പത്തനംതിട്ട: ശബരിമല സ്വര്‍ണക്കൊള്ളക്കേസില്‍ അഴിമതി നിരോധന വകുപ്പ് കൂടി ചേര്‍ത്ത് എസ്.ഐ.ടി. ഹൈക്കോടതിയുടെ നിര്‍ദേശാനുസരണമാണ് നടപടി. കേസ് കൊല്ലം വിജിലന്‍സ് കോടതിയിലേക്ക് മാറ്റും. പി.സി ആക്ട് ചുമത്തിയ സാഹചര്യത്തിലാണ് കേസ് റാന്നിയില്‍ നിന്നും കൊല്ലം കോടതിയിലേക്ക് മാറ്റുന്നത്. 

ഇതിനിടെ ദേവസ്വം ബോര്‍ഡ് മുന്‍ പ്രസിഡന്റ് എ.പത്മകുമാറിന് പ്രത്യേക അന്വേഷണ സംഘം ചോദ്യംചെയ്യലിനായി നോട്ടിസ് നല്‍കി. ഇത് രണ്ടാം തവണയാണ് പത്മകുമാറിന് നോട്ടിസ് നല്‍കുന്നത്. ഹാജരായില്ലെങ്കില്‍ കസ്റ്റഡിയിലെടുക്കാനാണ് അന്വേഷണസംഘത്തിന്റെ തീരുമാനം. രണ്ടാഴ്ച്ച മുന്‍പ് നോട്ടിസ് നല്‍കിയിരുന്നെങ്കിലും ശാരിരിക ബുദ്ധിമുട്ടുകള്‍ കാരണം ഹാജരാകാന്‍ കഴിയില്ലെന്ന് അദ്ദേഹം അറിയിക്കുകയായിരുന്നു. 

ALSO READ: ഡല്‍ഹി സ്‌ഫോടനം: പൊട്ടിത്തെറിയുണ്ടായത് സ്‌ഫോടക വസ്തുക്കള്‍ മറ്റൊരിടത്തേക്ക് മാറ്റുമ്പോഴെന്ന് സൂചന; അന്വേഷണം ഊര്‍ജ്ജിതമായി തുടരുന്നു

കേസില്‍ ദേവസ്വം ബോര്‍ഡ് മുന്‍ പ്രസിഡന്റ് എന്‍. വാസുവിനെ അറസ്റ്റ് ചെയ്തിരുന്നു. ഈഞ്ചക്കലിലെ ക്രൈംബ്രാഞ്ച് ഓഫിസില്‍ ഇന്നലെ നടന്ന ചോദ്യംചെയ്യലിന് ഒടുവിലാണ് അറസ്റ്റ്. ദേവസ്വം മുന്‍ കമ്മിഷണര്‍ കൂടിയായ വാസുവിനെ പത്തനംതിട്ട മജിസ്ട്രേറ്റ് കോടതി 24 വരെ റിമാന്‍ഡ് ചെയ്തു. പ്രത്യേക അന്വേഷണ സംഘം ( എസ്.ഐ.ടി) പിന്നീട് കസ്റ്റഡി അപേക്ഷ നല്‍കും. വാസുവിനെ കൊട്ടാരക്കര സബ് ജയിലിലേക്കു മാറ്റി. 

സ്വര്‍ണക്കവര്‍ച്ച നടന്ന 2019ല്‍ ദേവസ്വം കമ്മിഷണര്‍ ആയിരുന്നു എന്‍. വാസു. സ്വര്‍ണപ്പാളി കേസില്‍ ദേവസ്വം കമ്മിഷണറെ മൂന്നാം പ്രതിയാക്കിയാണ് ക്രൈംബ്രാഞ്ച് കേസെടുത്തിരുന്നത്. ഉണ്ണികൃഷ്ണന്‍ പോറ്റിയായിരുന്നു ഒന്നാം പ്രതി. 

