.  ഭീമമായ താരിഫ് ചുമത്തുമെന്ന് ഭീഷണിപ്പെടുത്തിയത് കൊണ്ടാണ് യുദ്ധം അവസാനിപ്പിച്ചതെന്നും ട്രംപ് ഇതിനു മുന്‍പ് അവകാശപ്പെട്ടിരുന്നു. വലിയ യുദ്ധങ്ങള്‍ തടഞ്ഞിട്ടും തനിക്ക് നോബേല്‍ ലഭിക്കാത്തതിലുള്ള പ്രതിഷേധവും ട്രംപ് ആവര്‍ത്തിച്ച് പങ്കുവെച്ചിട്ടുണ്ട്.

us president donald trump has again claimed that he stopped a potential india–pakistan war, citing remarks allegedly made by pakistan pm shehbaz sharif. india has earlier rejected trump’s claims regarding us intervention.