ശ്രീകോവിലിലെ കട്ടിളപ്പാളിയിലെ സ്വര്‍ണപ്പാളികള്‍ ചെമ്പാണെന്ന് എഴുതാന്‍ ദേവസ്വം കമ്മിഷണറായിരുന്ന എന്‍.വാസു 2019 മാര്‍ച്ച് 19ന് നിര്‍ദേശം നല്‍കിയെന്നു സ്ഥിരീകരിച്ചതിനെ തുടര്‍ന്നാണ് കേസില്‍ മൂന്നാം പ്രതിയാക്കിയത്.അറസ്റ്റിലായ ദേവസ്വം ബോര്‍ഡ് ഉദ്യോഗസ്ഥരുടെ മൊഴിയും വാസുവിന് എതിരായിരുന്നു. രണ്ട് ദിവസങ്ങളായി വാസുവിനെ പ്രത്യേക അന്വേഷണ സംഘം ചോദ്യം ചെയ്തുവരികയായിരുന്നു. രേഖകളില്‍ തിരുത്തല്‍ വരുത്തിയതിനെ കുറിച്ചുള്ള അന്വേഷണ ഉദ്യോഗസ്ഥരുടെ ചോദ്യങ്ങള്‍ക്ക് വാസുവിന് മറുപടിയുണ്ടായിരുന്നില്ല.

ALSO READ: അറ്റകുറ്റപ്പണികള്‍ക്കായി മൂലമറ്റം വൈദ്യുതി നിലയം അടച്ചു; നാല് ജില്ലകളില്‍ ജലവിതരണം തടസ്സപ്പെടും 

ചെയ്തതെല്ലാം വാസു അറിഞ്ഞിരുന്നെന്ന് അറസ്റ്റിലായ മുരാരി ബാബുവും സുധീഷ് കുമാറും മൊഴി നല്‍കി. മുന്‍ തിരുവാഭരണ കമ്മിഷണര്‍ ബൈജുവിന്റെ മൊഴിയും വാസുവിന് എതിരായി. സുധീഷ് കുമാര്‍ ശബരിമല എക്സിക്യൂട്ടീവ് ഓഫിസറും പിന്നീട് വാസുവിന്റെ പി.എയുമായി പ്രവര്‍ത്തിച്ചിരുന്നു. 

വാസു പ്രസിഡന്റായിരിക്കെയാണ് കട്ടിളപ്പാളി സ്വര്‍ണംപൂശല്‍ കഴിഞ്ഞശേഷം ഉണ്ണികൃഷ്ണന്‍ പോറ്റിയുടെ വിവാദ ഇ-മെയില്‍ സന്ദേശം ലഭിച്ചത്. സ്വര്‍ണം ബാക്കിയുണ്ടെന്നും ഒരു പെണ്‍കുട്ടിയുടെ വിവാഹത്തിന് ചെലവഴിക്കട്ടേയെന്നും ചോദിച്ചായിരുന്നു പോറ്റിയുടെ ഇ-മെയില്‍ സന്ദേശം. എന്നാല്‍ ഇതുസംബന്ധിച്ച് വാസു നല്‍കിയ വിശദീകരണം തൃപ്തികരമായിരുന്നില്ല. 

വാസുവിന്റെ അറസ്റ്റോടെ  സ്വര്‍ണക്കവര്‍ച്ചാ കേസുകളില്‍ അറസ്റ്റിലായവരുടെ എണ്ണം അഞ്ചായി. ഒന്നാം പ്രതി ഉണ്ണികൃഷ്ണന്‍ പോറ്റി, മുന്‍ ഉദ്യോഗസ്ഥരായ മുരാരി ബാബു, കെ.എസ് ബൈജു, സുധീഷ് കുമാര്‍ എന്നിവരുടെ കസ്റ്റഡി കാലാവധി അവസാനിച്ചതോടെ നാല് പേരും ജുഡിഷ്യല്‍ കസ്റ്റഡിയിലാണ്. 

English Summary: In the ongoing Sabarimala gold heist case, the Kerala Vigilance and Anti-Corruption Bureau (VACB) has been added to the investigation following High Court directions. The case has now been transferred from the Ranni court to the Kollam Vigilance Court under the Prevention of Corruption Act.